«قازسات-2» يننوۆاسيا سالاسىنا سەرپىن بەرسە يگى بولار ەدى...

وسىناۋ سالتاناتتى شارانى ۇكىمەت باسشىسى كارىم ٴماسىموۆ جانە قازاقستان مەن رەسەي ۇلتتىق عارىش ۆەدومستۆولارىنىڭ باسشىلارى تالعات مۇسابايەۆ پەن ۆلاديمير پوپوۆكين باستاعان دەلەگاسيا ۇشىرۋ الاڭىندا تاماشالادى. ال قالىڭ ٴجۇرتشىلىق «ٴقازسات-2-نىڭ» عارىشقا سامعاۋ بارىسىن العاش رەت «twitter» الەۋمەتتىك جەلىسى ارقىلى ون-لاين رەجيمدە باقىلادى. ۇلتتىق جەرسەرىكتىڭ كوككە كوتەرىلۋى تۋرالى جازباسىندا ۇكىمەت باسشىسى : «سپۋتنيك ويداعىداي ۇشىرىلدى. قايىرلى تاڭ، ەل! بارلىعىڭا تاماشا دەمالىس كۇندەرىن جانە «ٴقازسات-2-نىڭ» ۇزاق جىل ۇشۋىن تىلەيمىن»، - دەپ جازدى. كەيىن «160 سەكۋند. ۇشۋ وداعىداي وتۋدە» دەپ قوستى. جالپى بايقوڭىردان عارىشتى بەتكە الىپ كوتەرىلگەن «پروتون-م»  ٴوز ساپارىنىڭ ٴ600-شى سەكۋندىندا وربيتالدى بلوك  زىمىران تاسىعىشىنىڭ  ٴۇشىنشى ساتىسىنان   شتاتتىق رەجيمدە  اجىرادى. ۇلتتىق  عارىش  اگەنتتىگىنىڭ ٴتوراعاسى تالعات  مۇسابايەۆتىڭ  حابارلاۋىنشا، وربيتاعا جەتكىزىلگەن  قازاقستاندىق جەر سەرىگىمەن جۇمىس  شتاتتىق رەجيمدە  جۇرگىزىلۋدە.  عارىش اپپاراتى ٴبىر ايدىڭ ىشىندە  شىعىس بويلىق  بويىنشا عارىش كەڭىستىگىن كەزە ٴجۇرىپ 86،5  گرادۋستىق ٴوز وربيتالدىق نۇكتەسىنە جەتۋى ٴتيىس.  سودان كەيىن بارىپ اپپارات جۇيەسى  ەكى اي  بويىنا  سىناقتان   وتكىزىلەدى. ال 2011جىلدىڭ قازان ايىندا رەسەيلىك ماماندار قازاقستاندىق جەرسەرىكتى قازاقستاننىڭ  عارىش بايلانىسى  رەسپۋبليكالىق  ورتالىعىنىڭ ماماندارىنا  تاپسىراتىن بولادى.  

ەسكە سالا كەتەيىك، بۇعان دەيىن عارىشقا ۇشىرىلعان قازاقستاندىق تۇڭعىش جەر سەرىگى - «قازسات-1» جەر سەرىگىنىڭ جولى بولماعان ەدى. ٴتۇرلى سەبەپتەرمەن عارىشتى كەزىپ، حابارسىز كەتكەن جەر سەرىگىنىڭ كەمشىلىكتەرى ەكىنشى سپۋتنيك - «ٴقازسات-2-نى» ازىرلەۋ بارىسىندا بارىنشا ەسكەرىلدى. سوندىقتان دا، 2006 جىلى «قازسات-2» كەلىسىمىنە قول قويىلىپ، ونى يگەرۋگە 5 جىلعا سوزىلىپ كەتكەن ٴتارىزدى. جان-جاقتى پىسىقتاي ٴتۇسۋ كەرەكتىگى سەبەبىنەن «ٴقازسات-2-نى»  ۇشىرۋ ٴتورت مارتە كەيىنگە شەگەرىلىپ كەلدى. بۇرىنعى جەرسەرىكتى پايدالانۋ مەن ۇشىرۋ كەزىندە كەتكەن كەمشىلىكتەر ەسكەرىلە وتىرىپ، ەكىنشى سپۋتنيكتىك جوبا بىرنەشە مارتە قايتا وڭدەلدى. سونىڭ ناتيجەسىندە كۇنى كەشە كوككە سامعاعان اپپاراتتى تولىق جاساپ شىققان رەسەيدەگى م.ۆ. حرۋنيچەۆ اتىنداعى عىلىمي-وندىرىستىك ورتالىق  جەر سەرىگىنىڭ كەمىندە 12 جىل قىزمەت ەتەتىنىنە كەپىلدىك بەرىپ وتىر. سوسىن جەتىلدىرۋ بارىسىندا «قازسات-2» ەلەمەنتتىك بازامەن تولىقتىرىلدى، جاڭا ۇلگىدەگى باسقارۋ الگوريتمىنە يە بولدى. بۇنىمەن قوسا اپپاراتتىڭ كۇشى ارتىپ، ترانسپوندەرلەرىنىڭ جيىنتىق قۋاتى 4،5 كيلوۆاتقا دەيىن ۇلعايعان. توقتالا كەتەتىن جايت، بەلگىلەنگەن نۇكتەگە جەتكەنگە دەيىن «قازسات-2» 6 تاۋلىك بويى ۇشۋ كەزىندە دە سىناقتان وتەدى. سىناق ۋاقىتىندا عارىشتا جۇرگەن زىمىران ٴوز مىندەتتەرىن ويداعىداي اتقارىپ شىقسا، سپۋتنيك كوپ ۇزاماي گەوستاسيونارلىق وربيتاعا ويىسادى. ال قازاقستان جەرسەرىگىنىڭ جۇمىس ىستەيتىنىنە ابدەن كوزى جەتكەندە بارىپ باسقارۋ تىزگىنىن ٴوز قولىنا الادى. سوندىقتان، تولىق باسقارۋعا دەيىنگى قازىرگى ۋاقىتشا جۇمىستارمەن رەسەيدىڭ م.ۆ. حرۋنيچەۆ اتىنداعى عارىشتىق بايلانىس ورتالىعى اينالىساتىن بولادى. دەگەنمەن، مامانداردىڭ پىكىرىنشە، جاساندى جەر سەرىكتىڭ پايدالى قىزمەت اۋقىمىن تەكسەرۋ ٴۇشىن دە ٴبىرشاما ۋاقىت قاجەتتىگىن العا تارتادى. 

