ساتىپ الۋ كەلىسىمشارتى كوپجىلدىق بولسا - م. پىشەمبايەۆ

استانا. 24 جەلتوقسان. baq.kz – بۇگىن پارلامەنت ٴماجىلىسى دەپۋتاتتارىنىڭ وسى جىلداعى سوڭعى جالپى وتىرىسى ٴوتتى. 107 دەپۋتات قاتىسقان باسقوسۋدا 20-عا جۋىق زاڭ جوبالارى تالقىلانىپ، قارالدى. ال باسقوسۋ سوڭىندا ٴماجىلىس دەپۋتاتى مەيرام پىشەمبايەۆ قانا ۇكىمەت باسشىسىنىڭ اتىنا ساتىپ الۋ قىزمەتىنە قاتىستى دەپۋتاتتىق ساۋال جولدادى.

- بىرنەشە كۇننەن كەيىن ەلىمىزدە مەملەكەت باسشىسىنىڭ باستاماسىمەن جۇزەگە اسىپ جاتقان يندۋستريالدى-يننوۆاسيالىق دامۋ باعدارلاماسىنىڭ العاشقى بەسجىلدىعى ٴوز مارەسىنە جەتەدى. بۇل جوبا ەل ەكونوميكاسىنىڭ نەگىزگى قوزعاۋشى كۇشىنە اينالعاندىعىن ايرىقشا اتاپ وتكىم كەلەدى. سەبەبى، وسى باعدارلاما اياسىندا قازاقستاننىڭ ماشيناقۇرىلىس سالاسى دامۋدىڭ داڭعىل جولىنا ٴتۇستى. ناقتىلاي تۇسسەك، باعدارلاما جۇمىسى باستاۋ العالى 2009 جىلداردىڭ كەزىندە ماشيناقۇرىلىس ٴوندىرىسىنىڭ جالپى كولەم سوماسى 282 ملن. تەڭگەنى قۇراسا، 2014 جىلدىڭ قورىتىندىسى بويىنشا جالپى جيناقتىق كورسەتكىش كولەمى 1 ملرد تەڭگەگە جۋىق قاراجات بولادى دەپ كۇتىلۋدە. ياعني، ەلىمىزدەگى ٴوندىرىس كولەمى ٴۇش ەسەگە دەيىن ەسەلەنگەنىن وڭاي اجىراتۋعا بولادى. اتاپ ايتقاندا، «دجەنەرال ەلەكتريك»، «الستوم»، «تالگو» سىندى الەمنىڭ الپاۋىت كومپانيالارىمەن بىرلەسە وتىرىپ، قازاقستانىڭ وتاندىق لوكوموتيۆتەرى مەن ۆاگوندارى شىعارىلا باستادى. مۇناي-گاز، تاۋ-كەن ٴىسى مەن اۋىلشارۋاشىلىق ماشيناقۇرىلىس سالالارى دا قارقىندى دامىپ كەلەدى. ٴتىپتى، ٴبىز ٴوزىمىز ارنايى تەحنيكالار مەن ەنەرگەتيكا سالاسىنا قاتىستى تۋربينالاردى دا شىعارا باستادىق. وسىنداي وتاندىق ماشيناقۇرىلىس سالاسىنا قاتىستى تىڭ سەرپىندى يگى ىستەردىڭ باسى-قاسىندا اركەز ەلباسى تۇرعاندىعىن ەشقاشان دا قاپەرىمىزدەن شىعارماۋىمىز كەرەك. ونىڭ ەرەن ەڭبەگى مەن ۇنەمى قولداۋىنىڭ ارقاسىندا اتالعان سالانىڭ جەتىستىكتەرى كوڭىل كونشىتەرلىكتەي دەۋگە تولىق نەگىز بار.
