قازاقستاندا اۆتوكولىك اكەلۋدىڭ جاڭا تارتىپتەرى كۇشىنە ەندى

استانا. 12 قاڭتار. baq.kz - ەۋرازيا ەكونوميكالىق وداعىنا مۇشە رەسەي مەن بەلارۋس ەلدەرىنەن قازاقستانعا اكەلىنگەن كولىكتەردىڭ شىققان جىلدارى مەن ەۋرو-4 ەكولوگيالىق نورماسىنا بايلانىستى قويىلعان شەكتەۋلەر الىنىپ تاستالدى. 

ەندى ٴۇش جىلدىڭ ىشىندە بۇل نورما ارمەنيا مەن قىرعىزستاننان كەلگەن كولىكتەرگە دە قولدانىلاتىن بولادى. تەك ٴرۋلى وڭ جاقتا ورنالاسقان كولىكتەردى اكەلۋگە سالىنعان تىيىم وزگەرىسسىز قالدى. بۇل تۋرالى kolesa.kz سايتى قر ينۆەستيسيالار جانە دامۋ مينيسترلىگى تەحنيكالىق رەتتەۋ جانە مەترولوگيا كوميتەتىنە سىلتەمە جاساپ حابارلادى.

جاڭا تارتىپتەر قاڭتاردىڭ 1-ىنەن باستاپ ەۋرازيا ەكونوميكالىق وداعى مەن كەدەن وداعىنىڭ تەحنيكالىق رەگلامەنتىنىڭ "دوڭگەلەكتى كولىك قۇرالىنىڭ قاۋىپسىزدىگى تۋرالى" كەلىسىمشارتىمەن بىرگە ٴبىر ۋاقىتتا كۇشىنە ەندى.

بۇل مەملەكەتارالىق قۇجاتتار بويىنشا بۇرىنعى ۇلتتىق رەگلامەنتتەر الىنىپ تاستالدى، ونىڭ ىشىندە قازاقستاندىكى دە بار. بۇل جەردەگى ايتىلىپ وتىرعان ماسەلە "قازاقستان اۋماعىندا اينالىمعا شىعارىلاتىن اۆتوكولىكتەردەن شىعاتىن زياندى قالدىقتارعا قويىلاتىن تالاپتار" دەپ اتالاتىن وتاندىق قۇجات تۋرالى، بۇل قۇجاتتىڭ قوسىمشالارىنىڭ بىرىندە ەۋرو-4 ەكولوگيالىق ستاندارتقا ساي كەلمەيتىن كولىكتەرگە قازاقستان اۋماعىندا جۇرۋگە تىيىم سالىنعان بولاتىن.

وسىلايشا ەاەو شەكارالارى ارقىلى كولىكتەردى وتكىزۋ كەزىندە رەگلامەنتتەۋ بولمايدى، سونىمەن قاتار رەسەي مەن بەلارۋس كولىكتەرىن تىركەۋ بارىسىندا ولاردىڭ شىققان جىلدارى مەن ەكولوگيالىق قاۋىپسىزدىگىنە شەكتەۋ قويىلمايدى.

ەۋرو-4 ەكولوگيالىق ستاندارتىنا بايلانىستى تالاپتار تەك ەۋرازيا ەكونوميكالىق وداعىنا مۇشە ەمەس ەلدەردەن اكەلىنگەن كولىكتەرگە عانا قويىلادى. سونىمەن قاتار ەاەو-عا مۇشە ەلدەرگە اكەلىنەتىن كولىكتەر 2007 جىلدان بۇرىن شىققان بولماۋى ٴتيىس، ىشىندە كەمى ٴبىر قاۋىپسىزدىك جاستىعى، بالالار ورىندىعىن ورناتۋعا ارنالعان سيستەما، abs (بلوكيروۆكاعا قارسى تەجەگىش جۇيەسى)، كۇندىز جۇرۋگە ارنالعان جارىق شامى مەن يمموبيلايزەر بولۋى كەرەك. سونداي-اق اۆتوكولىكتەردىڭ گاز بەن بورت دياگنوستيكاسىن بەيتاراپتاندىرۋ جۇيەسى جۇمىس ىستەپ تۇرۋى ٴتيىس.

قازاقستاننىڭ ىشكى ىستەر مينيسترلىگى اكىمشىلىك پولليسيا كوميتەتىنىڭ ماماندارى بار ايماقتاعى ارىپتەستەرىنە جاڭا نورمالار تۋرالى مالىمدەمەلەردى تاراتتى. قۇجاتتىڭ تولىق نۇسقاسىن مىنا جەردەن كورە الاسىزدار.

سونىمەن قاتار، بۇعان دەيىن 1 قاڭتاردان باستاپ ەاەو ەلدەرىنەن كولىك ساتىپ الۋ كەزىندە قوسىلعان قۇن سالىعى مەن اكسيزدىك الىم تولەنبەيتىنى حابارلانعان بولاتىن.

24.kz تەلەارناسىنىڭ حابارلاۋىنشا، كولىك يەلەرىنىڭ كەيبىرىن ٴالى دە سالىق تولەۋگە مىندەتتەگەن، ال قاڭتار ايىنىڭ باسىندا رەسەيدەن اكەلىنگەن كولىكتەردىڭ قۇجاتىن راسىمدەۋ كەزىندە قيىندىقتار تۋعان. قارجى مينيسترلىگى ماماندارىنىڭ مالىمدەۋىنشە، قوسىلعان قۇن سالىعىن تولەۋ مىندەتى كولىك ەلىمىزدىڭ شەكاراسىنان اسقان كۇنگە بايلانىستى سالىنادى، ياعني كولىكتى قاڭتار ايىندا ساتىپ العاندار سالىق تولەمەيدى.

"ەگەر كولىك 2014 جىلى ساتىپ الىنىپ، ٴبىراق رەسەي - قازاقستان شەكاراسىنا، مىسالى، 2015 جىلدىڭ قاڭتارىنان كەيىنگى داتادا كىرگىزىلەتىن بولسا، وندا كولىك يەسى قوسىلعان قۇن سالىعىن تولەۋ مىندەتىنەن بوساتىلادى"، - دەدى قر قارجى مينيسترلىگىنىڭ مەملەكەتتىك كىرىس كوميتەتىنىڭ باسقارما باسشىسى قايرات ورقاشبايەۆ. 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!