قانت قىزىلشاسىن وسىرۋگە ايىرىقشا ٴمان بەرىلۋدە

استانا. 16 ٴساۋىر. baq.kz – الماتى وبلىسىنداعى ەسكەلدى اۋدانىندا كوكتەمگى ەگىس جۇمىستارى قارساڭىندا توپىراقتى وڭدەۋ، ونى تىڭايتۋ مەن قانت قىزىلشاسىن ەگۋدىڭ وزىق تەحنولوگياسىن ەنگىزۋ جونىندە ارنايى سەمينار-كەڭەس بولىپ ٴوتتى، - دەپ حابارلايدى الماتى وبلىسى اكىمىنىڭ ٴباسپاسوز قىزمەتى. 

اۋدانداعى الدىڭعى قاتارداعى «گ.نام» شارۋا قوجالىعىنىڭ ەگىس القابىندا وتكەن جيىنعا وبلىس اكىمىنىڭ ورىنباسارى س.بەسكەمپىروۆتىڭ باسشىلىعىمەن اقسۋ، ەسكەلدى، قاراتال، كوكسۋ، سارقان اۋداندارى مەن تالدىقورعان قالاسى اكىمدەرىنىڭ ورىنباسارلارى، اۋىلشارۋاشىلىعى سالالارىنىڭ باسشىلارى قاتىستى.

س.بەسكەمپىروۆ جيىن بارىسىندا وڭىردە قانت قىزىلشاسىن جانداندىرۋ جونىندە كەشەندى باعدارلامانىڭ قابىلدانىپ، 4600 گا جەرگە ٴتاتتى ٴتۇبىر ەگۋ جوسپارلانىپ وتىرعانىن جانە بۇل قانت زاۋىتىنا وڭدەۋگە كەمىندە 100 مىڭ توننا قانت قىزىلشاسىن وتكىزۋگە مۇمكىندىك بەرەتىنىن جەتكىزدى. سونداي-اق وبلىس اكىمىنىڭ ورىنباسارى العا قويىلعان اۋقىمدى مىندەتتەر تۋرالى، قولايلى مەرزىمدى ۇتىمدى پايدالانۋ، تۇقىم سەبۋدى ۇيىمداستىرۋ سىندى شارۋا قوجالىقتارىنا ٴبىرقاتار تاپسىرمالار جۇكتەدى.

سونىمەن قاتار، شارۋا قوجالىعىنىڭ باسشىسى گ.نام تۇقىم سەبۋ تەحنيكاسىن ۇتىمدى پايدالانۋ مەن جۇمىستى ساپالى اتقارۋدىڭ ادىس-تاسىلدەرىمەن ٴبولىسىپ، «قامقورلىق» ٴجشس-نىڭ قىزىلشا وسىرۋشىلەرى «كازسيب-14»، «روكسانا»، «اردان» اتتى وزدەرى دايىندايتىن قانت قىزىلشالارىنىڭ تۇقىمدارىن تانىستىردى.

سەمينارعا قاتىسقاندار قىزىلشا ٴوسىرۋدىڭ وزىق ادىستەرىنەن ٴبىرشاما قاجەتتى ماعلۇمات الىپ، ەستىگەن كەڭەستەرىن ٴوز شارۋاشىلىقتارىندا پايدالانامىز دەپ تارقاستى. 

ايا ٴومىرتاي

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!