قاراعاندى كەرەمەت قالاعا اينالادى

ارقا توسىندەگى الىپ يندۋستريالىق ورتالىق - قاراعاندى قالاسىنىڭ كەزىندە ساۋلەتتىلىگى مەن كولەمى جونىنەن الماتىنى عانا الدىعا سالعانى بەلگىلى. قۇرىلىس پەن اباتتاندىرۋ جۇمىستارى وتە قارقىندى جۇرگەن بولاتىن ول كەزدەردە. كەنشىلەر شاھارى الداعى ۋاقىتتا دا سول بيىكتە قالۋعا - استانا مەن الماتىدان كەيىنگى ورىنعا تابان تىرەۋگە ۇمتىلۋدا. بيىلعى جىلدىڭ وزىندە قاراعاندىدا ساۋلەتى كوز تارتاتىن بىرنەشە نىسان بوي كوتەرمەك. اتاپ ايتقاندا، تاۋەلسىزدىك مەرەكەسى قارساڭىندا قالادا جاڭا مەشىت، مۇز ايدىنى، بوكس، تەننيس ورتالىقتارى سالىنىپ بىتەدى. بۇعان قوسا، ەندى وبلىس ورتالىعىنداعى مادەنيەت جانە دەمالىس ساياباعى تۇبەگەيلى جاڭارتىلىپ، جاڭعىرتىلىپ اباتتاندىرىلعالى جاتىر. جاقىندا وبلىس اكىمى سەرىك احمەتوۆ وتكىزگەن كەڭەستە وسى نىساندى دامىتۋ تۇجىرىمداماسى جان-جاقتى تالقىلاندى.

