ٴرۋبلدىڭ قۇنسىزدانۋى وندىرىسىمىزگە ٴقاۋىپ توندىرۋدە - ن. التايەۆ

استانا. 16 قاڭتار. baq.kz – رەسەيدە بولىپ جاتقان ٴرۋبلدىڭ قۇنسىزدانۋىنان ەلىمىزگە ارزان باعاداعى تاۋارلار لەگى اعىلۋدا. بۇل ٴوز كەزەگىندە وتاندىق تاۋار ونىمدەرىنىڭ باسەكەگە قابىلەتتىلىگىن تومەندەتۋدە. سوندىقتان ۇكىمەتكە ارنايى ۇسىنىس جولداپ وتىرمىز دەيدى قر ۇكپ باسقارما ٴتوراعاسىنىڭ ورىنباسارى نۇرجان التايەۆ. بۇل تۋرالى كاسىپكەرلىك زاڭناماسىن ٴتۇسىندىرۋ نەگىزىندە وتكەن قر پرەزيدەنتى جانىنداعى وكق بريفينگىسىندە ايتىلدى.
 

 -ەۋرازيالىق وداق كەلىسىمى كاسىپكەرلىك ٴۇشىن، بيزنەس ٴۇشىن وتە ۇلكەن مۇمكىندىك. ويتكەنى ەلىمىزدەگى 17 ميلليون حالىقىمىز عانا بار نارىعىمىز كىشكەنتاي. حالىق سانى باسىم رەسەي، بەلورۋسسيا ەلدەرى ۇلكەن مۇمكىندىك. ٴبىراق رەسەيدە بولىپ جاتقان جاعداي، ٴرۋبلدىڭ قۇنسىزدانۋىنان ٴقازىر بىزگە تومەن باعالارمەن تاۋارلار قاپتاپ كەتتى. بۇل وندىرىسكە ٴقاۋىپ ٴتوندىرىپ تۇر. سوندىقتان مەملەكەتتىك ورگاندارعا ۇسىنىس جولداپ وتىرمىز. رەسەي وزگە ەلدەردەن كەلەتىن تاۋارلارعا كوبىنە شەكتەۋ قويىپ وتىرادى. سول ٴتارىزدى ٴبىزدىڭ تاراپىمىزدان دا ٴىس-شارالار قابىلدانۋى كەرەك. تاۋارلار رەسەيدىڭ ارزان ونىمدەرىنىڭ كەسىرىنەن باسەكەگە تۇسپەي قالدى. داعدارىس شاراسى بويىنشا ٴىس-شارالار قابىلدانىپ جاتىر. جاقىن ارادا ارنايى شەشىم شىعارادى دەگەن ۇمىتتەمىز،-دەيدى باسقارما ٴتوراعاسىنىڭ ورىنباسارى.
ونىڭ ايتۋىنشا ٴبىرقاتار تۇزەتۋلەر ەنگىزىلگەن كاسىپكەرلىك تۋرالى زاڭدى كوپشىلىك  جاقسى قابىلداعان.
-2014 جىلى موراتوريي جاريالانىپ، كاسىپكەرلەرگە جاقسى جاعىنان وزگەرىستەر اكەلدى. ٴونىم كولەمى ارتىپ، شاعىن جانە ورتا بيزنەس سالاسىنداعىلاردىڭ سانى ٴوستى. 2015 جىلى نە بولاتىنى وسى زاڭ ىشىندە ايتىلىپ وتىر. تەكسەرۋ كاتەگورياسىنا بايلانىستى كاسىپكەرلەر ٴتورت توپقا ٴبولىنىپ وتىر،-دەپ اتاپ ٴوتتى.

ايا ٴومىرتاي،

سۋرەتتى تۇسىرگەن - عابيت ماداليەۆ

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!