قازاقستاندىقتاردىڭ باسىم بولىگى اقشالارىن دوللارمەن ساقتاۋدا

استانا. 19 جەلتوقسان. baq.kz - وتانداستارىمىزدىڭ باسىم بولىگى جيعان – تەرگەندەرىن دوللارمەن ساقتاعاندى ٴجون سانايدى. قازان ايىنداعى كورسەتكىش بويىنشا، ۇلتتىق ۆاليۋتادا دەپوزيت ساقتاۋ كورسەتكىشى شامامەن 9%-عا تومەندەگەن. ال اقش-تىڭ كوك قاعازى كەرىسىنشە 7%-عا كوبەيىپ، 2،5 ملرد تەڭگەدەن اسىپ وتىر. بۇل تۋرالى «الماتى» تەلەارناسى «ىسكەرلەر ۋاقىتى» باعدارلاماسىندا حابارلاندى. 

ساراپشىلاردىڭ سوزىنشە، بۇل ٴرۋبلدىڭ تۇراقسىزدىعىنان تۋىنداعان جايت. تەڭگەدەگى دەپوزيتتىڭ زاڭدى تۇلعالار ٴۇشىن ورتاشا سىياقى مولشەرى 5،5%، ال جەكە تۇلعالاردىڭ دەپوزيتى 8،4 % قۇراپ وتىر.

«حالىق تەڭگەنىڭ تۇراقتىلىعىنا سەنبەيدى. ال اقش-تىڭ ەكونوميكاسى ورلەپ جاتقاندا كوك قاعازدىڭ قۇندى ەكەندىگىن تۇسىنگەن جۇرتشىلىق شەتەل ۆاليۋتاسىن ٴجون كورۋدە»، - دەدى ەكونوميست ٴۋاليحان تولەشوۆ.

قانداي جاعداي ورىن الماسىن جۋىق ارادا تەڭگە قۇلدىرامايدى. بۇل ۇلتتىق بانك ٴتوراعاسىنىڭ كەڭەسشىسى، ەكونوميست ولجاس قۇدايبەرگەنوۆتىڭ "فەيسبۋكتەگى" پاراقشاسىنا جازعانى. بۇل ونىڭ جەكە پىكىرى بولعاندىقتان، ۇلتتىق بانكتىڭ ۇستانىمى ەمەس ەكەندىگىندە اتاپ ٴوتىپتى.

«بۇل جاعدايدا تەڭگەنىڭ قۇلدىراۋىنا جول بەرمەيتىن ٴبىر شەشىم بار. ٴبىراق ول ازىرگە قۇپيا. دەسە دە ونىڭ مەملەكەتتىڭ، بيزنەستىڭ، قاراپايىم حالىقتىڭ ورتاق مۇددەسىنەن شىعادى دەگەن ويدامىن. شەشىم بارلىق تاراپتان قولداۋ تاپقانى كۇنى حالىقتىڭ ۇلتىق بانككە دەگەن سەنىمى ارتادى. جالپى ٴسوز سوڭىندا ايتارىم، رۋبل مەن مۇناي باعامىندا جۋىق ارادا قانداي جاعداي ورىن الماسىن مەرەكەلىك دەمالىستاردى ەش قام جەمەي وتكىزۋگە بولادى»، - دەدى قۇدايبەرگەنوۆ. 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!