قىزىلوردانىڭ ينۆەستيسيالىق مۇمكىندىگى ارتىپ كەلەدى

 استانا. 29 ٴساۋىر. baq.kz – «قىزىلوردا وبلىسىنىڭ جاڭا ينۆەستيسيالىق ستراتەگياسى» تاقىرىبىندا v «بايقوڭىر» ينۆەستيسيالىق فورۋمنىڭ پلەنارلىق ٴماجىلىسى ٴوتتى. بۇل باسقوسۋ قىزىلوردا وبلىسىنىڭ ەكونوميكاسىنا وتاندىق جانە شەتەلدىك ينۆەستيسيالار تارتۋ ارقىلى يندۋستريالدى، تۋريستىك جانە اگرارلىق سالالاردى دامىتۋدى كوزدەيدى.

 جيىنعا قىزىلوردا وبلىسىنىڭ اكىمى قىرىمبەك كوشەربايەۆ، قر يندۋستريا جانە جاڭا تەحنولوگيالار ٴمينيسترىنىڭ ورىنباسارى البەرت راۋ، «بايتەرەك» ۇبح» باسقارما ٴتوراعاسى قۋاندىق بىشىمبايەۆ، ەققدب-نىڭ قازاقستانداعى وكىلدىگىنىڭ ديرەكتورى دجانەت حەكمان، رەسەيدىڭ بىلىكتى عالىمى، ەكونوميكا عىلىمدارىنىڭ دوكتورى، پروفەسسور ابەل اگانبەگيان مەن وتاندىق جانە شەتەل ينۆەستورلارى، كاسىپكەرلەر قاتىستى. بۇل جولعى فورۋمعا الەمنىڭ 19 مەملەكەتىنەن قارجى ينستيتۋتارى، بيزنەس وكىلدەرى كەلدى.
الدىمەن ايماق باسشىسى قىرىمبەك كوشەربايەۆ وسىعان دەيىن وتكىزىلگەن ٴتورت فورۋمنىڭ ناتيجەسىن ايتىپ، ٴوڭىردىڭ الەۋمەتتىك-ەكونوميكالىق جاعدايىنا توقتالدى.
- عارىش ايلىعىندا بولىپ، زىمىراننىڭ قالاي ۇشقانىن تاماشالاپ، تۇركىتىلدەس ەلدەردىڭ ٴتاۋ ەتەتىن قورقىت اتا مەموريالدى كەشەنىن كوردىڭىزدەر. بۇل تۋريستىك ارتىقشىلىقتارىمىز. بۇعان دەيىنگى فورۋمداردىڭ ناتيجەسى جامان ەمەس. ينۆەستورلاردىڭ بارلىعى وڭىرگە اعىلماعانىمەن، ايماقتىڭ ارتىقشىلىقتارىنا كوز جەتكىزگەندەر كەلە باستادى. بىزبەن ارىپتەستىك بايلانىستا جۇمىس جاساپ جاتقانداردىڭ قاتارى ارتتى، - دەدى وبلىس اكىمى ق.كوشەربايەۆ.
جالپى، سىر ٴوڭىرى ينۆەستورلار ٴۇشىن قولايلى ايماق. وتكەن جىلى قۇرىلىسى اياقتالعان «بەينەۋ-بوزوي-شىمكەنت» ماگيسترالدىڭ جانە «باتىس ەۋروپا – باتىس قىتاي» ٴاۆتودالىزدىڭ بويىندا وبلىس حالقىنىڭ 93 پايىز تۇرعىنى تۇرادى. توعىز جولدىڭ تورابىنداعى ايماقتا ينۆەستورلار ٴۇشىن بار جاعداي جاسالعان.
قر يندۋستريا جانە جاڭا تەحنولوگيالار ٴمينيسترىنىڭ ورىنباسارى البەرت راۋ يندۋستريالاندىرۋ باعدارلاماسىنىڭ ورىندالۋىنا توقتالدى.
– وسىدان 5-6 جىل بۇرىنعى جاعدايمەن قازىرگىنى سالىستىرۋعا بولمايدى. باعدارلامانىڭ ٴبىرىنشى بەس جىلدىعى داعدارىسقا سايكەس كەلگەنىمەن، ناتيجەلى جۇزەگە استى. قىزىلوردا مەتاللۋرگيا سالاسىن دامىتۋدى قولعا الىپ وتىر. بۇل باعىتتاعى جۇمىستارعا كىرىسىپ تە كەتتى. وڭىردە ٴوندىرىستى وركەندەتۋگە مۇمكىندىك مول. مۇندا جەر استى قازبا بايلىقتارى دا جەتكىلىكتى، - دەدى البەرت راۋ.
قىزىلوردا وبلىسى ەۋروپالىق قايتا قۇرۋ جانە دامۋ بانكىمەن (ەققدب) جالپى قۇنى 63 ميلليارد تەڭگەنى قۇرايتىن 8 جوبانى جۇزەگە اسىرۋدا. بۇل باعىتتاعى جۇمىستاردىڭ الداعى ۋاقىتتا دا جالعاساتىنىن ەققدب-نىڭ قازاقستانداعى وكىلدىگىنىڭ ديرەكتورى دجانەت حەكمان اتاپ ٴوتتى.

ايا ٴومىرتاي

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!