استانا: 
557 
0
كيەلى اۋليەاتا وڭىرىندە تۋريستەردى تارتاتىنداي كەرەمەت جەرلەر جەتەرلىك. عاسىرلار قويناۋىنان سىر شەرتەتىن ايشا ٴبيبى كەسەنەسى، قاراحان، اقىرتاس كەشەندەرى — بارلىعى دا تاريحتىڭ سان قاتپارىنان سىر تارتۋعا قۇمار جانداردى تارتىپ تۇرادى. ٴبىراق وڭىردە وسى ۋاقىتقا دەيىن تۋريستەرگە جايلى جاعداي جاسالماي-اق كەلگەن-تىن.
قازاقستان تۋريستىك اسسوسياسياسى جامبىل وبلىسىندا تۋريستىك كلاستەردى دامىتۋ ماقساتىندا 2011-2014 جىلدارعا ارنالعان جوبا دايىنداعان بولاتىن. وسى جوبا اياسىندا وڭىرلىك برەندتەردىڭ ٴتىزىمى جاسالىپ، سول بويىنشا جۇمىستار اتقارىلۋدا. «قورعاندار جانە بالبالدار»، «تولە بي مەن ب.مومىش ۇلىنىڭ تۋعان جەرى»، «تارازدىڭ مەشىتتەرى مەن كەسەنەلەرى»، «جىبەك جولى قالاشىعى»، «قىزعالداقتىڭ 19 ٴتۇرى» اتتى باعدارلامالار جاسالدى. اسسوسياسيا ماماندارىنىڭ زەرتتەۋىنشە، شەتەلدىك تۋريستەر بار جاعدايى جاسالعان ەۋروپالىق ستيلدەگى قوناقۇيلەردەن گورى، وزدەرىنە ەكزوتيكالىق كورىنەتىن كادىمگى قازاقى كيىز ۇيدە تۇرعاندى ۇناتادى ەكەن. سوندىقتان دا تابيعاتى تۇنىپ تۇرعان اۋىلدىق جەرلەردە كيىز ٴۇي وتەلدەرىن سالۋ جوسپاردا بار. ەلىمىزدە ٴدال وسىنداي كيىز ٴۇي-قوناقۇيلەردىڭ ٴ88-ى بار ەكەن. تۋريستەر وسى كەشەندەرگە توقتاپ، ۇلتتىق تاعامداردان ٴدام اۋىز ٴتيىپ، سالت-داستۇرمەن تانىسا الادى. ٴارى اۋىلدىقتاردىڭ دا تابىس كوزىن تاۋىپ، وسى بيزنەس تۇرىنەن جىلىنا ميلليون تەڭگەدەن اسا پايدا تابۋىنا جول اشىلماق. وعان وبلىس اكىمى قانات بوزىمبايەۆتىڭ ٴوزى قولداۋ كورسەتپەك. «تۋريستەردى تارتاتىن وسىنداي نىساندار سالۋعا بەيىلدى ادامدارعا قارجى ٴبولۋدى اكىمشىلىك ٴوز موينىنا الادى. تۋريستىك كلاستەردى دامىتۋعا اتسالىسامىن دەگەن ازاماتتارعا جەڭىلدىكپەن جىلىنا 7 پايىزبەن نەسيە بەرۋگە دايىنبىز»، – دەدى وبلىس باسشىسى.
راشيدا شايكەنوۆا، قازاقستان تۋريستىك اسسوسياسياسىنىڭ ديرەكتورى:
– ەلىمىزدەگى تۋريستىك فيرمالار تاراز تۋرالى تىم از بىلەدى. سوندىقتان دا كيەلى ٴوڭىردى ناسيحاتتاۋدى بارىنشا كەڭەيتۋىمىز قاجەت. وسى وڭىردە الەمدە تەڭدەسى جوق قىزعالداقتىڭ سيرەك ٴتۇرى وسەدى. جايساڭ القابىندا بالبال تاستاردىڭ بار ەكەنىنەن دە كوپشىلىك حابارسىز. قىزعالداق فەستيۆالىن وتكىزىپ، كوشپەندىلەردىڭ ىزىمەن ساياحات ۇيىمداستىرۋىمىز كەرەك. اۋليەاتا ٴوڭىرى ەلىمىزدەگى تۋريستەر ەڭ از اياق باساتىن 16 ايماقتىڭ ىشىندە 11-ورىندا تۇر. كاسىبي اۋدارماشى ماماندار جوق، ناسيحات كەمشىن. باستى ماقساتىمىز – الداعى ۋاقىتتا جامبىل ٴوڭىرىن، جوباعا ساي، تۋريستەر ەڭ كوپ كەلەتىن ايماققا اينالدىرۋ.
اۆتور: گۇلجان كوشەروۆا
http://alashainasy.kz/economica/25945/
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5013
0