«قازاقستاندا جاسالعان» اكسياسى استاناداعى سۋپەرماركەتتەن باستالدى (فوتو)

استانا. 16 اقپان. baq.kz – بۇگىن «قازاقستان 2050» جالپىۇلتتىق قوزعالىسىنىڭ باستاۋىمەن ىسكە قوسىلعان «قازاقستاندا جاسالعان» رەسپۋبليكالىق اكسياسى استاناداعى «ا2» سۋپەرماركەتىنەن باستالدى.

2015 جىلعى 11 اقپاندا وتكەن ۇكىمەتتىڭ كەڭەيتىلگەن وتىرىسىندا قر پرەزيدەنتى نۇرسۇلتان نازاربايەۆ وتاندىق وندىرۋشىلەردى قولداۋعا شاقىرعان بولاتىن. وندا ەلباسى «قازاقستاندا جاسالعان» جالپىۇلتتىق اكسياسىن باستاۋدى ۇسىنعان ەدى. اكسيا بارىسىندا ساۋدا جەلىلەرىندە ساتىلاتىن قازاقستاندىق ونىمدەر كوزگە بىردەن تۇسەردەي ەرەكشە كورسەتىلىپ قويىلادى. وتاندىق وندىرۋشىلەردىڭ تاۋارىن ساتىپ العىسى كەلەتىن ازاماتتارعا بۇل وتە قولايلى. «بارلىق قازاقستاندىقتاردى، بۇگىنگىدەي قيىن جاعدايدا، ٴبىزدىڭ، قازاقستاندىق تاۋارلاردى ساتىپ الۋعا شاقىرامىن. بۇل قازاقستان ەكونوميكاسىنا قوسقان ۇلەسىمىز دەپ بىلەيىك»، دەگەن بولاتىن مەملەكەت باسشىسى اتالعان جيىن بارىسىندا.

ەل پرەزيدەنتىنىڭ ۇندەۋىنەن كەيىن «قازاقستان 2050» جالپىۇلتتىق قوزعالىسىنىڭ بەلسەندىلەرى بىردەن ٴىرى دۇكەن جەلىلەرىمەن جانە وندىرۋشىلەرمەن كەلىسسوز جۇرگىزۋدى باستاپ كەتتى. قوعامدىق ۇيىمنىڭ اكسيا وتكىزۋ تۋرالى ۇسىنىسىن العاشقىلاردىڭ ٴبىرى بولىپ «ا2» سۋپەرماركەتتەر جەلىسى قولداپ، دۇكەندەرىنىڭ بىرىندە «قازاقستاندا جاسالعان» اكسياسى باستاۋ الدى.

وتاندىق وندىرۋشىلەردىڭ ونىمدەرى ورنالاسقان ساۋدا سورەلەرىنىڭ تۇسىنا «قازاقستاندا جاسالعان» دەپ جازىلعان ٴتۇرلى-تۇستى بەلگى-تاقتايشالار قويىلدى. بۇل قازاقستاندىق ٴونىمدى ەرەكشەلەپ، ساتىپ الۋشىلار ٴۇشىن تارتىمدىلىعىن ارتتىرادى.

«جىلدار بويى ەلىمىز مەنى جانە مەن سياقتى مىڭداعان قازاقستاندىقتاردى قولداپ كەلدى. جوعارى ٴبىلىم الىپ، بىلىكتىلىگىمىزگە ساي كوڭىلگە قونىمدى جۇمىس تاپتىق، وتباسىن قۇرىپ، قۋانىشقا بولەندىك. قازاقستانىمىزعا، ەلىمىزگە قولداۋ كورسەتەتىن كەزەك ەندىگىدە بىزگە كەلىپ وتىر. قازاقستاندىق ٴونىمدى ساتىپ الۋ ارقىلى ٴبىز تەك ەل ەكونوميكاسىنا عانا كومەكتەسىپ قويمايمىز، سونداي-اق وتاندىق كاسىپورىنداردا ەڭبەك ەتىپ جۇرگەن مىڭداعان ادامدارعا قولداۋ كورسەتەمىز. ولار ٴبىزدىڭ ارقامىزدا جۇمىسىن جالعاستىرادى، وتباسىن اسىراپ، ۇرپاق وربىتەدى، دارىگەرلەر مەن مۇعالىمدەردىڭ ەڭبەكاقىسى ٴۇشىن سالىق تولەيدى. ٴبىز قازاقستاندىق ٴونىمدى قاجەت بولعاندىقتان ەمەس، سولاي دۇرىس بولعاندىقتان ساتىپ الامىز»، - دەيدى «قازاقستان 2050» جالپىۇلتتىق قوزعالىسى كەڭەسىنىڭ ٴتوراعاسى دانات جۇمين.

بۇگىندە بەلسەندىلەر ەلىمىزدەگى بارلىق ٴىرى ساۋدا جەلىلەرىمەن كەلىسسوزدەر جۇرگىزۋدە. «قازاقستاندا جاسالعان» دەگەن جازۋى بار بەلگىلەردى بۇكىل قازاقستاندىقتار جۋىق ارادا كورەدى دەگەن سەنىمدەمىز. 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!