قازاقستاندا ٴىرى قارا ەتىن ٴوندىرۋدىڭ بولاشاعى زور - «قازاگرو» ۇبح» اق باسقارما ٴتوراعاسى

ونىڭ ايتۋىنشا، fasusda مالىمەتى بويىنشا (2009 جىلدىڭ قورىتىندىسىمەن) الەمدە ٴىرى قارا ەتىنىڭ ەكسپورتى 7322 مىڭ توننانى قۇراسا، ەت يمپورتىنىڭ كولەمى 6696 مىڭ توننا (مۇنى كوپتەپ تۇتىناتىندار ىشىندە رەسەي دە بار) بولعان ەكەن. حالىق سانى ٴوسىپ، تۇرمىسىنىڭ جاقسارۋى ەتتى كوپتەپ تۇتىنۋعا اكەلەدى. بۇل رەتتە ەتتى نەگىزگى ٴوندىرۋشى ەلدەر شارىقتاۋ شەگىندە تۇر، سوندىقتان سۇرانىستى ودان ٴارى قاناعاتتاندىرۋ ٴۇشىن جاڭا ٴونىم جەتكىزۋشىلەر قاجەت. وسى ورايدا قازاقستاننىڭ بىرنەشە ارتىقشىلىعى بار. مۇندا ەڭ الدىمەن ەت ٴونىمىنىڭ وزىندىك قۇنىن ازايتىپ، شىعىندى ازايتۋعا مۇمكىندىك بەرەتىن جايىلىمدىق جەرلەر جەتكىلىكتى (جالپى اۋماعى - 180 ملن. گەكتار). ەكىنشىدەن، مال بورداقىلاۋ تەحنولوگياسى ەكولوگيالىق جاعىنان تازا. ۇشىنشىدەن، رەسەي جاقىن بولعاندىقتان، تاسىمال شىعىنى تومەن. تورتىنشىدەن، كەدەندىك وداقتىڭ تيىمدىلىگى ٴقازىردىڭ وزىندە كورىنىپ وتىر. بەسىنشىدەن، مال شارۋاشىلىعى قازاقستان ٴۇشىن اتا كاسىپ ەكەندىگى بەلگىلى. قازاقستان ەتىن رەسەيدىڭ ماسكەۋ، ورىنبور، ەكاتەرينبۋرگ، چەليابى، ومبى، ٴنوۆوسىبىر، بارناۋل قالالارىنا جەتكىزگەن الدەقايدا ٴتيىمدى. «قازاگروونىم» اق-نىڭ 2010 جىلعى جەلتوقسان مەن بيىلعى قاڭتارداعى ەسەبى بويىنشا ورامداعى سالقىنداتىلعان ەتتىڭ ٴار كەلىسىنىڭ باعاسى قازاقستانداعى ورتاشا باعاسى 1200 تەڭگە بولسا، ماسكەۋدە - 2200، سانكت-پەتەربوردا - 2350، التاي ولكەسىندە 1600 تەڭگە. سوندا كولىك شىعىنىن ەسەپتەگەندە، قازاق ەتىن ماسكەۋگە - 1240، سانكت-پەتەربورعا - 1260، التاي ولكەسىنە 1220 تەڭگەگە جەتكىزۋگە بولادى. ياعني، باعا جونىنەن قازاقستاندىق ەت ماسكەۋ، سانكت-پەتەربور، بارناۋل، ومبى، ٴنوۆوسىبىر، التاي ولكەسىندە باسەكەگە قابىلەتتى. ساپالى ەتتى سىرتقا شىعارۋ ٴۇشىن رەسپۋبليكا وبلىستارىنىڭ قولايلى جەرلەرىندە مال بورداقىلاۋ الاڭدارىن، اسىل تۇقىمدى مال شارۋاشىلىقتارىن ورنالاستىرۋعا بولادى. ايتالىق، «قازاگرو» حولدينگى جالپى قۋاتى جىلىنا 8،2 مىڭ توننا ەت وندىرەتىن ون بورداقىلاۋ الاڭىن جانە جىلىنا 14،9 مىڭ توننا ٴونىم بەرەتىن ٴتورت ەت كومبيناتىن قارجىلاندىرىپ وتىر. سونىڭ ىرىلەرىنىڭ ٴبىرى - بقو-نىڭ زەلەنوۆ اۋدانى يانايكين اۋىلىندا ورنالاسقان «crown باتىس» ٴجشس-ىنىڭ مال بورداقىلاۋ كەشەنىنىڭ قۋاتى - 2073 توننا. اتالمىش كەشەن جۇمىسىمەن 1 ناۋرىز كۇنى شەتەلدىك مەيماندار دا تانىستى. «شەتەلدىك تەحنولوگياعا نەگىزدەلگەن وسىنداي ٴوندىرىس ورىندارى تولىق قۋاتىندا جۇمىس جاسايتىن بولسا، ەكسپورتقا باعىتتالعان ەت ٴونىمى كولەمىن دە ارتتىرۋعا بولادى. بۇل جونىنەن ەلباسى قويىپ وتىرعان تالاپ تا وسى»، - دەدى ا.مامىتبەكوۆ. http://www.inform.kz/kaz/article/2356642

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!