بۇگىنگى تاڭدا ٴساتتى جۇزەگە اسقان اتالعان جوبا اياسىندا شەشىمىن تابۋى ٴتيىس تاعى دا ٴبىرقاتار ماسەلەلەر تۋىنداۋدا. بۇل زاڭدىلىق تا. مەملەكەت باسشىسى يندۋستريالاندىرۋدىڭ ەكىنشى بەس جىلدىعى اياسىندا ۇكىمەت الدىنا قويعان تاعى ٴبىر مىندەتتەمەسى ەكونوميكانى ديۆەرسيفيكاسيالاۋ ارقىلى شيكىزات ٴوسىمىنىڭ تومەندەۋىنە تاۋەلدەنبەي-اق، ٴوندىرىس ونىمدەرىنىڭ كولەمىن 2 ترلن. تەڭگەگە دەيىن كوتەرۋ مۇمكىندىگى ايتىلعان. وسى رەتتە ٴبىز ەل ۇكىمەتىنە ٴوز ۇسىنىسىمىزدى بىلدىرە كەتكەندى ٴجون سانادىق.
الداعى ٴوندىرىس سالاسىنىڭ ٴوسىمىن ەسەلەي ٴتۇسۋ ٴۇشىن ونىڭ جالعىز عانا ٴتيىمدى جانە ٴبىرىڭعاي جولى جارعىلىق كاپيتالى بويىنشا مەملەكەتتىك نەمەسە «سامۇرىق-قازىنا»-نىڭ كومپانيالار توبىنىڭ قاتىسۋىمەن كاسىپورىندار ٴۇشىن ساتىپ الۋ مەرزىمىن ۇزاقمەرزىمدى نەمەسە ٴۇش جىلدان كەم ەمەس مەرزىمگە دەيىن ۇزارتۋ تەتىگى بولۋى مۇمكىن. بۇل بارلىق قاتىسۋشىلار ٴۇشىن وندىرىستىك سالالارداعى جوسپارلاردى ٴتيىمدى قۇرۋ مەن قىزمەت كورسەتۋ ساپاسىن ارتتىرىپ، وپەراسيالىق شىعىنداردى ازايتادى جانە بيۋروكراتيالىق كەدەرگىلەردى جويادى. مىسالى، تۇتىنۋشىلار ٴۇشىن مۇنداي مۇمكىندىك ساتىپ الۋدى جۇزەگە اسىرۋ ٴۇشىن جىل سايىنعى كورپوراتيۆتىك شەشىمدەر قابىلداۋ ٴىسىن جەڭىلدەتىپ، ال وندىرۋشىلەر ٴۇشىن بۇل جاڭالىق الداعى بىرنەشە جىلعا وندىرىستىك جوسپار قۇرۋىنا جانە سول بويىنشا قارقىندى جۇمىس ىستەۋىنە مول مۇمكىندىك بەرەدى. وسى ماسەلەگە قاتىستى ٴبىز ۇكىمەت باسشىسىنان اتقارۋشى ورگاندار مەن «سامۇرىق-قازىنا» قورىنا ناقتى تاپسىرمالار بەرۋدى سۇرايمىز. اتاپ ايتقاندا، وتاندىق كومپانيالارمەن تاۋار جەتكىزۋ مەن قىزمەت كورسەتۋ ىسىندە ۇزاقمەرزىمدى كەلىسىمشارتتار جاساۋدىڭ جوباسى مەن ونىڭ تەتىكتەرىن جانە نەگىزىن ايقىندايتىن قۇجات ازىرلەنسە قۇبا-قۇپ بولۋشى ەدى. سونىمەن قاتار، «سامۇرىق-قازىنا» قورىنىڭ كومپانيالارى اراسىنداعى ۇزاقمەرزىمدى ماقسات-مىندەتتەر مەن قىسقا جانە ۇزاقمەرزىمدى كەلىسىمشارتتار جاساۋ مەن جوسپارلاردى بولىسۋگە قولجەتىمدىلىكتى قامتاماسىز ەتۋگە قاتىستى ناقتى ۇسىنىستار ازىرلەۋدى تاپسىرسا دەگەن ويىمىزدى بىلدىرەمىز، - دەدى دەپۋتات.
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!