مۇنايدىڭ قۇنىنا بيدايدىڭ باعاسى تاۋەلدى مە؟

استانا. 13 ناۋرىز. baq.kz – بۇگىن ورتالىق كوممۋنيكاسيالار قىزمەتىنىڭ الاڭىندا وتكەن ٴباسپاسوز ٴماسليحاتىنا قاتىسقان پارلامەنت ٴماجىلىسىنىڭ دەپۋتاتى، اگرارلى ماسەلەلەر جونىندەگى كوميتەت مۇشەسى تولەگەن ىبىرايەۆ پەن راۋان شاەكينگە الەمدىك نارىقتاعى مۇناي باعاسىنىڭ قۇبىلۋى، قازاقستان ەكسپورتتايتىن بيداي باعاسىنا قانداي دا ٴبىر اسەرى تيە مە دەگەن ساۋال قويعان بولاتىنبىز. جاۋاپ بەرۋ بارىسىندا قوس دەپۋتات تا، بۇل ماسەلەدە قازاقستاننىڭ قانداي دا ٴبىر قيىندىققا ۇشىراۋى مۇمكىن ەمەستىگن مالىمدەدى، - دەپ حابارلايدى baq.kz ٴتىلشىسى.

- ەلباسىنىڭ ٴوزى بيداي ساۋداسى ماسەلەسىندە ەكسپورتقا شيكى بيدايدى عانا ەمەس، ونى وڭدەۋ ارقىلى وزگە ونىمدەر تۇرىندە ساۋدالاۋ قاجەتتىگىن ۇنەمى ايتىپ كەلەدى. ويتكەنى، وسى ارقىلى ساتاتىن ونىمدەرىمىزدىڭ قوسىمشا باعاسى دا وسەتىنى بەلگىلى. ال ەندى وسى ەكسپورت الەۋەتىن ارتتىرۋ ماقساتىندا ازيا ەلدەرىندە تەمىر جول مەن كاسپيي تەڭىزىنىڭ جاعالاۋىنان ارنايى پورتتاردىڭ سالىنۋى، وسىعان قاتىستى قىزمەت ٴتۇرىن جانداندىرا تۇسەتىنى ٴسوزسىز. سونىمەن قاتار، «باتىس ەۋروپا – باتىس قىتاي» اۆتوجولى دا بيداي ەكسپورتىنا وزىندىك ۇلەسىن قوسادى دەپ ويلامايمىن. سوندىقتان دا قازاقستاننىڭ كەلەشەكتەگى بيداي ساۋدالاۋى دامي تۇسەتىندىگىنە سەنىمدىمىن. ال ەندى الەمدىك نارىقتاعى مۇناي مەن جانارماي باعاسىنىڭ بىردە كوتەرىلىپ، بىردە قۇلدىراۋى ومىرىمىزدەگى ۇيرەنشىكتى جاعدايعا اينالۋى كەرەك. ياعني، مۇناي باعاسىنىڭ تومەندەۋىنەن استىق پەن ونىڭ ونىمدەرىنىڭ دە قۇنى تومەندەيتىندىگى لوگيكالىق تۇرعىدان ورىندى ماسەلە. بۇل ەندى ٴبىزدىڭ سىرتقى نارىقتان كەلەر قارجى كولەمىن قىسقارتۋى مۇمكىن. ٴبىراق، ىشكى نارىقتا بيداي مەن ۇن ونىمدەرىنە قاتىستى قولجەتىمدىلىك ورنايتىندىعىن دا ۇمىت قالدىرۋعا بولمايدى. ياعني، كەز-كەلگەن ماسەلەنى ەكى جاعىنان قاراپ تارازىلاۋ كەرەك، - دەدى تولەگەن توقتاسىن ۇلى.

سونىمەن قاتار، دەپۋتات راۋان شاەكين دە اتالعان ماسەلەگە قاتىستى ٴوز ويىمەن ٴبولىستى.

- ٴقازىر دۇنيەجۇزىلىك نارىقتاعى مۇناي باعاسى 105 دوللاردان 45 دوللارعا دەيىن ٴتۇستى. بۇل ارينە، بۇگىنگى تاڭداعى بيداي باعاسىنا وزىندىك اسەرىن تيگىزدى. مىسالى، 2010-2011 جىلدارى الەمدىك نارىقتاعى بيداي باعاسىنىڭ تونناسى 340-350 دوللار شاماسىندا ساۋدالانعان بولسا، سوڭعى ەكى جىلدىقتاعى بۇل كورسەتكىش 250 دوللارعا دەيىن تومەندەدى. ٴبىراق، بۇل بيداي ەكسپورتتايتىن قازاقستان ٴۇشىن قانداي دا ٴبىر قيىندىق تۋدىرادى دەپ الاڭداۋعا ەش نەگىز جوق. ويتكەنى، ٴبىزدىڭ ەلدەگى ىشكى سۇرانىسىمىزدىڭ ٴوزى 8 ملن توننا بيداي بولسا، ەكسپورتقا شىعاراتىنىمىز 5-6 ملن توننانى قۇرايدى. بۇگىنگى تاڭدا ٴبىز وسى كولەمدەگى وتاندىق بيدايدى 250 دوللار شاماسىندا ساۋدالاپ جاتساق تا، ۇتىلاتىن ەشتەڭەمىز جوق دەۋگە ابدەن بولادى، - دەدى دەپۋتات راۋان ميحايل ۇلى.

نۇرلىبەك دوسىباي،
سۋرەتتى تۇسىرگەن – عابيت ماداليەۆ
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!