شاعىن كاسىپكەرلىكتى ميكروكرەديتتەۋ كولەمى 10 ملن تەڭگەگە ٴوستى - ق. وسكەنبايەۆ

استانا. 13 ٴساۋىر. baq.kz – بۇگىن پارلامەنت ماجىلىسىندەگى «نۇر وتان»پارتياسى فراكسياسىنىڭ جانىنداعى ەكونوميكالىق ساياسات جونىندەگى كەڭەس پەن ٴماجىلىستىڭ قارجى جانە بيۋدجەت كوميتەتىنىڭ جانە «نۇر وتان» پارتياسى سايلاۋالدى تۇعىرناماسىنىڭ «يننوۆاسيالىق ەكونوميكا» باعىتى بويىنشا ساراپتاما توبىنىڭ بىرلەسكەن وتىرىسى وتكەن بولاتىن. جيىندا ٴسوز العان ۇلتتىق ەكونوميكا ۆيسە-مينيسترى قايىربەك وسكەنبايەۆ ەل كاسىپكەرلىگىن قولداۋ ماقساتىندا سوڭعى ەكى جىل ىشىندە 1 225 ميكروكرەديت بەرىلگەندىگىن مالىمدەي كەلە، كاسىپكەرلىكتى ميكروكرەديتتەۋ كولەمى 3 ميلليون تەڭگەدەن 10 ميلليون تەڭگەگە دەيىن وسكەندىگىن مالىمدەدى، - دەپ حابارلايدى baq.kz ٴتىلشىسى.

- اعىمداعى جىلدىڭ ناۋرىز ايىندا ەلباسىنىڭ تاپسىرماسىن ورىنداۋ ماقساتىندا ۇكىمەت «بيزنەستىڭ جول كارتاسى – 2020» بيزنەستى قولداۋ مەن دامىتۋدىڭ ٴبىرىڭعاي باعدارلاماسىن قابىلداعان بولاتىن. وسىعان بايلانىستى ەندى ميكروكرەديتتەۋ قۇرالى جاڭا فورماتتا جۇزەرە اسىرىلماق. سونىمەن قاتار، ونىڭ تەتىگى دە كەڭەيتىلدى. مىسالى، بۇرىن 3 ملن. تەڭگە مولشەردە تەك مونوقالالاردا جانە حالىقتىڭ بەلگىلى ٴبىر ساناتىنا (جۇمىسسىزدار، از قامتىلعاندار مەن ٴوزىن-وزى جۇمىسپەن قامتيتىندار) بەرىلگەننىڭ ورنىنا، ەندى ميكروكرەديتتەر اۋىلدىق جەرلەردەگى شاعىن جانە مونوقالالارداعى شاعىن كاسىپكەرلىك سۋبەكتىلەرىگە 10 ملن. تەڭگە مولشەردە بولىنەتىن بولدى، - دەدى قايىربەك ايتباي ۇلى.

ايتا كەتەيىك، ميكروكرەديت بويىنشا جىلدىق ٴتيىمدى پايىزدىق مولشەرلەمە كولمى سوڭعى قارىز الۋشى ٴۇشىن 12 پايىزدان اسپايدى.
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!