كەدەن وداعىنا قوسىلعان ٴۇش مەملەكەتتىڭ كەلىسىمىمەن 1 شىلدەگە دەيىن اۆتوكولىكتەردى جەڭىلدەتىلگەن باج سالىعى بويىنشا كەدەندىك راسىمدەۋ مەرزىمى اياقتالدى.
5015
0 
استانا: 
653 
0
كەدەن وداعىنا قوسىلعان ٴۇش مەملەكەتتىڭ كەلىسىمىمەن 1 شىلدەگە دەيىن اۆتوكولىكتەردى جەڭىلدەتىلگەن باج سالىعى بويىنشا كەدەندىك راسىمدەۋ مەرزىمى اياقتالدى.
الايدا كەيبىر قازاقستاندىق ازاماتتار كولىك تاسىمالداۋشى كومپانيالاردىڭ ٴوزارا كەلىسە الماۋى سالدارىنان وسى جەڭىلدىكتى پايدالانۋعا ۇلگەرمەي، زارداپ شەگىپ وتىرعانىن ايتادى.
ۇكىمەتكە ۇندەۋ
جەڭىلدەتىلگەن باج سالىعىنىڭ مەرزىمى اياقتالاتىن 1 شىلدەگە دەيىن قازاقستان اۋماعىنا كولىگىن جەتكىزە المايتىنا كوزدەرى جەتىپ، تىعىرىققا تىرەلگەن ٴبىر توپ ازاماتتان قۇرالعان باستاماشىل توپ 6 ماۋسىمدا ٴباسپاسوز قۇرالدارى ارقىلى قازاقستان ۇكىمەتىنە ارنايى ۇندەۋ جاساعان ەدى.
97 ادام قول قويعان ۇندەۋدە مىنانداي ٴوتىنىش ايتىلعان: شەتەلدىك كولىك تاسىمالداۋشى كومپانيالاردىڭ كەسىرىنەن قازاقستانعا جەتكىزىلمەي وتىرعان اۆتوكولىكتەردى ەل اۋماعىنا اكەلۋگە كومەكتەسۋ; جەكە تۇلعالار 2010 جىلدىڭ قاراشا ايىنان 2011 جىلدىڭ مامىر ايىنا دەيىنگى ارالىقتا
شەتەلدەن ساتىپ العان كولىكتەردى قولدا بار قۇجاتتارمەن الدىن-الا راسىمدەۋ; ولاردى 2011 جىلدىڭ 1 قىركۇيەگىنە دەيىن جەتكىزۋگە رۇقسات بەرۋ.
باستاماشىل توپ مۇشەسى قايرات تىلەۋبايەۆتىڭ ازاتتىق راديوسى تىلشىسىنە ايتۋىنشا، ۇكىمەتتەن ٴالى رەسمي جاۋاپ كەلمەگەن. تەك قازاقستان سىرتقى ىستەر مينيسترلىگى عانا بىرىككەن اراب امىرلىكتەرى مەن يرانداعى كونسۋلدىقتارى ارقىلى 400-گە جۋىق كولىكتى قازاقستانعا جەتكىزۋگە سەپتەسكەنى تۋرالى 26 ماۋسىمدا حابارلاپتى.
– ال قالعان كولىك يەلەرى نە ىستەۋى كەرەك؟ – دەيدى قايرات تىلەۋبايەۆ. – ٴقازىر يراندا 1 شىلدەگە دەيىن قازاقستانعا جەتىپ ۇلگەرمەگەن 62 اۆتوكولىك، قىتايدا 130 كولىك تۇر، سونداي-اق كاسپيي تەڭىزىندە 97 اۆتوكولىك تيەلگەن پاروم كەلە جاتىر. ول پاروم بۇگىن (ياعني 30 ماۋسىم كۇنى –
رەد.) كەشكى ساعات توعىزدا اقتاۋ پورتىنا جەتۋى ٴتيىس. ٴبىراق تەڭىزدەگى داۋىلعا بايلانىستى جەتە الماۋى دا مۇمكىن.
قايرات تىلەۋبايەۆ يرانداعى كولىكتەرى قيىن جاعدايدا قالىپ تۇرعانىن ايتادى. بىرىككەن اراب امىرلىكتەرىندە تىركەلگەن كومپانيا ولاردان قابىلداپ العان كولىكتەردى يرانعا دەيىن عانا جەتكىزگەن دە، بەرى قاراي اكەلەتىن يراندىق كومپانياعا ٴتيىستى قارجىنى بەرمەي قويعان. ولار «بانكروت بولدىق» دەپ حابار تاراتقانعا ۇقسايدى.
