شيكىزاتتى وڭدەۋ ارقىلى مۇناي تاۋەلدىلىگىنەن ارىلامىز - ا. قۇلسەيىتوۆ

استانا. 20 قاراشا. baq.kz - بۇگىن ورتالىق كوممۋنيكاسيالار قىزمەتىندە ەلباسىنىڭ «نۇرلى جول» - بولاشاققا باستار جول» جولداۋىن اقپاراتتىق ٴتۇسىندىرۋ ماقساتىندا ۇيىمداستىرىلعان بريفينگتە «يندۋستريالىق دامۋدىڭ قازاقستاندىق ينستيتۋتى» اق باسقارما ٴتوراعاسى ايدىن قۇلسەيىتوۆ وسىلاي مالىمدەدى، - دەپ حابارلايدى baq.kz ٴتىلشىسى.

- ٴبىز جۋىردا ساراپتامالىق تالداۋ جۇرگىزگەندە مىناداي قىزىقتى دەرەكتەرگە كوز جەتكىزدىك. 2007-2009 جىلدارى قازاقستاننىڭ ٴوندىرىپ، ەكسپورتتاعان مۇنايىنىڭ كورسەتكىشىن 2013-2014 جىلدارداعى كەزەڭدەرمەن سالىستىرىپ قاراعاندا، سوڭعى جىلدارى ٴبىزدىڭ ەل سىرتقى نارىققا ميلليون تونناعا جۋىق مۇنايدى از شىعارعان. ەسەسىنە، مۇناي ونىمدەرى كوبىرەك ساۋدالانعان. ياعني، بۇل جەردە مەن قازاقستاننىڭ مۇنايدى شيكى كۇيىندە ەمەس، وڭدەلگەن ونىمدەر رەتىندە ساۋدالانعانىنا باسىمدىق بەرىلگەندىگىن اتاپ وتكىم كەلەدى. دەمەك، قازاقستان ٴوندىرىپ ساتۋدان، وڭدەپ ساتۋعا كوشىپ كەلەدى. وسىلايشا، ٴبىز شيكىزاتتى وڭدەۋ ارقىلى مۇناي تاۋەلدىلىگىنەن ارىلامىز، - دەيدى ايدىن قۇلسەيىتوۆ.

ونىڭ ايتۋىنا قاراعاندا، سوڭعى جىلدارى قازاقتاندا وڭدەۋ ىسىنە مەملەكەتتىك تۇرعىدا قولداۋ كورسەتىلە باستاعانى جاقسى ناتيجەلەرگە باستاۋدا ەكەن.

- سوندىقتان دا، مەملەكەتتىك باعدارلامالاردى ىسكە قوسۋ ارقىلى ەلىمىزدەگى ٴوندىرىس كىرىسىنەن وڭدەۋ ىسىندەگى كىرىس كوزدەرىنىڭ كولەمى ارتىپ كەلەدى. ٴبىراق، بۇل وڭاي شاعىلار جاڭعاق ەمەس. ۇزاق مەرزىمدى ستراتەگيالىق جوسپارلاردى تياناقتى جۇرگىزگەندە عانا جاقسى كورسەتكىشتەرگە قول جەتكىزۋگە بولادى. مىسالى، سينگاپۋر مۇنداي ارالىقتان 35 جىل ىشىندە ٴجۇرىپ وتكەن، - دەيدى ول.
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!