ٴجۇز قىرىق گەكتار جەردى الىپ جاتقان، جاسىل جەلەكپەن كومكەرىلگەن ورتالىق مادەنيەت جانە دەمالىس ساياباعى كەزىندە قاراعاندىداعى عانا ەمەس، ەلىمىزدەگى كوزتارتار نىساننىڭ ٴبىرى بولعان ەدى. ساياباقتاعى بالالاردىڭ سەرۋەندەۋىنە ارنالعان وتاربا جولى كسرو-داعى وسىنداي نىسانداردىڭ ەڭ اۋقىمدىسى سانالعان كورىنەدى.
- ساياباققا قاراپ تۇرىپ سول كەزدەگى بيلىكتىڭ كورەگەن شەشىمىنە تاڭعالامىن. حالىقتىڭ يگىلىگى ٴۇشىن مىناداي تەڭدەسىز جادىگەر قالدىرعان ولارعا العىسىمىز شەكسىز، - دەيدى وبلىس اكىمى سەرىك احمەتوۆ.
بۇگىندە وسى بىرەگەي نىساننىڭ جاعدايى ٴماز ەمەس. جاڭارتىلىپ، جاڭعىرتىلماعالى تالاي جىل وتكەن. ويىن-ساۋىق ورىندارى باياعى كەڭەستىك كەزەڭنەن قالعان جابدىقتاردى جاماپ-جاسقاپ ىسكە جاراتۋدا.
سەرىك نىعمەت ۇلىنىڭ 2009 جىلى وبلىسقا اكىم بولىپ كەلگەندە ٴتيىستى ورىندارعا بەرگەن العاشقى تاپسىرمالارىنىڭ ٴبىرى وسى نىساندى زامانعا ساي قايتا اباتتاندىرۋ بولعان ەدى. ايماق باسشىسى ساياباقتى زامان تالابىنا ساي جانە تۇرعىنداردىڭ تىلەگى بويىنشا جاڭارتۋ ٴجون دەپ تاپقانىن ايتادى. وسى ماقساتتا جەرگىلىكتى ٴباسپاسوز قۇرالدارىندا ارنايى ايدارلار اشىلىپ، وندا ساياباقتى اباتتاندىرۋ تۋرالى قىزۋ تالقىلاۋ باستالىپ تا كەتكەن بولاتىن.
جۇرتشىلىقتىڭ پىكىرى ەسكەرىلە كەلە، وسى ماڭىزدى نىساننىڭ جاڭا كەلبەتىنىڭ بىرنەشە تۇجىرىمداماسى قاراستىرىلۋدا.
تۇجىرىمدامانى ازىرلەۋشىلەر ونى ٴۇش كەزەڭگە ٴبولىپ، ىسكە اسىرۋدى ۇسىنىپ وتىر.
ٴبىرىنشى كەزەڭدە (2012 جىل) ساياباقتاعى كولشىكتى تازالاۋ، بالالار تەمىر جولىنىڭ قۇرىلىسىن جالعاستىرۋ، جاعالاۋدى اباتتاندىرۋ (قابىرعالاردى گرانيتپەن قاپتاۋ، ۇلكەن كولدە امفيتەاتر سالۋ) جۇمىستارى جاسالماقشى. ەكىنشى كەزەڭدە (2013 جىل) بۇقپا وزەنىن اباتتاندىرۋ، كانال مەن ەكىنشى ورتالىق الاڭنىڭ، بالالار تەمىر جولى ۆوكزالى مەن 3-ستانسانىڭ قۇرىلىسىن جۇرگىزۋ قولعا الىنباق. ال 2014 جىلى ىسكە اسىرىلاتىن ٴۇشىنشى كەزەڭدە جاڭا اتتراكسيوندار قۇرۋ، جاياۋ جۇرگىنشىلەر جولىنا كەسپەتاس توسەۋ، جارىق باعانالارىن، ورىندىقتار مەن ۋرنالار ورناتۋ، ساياباقتىڭ وڭتۇستىك جاعىندا سپورت ايماعىنىڭ قۇرىلىسىن جۇرگىزۋ (بالالاردىڭ ويىن الاڭى، روللەردروم، ميني-فۋتبول، ۇستەل تەننيسى، باسكەتبول، بالالار ترەناجەرى، سكەيتودروم الاڭدارى)، اعاش وتىرعىزۋ، سۋارۋ قۇبىرلارىن سالۋ اتقارىلادى.
ناتيجەسىندە، جوبا بويىنشا بالالار تەمىر جولىنىڭ ۇزىندىعى 7 شاقىرىمدى (ٴقازىر 5 شاقىرىم) قۇرايتىن بولادى. ينتەنسيۆتى ايماق الاڭى 22،9 گەكتاردان 58،5 گەكتارعا دەيىن كەڭەيەدى. سپورت الاڭى 15 گەكتارعا ارتىپ، 18،3 گەكتاردى قۇرايتىن بولادى. سونىمەن قاتار مۇندا 3 سپورت كەشەنىن ورنالاستىرۋ جوسپارلانىپ وتىر. اتتراكسيوندار الاڭى 5،6 گەكتاردان 17،2 گەكتارعا ۇلعايادى. بۇعان قوسا، بىرنەشە قوعامدىق تاماقتاندىرۋ ورىندارى اشىلماق.
ساياباق اۋماعى كەڭەيتىلىپ قانا قويمايدى، ونىڭ جان-جاعى تۇرعىنداردىڭ قالانىڭ كەز كەلگەن تۇسىنان كەلىپ، ەنۋىنە ىڭعايلى بولىپ جاسالماق. وبلىس اكىمى ورتالىق ساياباقتى حايۋاناتتار باعىمەن قوسىپ، كەلەشەكتە بۇل ەكى نىساندى ٴبىر كاسىپورىن ەتۋدى قۇپ كورەتىنىن ايتادى.
تالقىلاۋ قورىتىندىسى بويىنشا، وبلىس اكىمى قاراعاندىلىقتاردىڭ ٴباسپاسوز بەتتەرىندە بىلدىرگەن ۇسىنىس-تىلەكتەرىن ەسكەرە وتىرىپ، تۇجىرىمداما جوباسىن قايتا پىسىقتاپ شىعۋعا تاپسىرما بەردى.
قالانىڭ باستى دەمالىس ورنىن قالاي جاڭارتۋ ماسەلەسى ٴباسپاسوز بەتىندە ٴالى دە تالقىلانۋ ۇستىندە. پىكىر ايتۋشىلاردىڭ كوپشىلىگى قاراعاندىنىڭ ورتالىق ساياباعى ۇلتتىق بوياۋعا قانىق بولۋى ٴتيىس دەگەنگە توقتالىپ وتىر.
- ۇلتتىعىمىزدى ۇلىقتايتىن، قازاقى ٴيىستى اڭقىتاتىن قانداي دا ٴبىر ناقىشتار ساياباقتان ويىپ ورىن السا، ەشكىم بۇعان «تەك» دەمەس. قيساپسىز قارجىعا تۇرعىزىلعان ەتنوساياباقتان جۇرت وسىنداي ٴۇمىت كۇتكەن. ول ٴۇمىت اقتالمادى. اتاۋى ۇلتتىق. ٴبىراق وندا ساياباققا كەلۋشىنى «مەن - قازاقپىن!» دەگىزىپ، جىگەرىن جانىپ، نامىسىن قايرايتىن دانەمە جوق. سوندىقتان جاستار كوپ جينالىپ، دەمالىس ۋاقىتىن وتكىزەتىن ورتالىق ساياباق ولارعا تاريحىمىزدان، تۇلعالارىمىزدان سىر شەرتىپ تۇرسا... ماسەلەن، ساياباق ىشىندە ۇلىلارىمىزعا ارنالعان اللەيالار بولسا، - دەيدى قاراعاندىلىق قىزعالداق ايتجانوۆا.
قامبار احمەتوۆ،
قاراعاندى

http://www.aikyn.kz/index.php؟option=com_content&task=view&id=8738&itemid=32

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!