قازاقستان جۇمىسسىزدىق ماسەلەسىن ٴساتتى شەشىپ كەلەدى – م. داۋي

استانا. 20 قاراشا. baq.kz - بۇگىن ورتالىق كوممۋنيكاسيالار قىزمەتىندە ەلباسىنىڭ «نۇرلى جول» - بولاشاققا باستار جول» جولداۋىن اقپاراتتىق ٴتۇسىندىرۋ ماقساتىندا ۇيىمداستىرىلعان بريفينگتە بىرىككەن ۇلتتار ۇيىمى ونەركاسىپتىك دامۋ جونىندەگى بيزنەس، ينۆەستيسيا جانە تەحنولوگيالىق سەرۆيس دەپارتامەنتىنىڭ ديرەكتورى (يۋنيدو) مۇحاممەد داۋي قازاقستان جاھاندىق الەم ەلدەرىنىڭ باستى پروبلەماسىنا اينالىپ وتىرعان جۇمىسسىزدىق ماسەلەسىن وڭتايلى شەشىپ كەلەدى دەدى.

- جاپلى، جاھاندىق دامۋداعى اسا ماڭىزدى ينديكاتوردىڭ ٴبىرى – جۇمىسسىزدىق ماسەلەسى بولىپ تابىلادى. بۇل ٴتىپتى دامۋدىڭ داڭعىل جولىنا ٴتۇسىپ، وزگە مەملەكەتتەرمەن سالىستىرعاندا ەكونوميكاسى كوش ىلگەرى كەتكەن دەيتىن ەۋروپا ەلدەرىنىڭ باس اۋرۋىنا اينالعان دەسەك تە بولادى. مىسالى، يسپانيادا، يتاليادا، ٴتىپتى فرانسياداعى جۇمىسسىزدىق دەڭگەيىنىڭ كورسەتكىشى بۇل كۇندە 10 پايىزدان اسادى. كەي دەرەكتەرگە سۇيەنسەك، ول 15 پايىزدى قۇرايدى. ال جاستار اراسىنداعى جۇمىسسىزدىق دەڭگەيى 25 پايىزدان اساتىن كورىنەدى. بۇل ەندى كۇردەلەنگە جاعدايدى ودان سايىن قيىنداتا تۇسەتىن عالامدىق ماسەلەگە اينالۋى مۇمكىن. الايدا، قازاقستان بۇل تۇرعىدا وتە ٴساتتى جوبالارمەن قارۋلانعان دەسەك تە بولادى. سىزدەردىڭ ەلدە جۇمىسسىزدىق دەڭگەيى 5-6 پايىزدى قۇرايدى. مەن مۇنىڭ سەبەبىن قازاقستاندىق يندۋستريالاندىرۋدىڭ شىن مانىندە تابىستى بولعانىمەن تىكەلەي بايلانىستىرامىن. ويتكەنى، يندۋستريالاندىرۋ ساياساتىنىڭ العاشقى كەزەڭى جەمىستى ناتيجەلەر كورسەتكەن بولاتىن، - دەيدى مۇحاممەد داۋي.

ايتا كەتەيىك، ٴباسپاسوز ٴماسليحاتى ەلباسى جولداۋ اياسىنداعى ونەركاسىپتىك ساياسات تاقىرىبىندا وربىگەن ەدى. بۇۇ وكىلى جاڭا ەكونوميكالىق ستراتەگياعا توقتالا كەلە، قۇجاتتا باسىمدىق بەرىلگەن سەكتورلاردا يننوۆاسياعا، تەحنولوگياعا ۇلكەن ماڭىز بەرىلىپ وتىرعانىن اتاپ ٴوتتى.
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!