قۇداي ٴساتىن سالىپ، «قازسات-2» عارىشتاعى سامعاۋ جۇمىستارى تولىق جالعاسسا ونىڭ كەلەشەكتەگى اقپاراتتتىق-تەلەكوممۋنيكاسيالىق دامۋ سالاسىنا بەرەر جەمىسى دە زور بولماق. ەڭ ٴبىرىنشى قازاقستاندىق سپۋتنيك قازاقستان، ورتالىق ازيا مەن رەسەيدىڭ ٴبىرشاما اۋماعىنا ارزان ٴارى ساپالى بايلانىستى قامتيتىن بولادى. ماسەلەن، بۇگىنگى كۇنى ەلدەگى حابار تاراتاتىن تەلەارنالار مەن بايلانىس وپەراتورلارى باعاسى جاعىنان ايتارلىقتاي قىمبات شەتەلدىك جەر سەرىكتەرىنە ۇزاعىنان تاۋەلدى. ال «قازسات-2» ىسكە كىرىسكەننەن باستاپ، حابار تاراتۋشى وپەراتورلار قازاقستاننىڭ سپۋتنيگىنىڭ قىزمەتىن كەڭىنەن پايدالانۋعا كوشە باستايدى. جەرسەرىكتىڭ تۇرعىندارعا كورسەتىلەتىن اقپاراتتىق قىزمەت تۇرلەرىن كەڭەيتۋگە دە مۇمكىندىگى زور بولماق. بۇل رەتتە ينتەرنەت، جەلىلى تەلەفون، تەلەحابار تاراتۋ سياقتى بايلانىس تۇرلەرىندە تەحنولوگيالىق ٴھام ساپالى قادام جاسالادى، تاريفتەر ارزاندايدى. اۋا-رايىن بولجاۋ سەكىلدى اقپارات الماسۋ دۇنيەلەرىنە ەسىك اشىلادى. وتاندىق ماماندار عارىشتىق يگەرۋ جۇمىستارىنا دا قىزىعىپ، وعان تارتۋ شاراسى دا جۇزەگە اسپاق. 

جالپى قازاقستان ٴۇشىن ەكىنشى جەر سەرىگىنىڭ ۇشۋىن سالماقتى يننوۆاسيالىق سەرپىن دەۋگە كەلەدى. بۇنداي بىلىكتى قادام ارقىلى ەلىمىز زاماناۋي سپۋتنيكتىك، بايلانىستىق تەحنولوگيالاردى دا ٴوز يەلىگىنە الادى. تەللەكوممۋنيكاسيالىق-بايلانىس سالاسىنداعى اپپاراتتى باسقارۋ باعىتىندا جوعارى ٴبىلىمدى مامانداردى دايارلاۋدى دا جولعا قويادى. ال الداعى ۋاقىتتا سول ماماندار قازاقستاندىق ينتەللەكتۋالدى ەليتاسىنىڭ ەلەۋلى بولىگىن قۇراۋى ابدەن مۇمكىن. عارىشتىق ساپارى ٴساتتى بولسا، 2013 جىلدىڭ جەلتوقسان ايىنا قاراي «قازسات-3» جەر سەرىگىن ۇشىرۋ دا جوسپارلانۋدا. مالىمەتتەرگە سۇيەنسەك، ٴۇشىنشى قازاقستاندىق جەر سەرىگىن قۇراستىرۋ مەن جاساۋ تۋرالى كەلىسىم-شارتقا فرانسيانىڭ «لە بۋرجە» اەروعارىش سالونىندا قول قويىلعان. سوعان وراي، «قازساتتىڭ» ٴۇشىنشىسى رەسەيدىڭ كراسنويارسك قالاسىنداعى اكادەميك رەشەتنەۆ اتىنداعى عىلىمي-وندىرىستىك بىرلەستىكتە جاسالاتىنى جوسپارلانۋدا.  

قازاقپارات انىقتامالىعى: 

«قازسات-2» قازاقستاندىق جاساندى جەر سەرىگىنىڭ قۇنى -115 ملن. دوللار شاماسىندا. سپۋتنيكتىڭ ماسساسى - 215 كەلى; وربيتاداعى ماسساسى - 1330 كەلى; وربيتاسى - گەوستاسيونارلىق وربيتا;  ورنالاسۋ نۇكتەسى - 86،5⁰ شىعىس بويلاق; جيىلىك دياپازونى - ك_u دياپازونى (107 گگس پەن 12،7 گگس ارالىعى);  قىزمەتتىك مەرزىمى - 12-14،5 جىل; سيگنال قابىلداعىش-جىبەرگىشتەر سانى - 20 (16 نەگىزگى، 4 قوسالقى); ونىڭ ىشىندە: سپۋتنيكتىك بايلانىس - 12، تەلەحابار تاراتۋ  - 4.

http://www.inform.kz/kaz/article/2393893

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!