وڭتۇستىك قازاقستان وبلىسىندا وندىرىلەتىن اۋىلشارۋاشىلىعى ونىمدەرىنىڭ كولەمى ورتا ەسەپپەن حالىقتىڭ ٴبىر جىلعى قاجەتتىلىگىنەن اسىپ كەتتى. بۇل كورسەتكىش كوكونىستەن 4، جۇزىمنەن 3 ەسە ارتىق. وبلىس تۇرعىندارى جەمىس-جيدەكپەن 81 پايىز ارتىق قامتاماسىز ەتىلگەن. ايتالىق، بىلتىر 29،7 مىڭ گەكتار جەرگە كوكونىس ەگىلگەن بولاتىن. سودان 633 مىڭ توننا ٴونىم جينالدى. سونىڭ 490 مىڭ تونناسى رەسپۋبليكانىڭ باسقا ايماقتارىندا ساتىلدى. بيىلعى كوكونىس ەگىلگەن القاپ بىلتىرعىدان دا كوپ، سوندىقتان جينالاتىن ٴونىم دە مول بولادى دەپ كۇتىلۋدە.
اۋىلشارۋاشىلىعى ٴوندىرىسى ماۋسىمدىق. ونى ۋاقتىسىندا ساتپاساڭ، بۇلىنەدى. ۇزاعىراق ساقتايتىن جان-جاقتى جاعدايى جاسالعان قويمالار تاپشى بولىپ كەلدى. سوندىقتان رەسپۋبليكانىڭ، وبلىستىڭ تۇرعىندارى كوكونىسپەن جىل بويى، اسىرەسە، كۇز-قىس ايلارىندا، قامتاماسىز ەتىلمەي كەلدى. قولدا بار كوكونىس پەن جەمىس-جيدەك ساقتايتىن قويمالاردىڭ 18،4 پايىزى ۋاقىتشا ىستەمەي تۇردى. بۇل كوكونىس پەن جەمىس-جيدەكتىڭ 75-80 پايىزعا جۋىعىن كورشى مەملەكەتتەردەن الىپ كەلۋگە ٴماجبۇر ەتتى. وڭتۇستىك قازاقستاندا وسى ماسەلەنى تۇبەگەيلى شەشۋگە دەگەن وڭ قادام بار. وبلىس اكىمى اسقار مىرزاحمەتوۆتىڭ تاپسىرماسىنا سايكەس 2009-2011 جىلدارى وسى تاۋەلدىلىكتەن ايىرىلۋ ٴۇشىن ايماقتىق باعدارلاما دايىندالعان بولاتىن. باعدارلامادا اۋىل شارۋاشىلىعى ونىمدەرىن ساقتايتىن قويمالار سالۋ مەن ولاردى پايدالانۋعا باسا نازار اۋدارىلعان.
ٴاربىر اۋدان مەن قالا حالقىنىڭ قاجەتتىلىكتەرى ٴار قيلى. مۇمكىندىكتەرى دە باسقاشا. وسىنى ەسكەرە وتىرىپ، 2011 جىلى كوكونىس-جەمىس ساقتاۋعا ارنالعان جالپى سىيىمدىلىعى 150 مىڭ توننا قويما سالۋى كەرەك بولاتىن. تاپسىرما وسىلاي. بۇگىنگى تاڭعا وبلىستا قويمالاردىڭ جالپى سىيىمدىلىعى 77 مىڭ تونناعا جەتتى. ىسكە تولىق دايىنى - 30،2 مىڭ توننا. الداعى 1-2 ايدا ىسكە سىيىمدىلىعى 32،6 مىڭ توننا قويمالار ىسكە قوسىلماقشى. وبلىستىق اۋىل شارۋاشىلىعى باسقارماسىنىڭ ماماندارى وسىنداي مالىمەت بەردى.
وبلىستا 2،5 ميلليوننان استام ادام بار. ولار ٴۇشىن جارتى جىلدا 71،2 مىڭ توننا كوكونىس، 89،6 مىڭ توننا كارتوپ، 17،2 مىڭ توننا الما ساقتالادى. وسىلاي ەسەپتەگەندە وبلىستا قويمالاردىڭ سىيىمدىلىعى 180 مىڭ تونناعا جەتۋى كەرەك دەگەن ەسەپ-قيساپ جاسالىپ جاتىر. ٴقازىر وبلىستا مىناداي دا ەسەپ بار. وبلىستىڭ ىشكى مۇقتاجدىعىن قاناعاتتاندىرۋ ٴۇشىن بيىلعى ونىمنەن 30 مىڭ توننا كارتوپ، 10 مىڭ توننا پياز، 9 مىڭ توننا ٴسابىز، 10 مىڭ توننا قىرىققابات، 10 مىڭ توننا الما مىندەتتى تۇردە ساقتالۋعا ٴتيىس. جالپى، كوكونىس، جەمىس-جيدەك ونىمدەرىنىڭ باعاسىن تۇراقتاندىرۋ ماقساتىندا، «وڭتۇستىك» ۇلتتىق الەۋمەتتىك كاسىپكەرلىك كومپانياسى مەن باسقا دا قىزىعۋشىلىق تانىتقان مەكەمەلەردىڭ ۇسىنىستارى نەگىزىندە تاۋاروندىرۋشىلەردى قولداۋ ماقساتىندا ٴتيىمدى مەحانيزمدەر جاسالدى.
وبلىستا ازىق-تۇلىك تاۋارلارىنىڭ الەۋمەتتىك ماڭىزى زور 14 ٴتۇرى وندىرىلەدى. ۇن، جۇمىرتقا جانە قۇس ەتىنەن باسقا ازىق-تۇلىكپەن وبلىس ٴوزىن-وزى تولىق قامتاماسىز ەتە الادى جانە ارتىعىن رەسپۋبليكانىڭ وزگە وڭىرلەرىنە جونەلتەدى. ايتالىق، وسى جولدار جازىلىپ جاتقاندا شىمكەنت قالاسىنداعى «استار» ىقشاماۋدانىنداعى جىلىجايلاردا وسىرىلگەن قىزاناق پەن قياردىڭ 100 توننادان استامى تيەلگەن اۆتوكەرۋەن استاناعا قاراي جول تارتتى.
قۋاندىق ورازبەك ۇلى
وڭتۇستىك قازاقستان وبلىسى
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
استانا: 
602 
0
5010
0 
