ليانيۋنگان تەڭىز پورتىنان شىققان تۇراقتى كونتەينەرلىك پويىز الماتىعا كەلدى

استانا. 29 ناۋرىز. baq.kz - بۇگىن كەزەكتى ليانيۋنگان –الماتى كونتەينەرلىك پويىزىن كۇتىپ الۋ سالتاناتى وتكىزىلدى. سالتاناتتى شاراعا ليانيۋنگان (قحر) پارتيا كوميتەتىنىڭ حاتشىسى يان سينشي باستاعان دەلەگاسيا كەلدى دەپ حابارلايدى «قتج» ۇك» اق ٴباسپاسوز قىزمەتى. 

بۇعان دەيىن بەلگىلى بولعانداي، ليانيۋنگان –الماتى باعدارىنداعى تۇراقتى كونتەينەرلىك پويىز سزيانسۋ پروۆينسياسىنان بيىلعى جىلعى اقپاننىڭ 25-ىنەن باستاپ شىعا باستاعان بولاتىن. جوبانى ىسكە قوسۋعا ەكى ەلدىڭ مەملەكەت باسشىلارى نۇرسۇلتان نازاربايەۆ پەن سي سزينپين قاتىسسا، ونىڭ دەلەگاسياسى قۇرامىندا «قتج» ۇك» اق باسشىسى اسقار مامين دە بولدى.

اتالمىش مەرزىمدە وسى باعدارمەن جيىرمادان استام كونتەينەرلىك پويىز ەكسپورتتىق جانە ترانزيتتىك جۇكتەرمەن وتكىزىلدى. جۇكتەردىڭ قاتارىندا قۇرىلىس ماتەريالدارى، ازىق-تۇلىك، ەلەكترونيكا، حيميالىق ونىمدەر بار.

قازاقستان ٴۇشىن ليانيۋنگان پورتى ەلدىڭ ترانزيتتىك كولىكتىك الەۋەتىن ٴتيىمدى دامىتاتىن شەتەلدەگى ستراتەگيالىق جەلىنىڭ ٴبىرى بولىپ تابىلادى.

بۇل جوبا «قازاقستان –جاڭا جىبەك جولى» باعدارلاماسى مەن «نۇرلى جول» جاڭا ەكونوميكالىق ساياساتىنىڭ ٴبىر بولشەگى بولىپ سانالادى.

بيىلعى جىلى ساۋىردە بىرلەسكەن ليانيۋنگان پورتىنان الماتى باعدارىنا اپتاسىنا ٴۇش كونتەينەرلىك پويىز شىعارۋ كوزدەلىپ وتىر. 2015 جىلدىڭ اياعىنا دەيىن ليانيۋنگان-الماتى كونتەينەرلىك پويىزى جۇزەگە جەتەدى دەگەن بولجام بار.

قازاقستان مەن قىتاي تەمىرجولشىلارى قوسىمشا جۇك اعىندارىن تارتۋ مەن تاسىمال كولەمىن ارتتىرۋ ماقساتىندا ٴبىر رەتتىك تەمىرجول تاريفى جەڭىلدىگىن ۇسىنباق. بولاشاقتا كونتەينەرلىك پويىزدار اياسى كەڭەيىپ ورتالىق ازيا ەلدەرى مەن كاۆكاز، تۇركيا، يران، وڭتۇستىك ەۋروپا ەلدەرىنە قازاقستان اۋماعى ارقىلى ترانزيتتىك تاسىمالدى ۇلعايتاتىن بولادى. 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!