– ٴبىراق ٴبىز ونىڭ الاياقتىق ەكەنىن ٴتۇسىنىپ وتىرمىز. قالاي بولعاندا دا كولىك يەسى – ٴبىز. ولاردىڭ سەرىكتەس كومپانياسىنىڭ الداپ كەتكەنىنە قانداي كىنامىز بار؟ امىرلىكتە تىركەلگەن كومپانيا تولەمەگەن 300 مىڭ اقش دوللارىن بىزدەن نەگە تالاپ ەتەدى؟ – دەيدى قايرات تىلەۋبايەۆ.
قايرات تىلەۋبايەۆ بيىل اقپان ايىندا دۋبايعا بارىپ، 16 مىڭ دوللارعا 2007 جىلعى «توyوتا rاv 4» اۆتوكولىگىن ساتىپ الىپتى. «1 شىلدەگە دەيىنگى تاريف بويىنشا 1500 دوللار شاماسىندا كەدەندىك باج سالىعىن تولەيمىن» دەپ ەسەپتەگەن ەكەن. كەدەن وداعىنا كىرگەننەن كەيىنگى جاڭا تاريف بويىنشا بۇل كولىكتىڭ باج سالىعى 15 مىڭ دوللارعا ٴبىر-اق كوتەرىلگەنىن ايتادى. ال
قوزعالتقىش كۇشى 4 مىڭ شارشى سانتيمەتردەن اساتىن كولىكتەردىڭ باج سالىعى 40 مىڭ دوللارعا دەيىن جەتپەك.
باستاماشىل توپتىڭ تاعى ٴبىر مۇشەسى يسابەك ماحامبەتوۆ تە دۋبايدان 14 مىڭ دوللارعا ساتىپ العان كولىگىنە جەتە الماي وتىرعانداردىڭ ٴبىرى ەكەن. ول كولىگىن ىزدەپ يرانعا بارىپ قايتقانىن، ٴبىراق ونداعى كولىك تاسىمالداۋشى كومپانيا وزىمەن سويلەسۋدەن دە باس تارتقانىن ايتتى. جەكە كاسىپكەرلىكپەن شۇعىلداناتىن يسابەك:
– كەيبىر جۇرت ويلاعانداي الىپساتارلىقپەن شۇعىلدانىپ جۇرگەن جوقپىز. ۇكىمەتتەن جاردەم سۇراۋشىلاردىڭ بارلىعى – جالعىز كولىكتەرىنە قولى جەتپەي وتىرعاندار، – دەيدى.
«كىم كىنالى؟»
باستاماشىل توپ مۇشەلەرىنىڭ ايتۋىنشا، كولىكتەرىن ەلگە اكەلۋدەن كۇدەر ۇزگەن ازاماتتار امالسىزدان كورشىلەس ەلدەرگە، ماسەلەن، قىرعىزستانعا قايتا ەكسپورتتاپ ساتىپ جىبەرمەك بولىپ ٴجۇر. ەندى ٴبىرى ٴوز كولىگىنە شەتەل ازاماتىنان سەنىمحات الىپ، قازاقستانعا سول قۇجاتپەن اكەلمەك.
كەدەندىك باقىلاۋ كوميتەتى ٴباسپاسوز حاتشىسى ەرجان بايتانا ازاتتىق راديوسىنىڭ كولىك ماسەلەسىنە بايلانىستى ساۋالىنا:
– ولاردىڭ كولىكتى اكەلۋگە ەرتەرەك كىرىسپەگەنىنە كىم كىنالى؟ ماۋسىم ايىنان بەرى كەدەن تاۋلىك بويى جۇمىس ىستەدى. ٴتىپتى كەدەن بەكەتتەرىنىڭ وزىندە دە راسىمدەۋگە مۇمكىندىك جاسادىق. ال كەدەن وداعىنىڭ شارتىنا بايلانىستى كولىكتى كورسەتپەي الدىن-الا راسىمدەۋگە رۇقسات ەتىلمەيدى، – دەپ جاۋاپ بەردى.
http://www.azattyq.org/content/kazakhstan_customs_union_and_auto/24252460.html
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
