وتكەن جىلى ەلىمىزدە ينفلياسيا كورسەتكىشى 7،4%-دى قۇرادى

استانا. 5 قاڭتار. baq.kz - وتكەن جىل ٴۇشىن ازىق-تۇلىك تاۋارلارى باعاسى 8%، ازىق-تۇلىك ەمەس تاۋارلارعا 7،8%، اقىلى قىزمەتتەرگە 6،4%-عا ٴوستى. اعىمداعى جىلعى جەلتوقساندا ينفلياسيا 0،5% دەڭگەيدە قالىپتاستى، - دەپ حابارلايدى ستاتيستيكا كوميتەتىنىڭ ٴباسپاسوز قىزمەتى.

وتكەن ايدا رەسپۋبليكا بويىنشا ورتاشا باعا ٴوسىمى جاڭا جينالعان كوكونىستەرگە 11،9%، قاراقۇمىق جارماعا – 10،5%، كارتوپقا – 6،6%، جۇمىرتقاعا – 2،9%، جۇزىمگە – 2،7%، شيكى سۇتكە – 2،6%، ۇنتاق جارماعا، مايەكتى ىرىمشىككە – 1،9%-دان، شوشقا ەتىنە – 1،6%، المۇرتقا – 1،5%، سوككە – 1،4%، ٴبىرىنشى سورتتى بيداي ۇنىنان پىسىرىلگەن نانعا – 1،3%، بالىق جانە تەڭىز ونىمدەرىنە – 1،1%، ارپا جارماعا، شۇجىق، ەت ونىمدەرىنە، سۇزبەگە، كۇنباعىس مايىنا – 0،9%-دان، قىشقىل ٴسۇت ونىمدەرىنە – 0،7%، سارى مايعا – 0،6%، كەسپەگە، پاستەرلەنگەن سۇتكە – 0،5%-دان بەلگىلەندى. باعانىڭ تومەندەۋى ليمونعا 8،6%، تاۋىقتىڭ سيراعىنا – 1،8%، تاۋىققا – 1،1%، قانتقا – 0،6%-عا، قوي ەتىنە، بانانعا – 0،5%-دان تىركەلدى. باعا ٴوسىمى قاتتى وتىنعا، جۋعىش جانە تازالاعىش قۇرالدارعا، فارماسەۆتيكالىق ونىمدەرگە، جەكە پايدالانۋعا ارنالعان تاۋارلارعا 1،2%-دان، گازەتتەر جانە مەرزىمدىك باسىلىمدارعا – 1،1%، كيىم جانە اياق كيىمدەرگە – 1%، تۇرمىستىق اسپاپتارعا – 0،5% قۇرادى. باعالار اي-92 ماركالى بەنزينگە 10،2%، ديزەل وتىنىنا – 4،7%-عا تومەندەدى. شاشتارازدار مەن جەكە قىزمەت كورسەتۋ ورىندارى قىزمەتتەرىنىڭ باعالارى 1،5%، ىشكى قالالىق قاتىناستارداعى اۆتوبۋسپەن جول ٴجۇرۋ اقىسى – 1%، مەيرامحانالار مەن قوناق ۇيلەرگە – 0،9%، دەمالىس، ويىن-ساۋىق جانە مادەنيەت سالاسىنداعى قىزمەتتەرگە – 0،5%-عا ٴوستى. تۇرعىن ۇي-كوممۋنالدى قىزمەتتەر سالاسىندا تاريفتەر تۇرعىن ٴۇيدى كۇتىپ ۇستاۋعا 0،3%، ال ونى جالعا بەرۋ 0،7%-عا جوعارىلادى. ينفلياسيا دەڭگەيىن سيپاتتايتىن تۇتىنۋ باعاسىنىڭ يندەكسى حالىقتىڭ جەكە تۇتىنۋ ٴۇشىن ساتىپ الاتىن تاۋارلارى مەن قىزمەتتەرى باعاسىنىڭ وزگەرۋىن كورسەتەدى. تاۋارلار مەن قىزمەتتەر جيىنتىعىنا 508 پوزيسيا كىرەدى. باعانى تىركەۋ مەنشىكتىڭ ٴتۇرلى نىساندارىنداعى ساۋدا جانە قىزمەت كورسەتۋ سالاسى كاسىپورىندارىنىڭ ىرىكتەمە جۇيەسى بويىنشا بارلىق وبلىس ورتالىقتارىندا، استانادا جانە قالالار مەن اۋدان ورتالىقتارىنىڭ بەلگىلەنگەن شەڭبەرى بويىنشا جۇرگىزىلەدى. بىرىكتىرۋ ٴۇشىن پايدالانىلاتىن سالماق جۇيەسى ولاردىڭ شىعىستارى بولىگىندە وتكەن جىلعى ٴۇي شارۋاشىلىقتارىن زەرتتەۋ ماتەريالدارى نەگىزىندە ەسەپتەلەدى. 2014 جىلعى قاڭتاردان باستاپ تبي–ٴدى ەسەپتەگەندە ازىق–تۇلىك تاۋارلارىنىڭ ۇلەسى 37%، ازىق–تۇلىك ەمەس تاۋارلار 32%، اقىلى قىزمەتتەر 31%–دى قۇرادى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!