يدەيانى ەكونوميكامەن ۇشتاستىراتىن عىلىمي پارك قۇرىلۋدا

استانا. 9 قاڭتار. baq.kz – بۇگىن پرەزيدەنت جانىنداعى ورتالىق كوممۋنيكاسيالار قىزمەتىنىڭ الاڭىندا ٴباسپاسوز ٴماسليحاتىن وتكىزگەن ٴبىلىم جانە عىلىم ۆيسە-مينيسترى تاحير بالىقبايەۆ مينيسترلىكتىڭ بۇگىنگى تاڭداعى قىزمەتىمەن باق وكىلدەرىن تانىستىرا كەلە، عىلىمي يدەيانى ەكونوميكامەن ۇشتاستىرۋ جولىندا ارنايى عىلىمي پارك قۇرىلىپ جاتقاندىعىن مالىمدەدى.

- وسى كۇندەرى جوبالاردىڭ جۇرگىزىلۋ سيكلىن، ياعني عىلىمي يدەيانى ەكونوميكامەن ۇشتاستىرۋ ماقساتىندا “astana business campus” عىلىمي پاركىن قۇرۋدامىز. ول نازاربايەۆ ۋنيۆەرسيتەتى زياتكەرلىك-يننوۆاسيالىق كلاستەرىنىڭ ماڭىزدى ەلەمەنتىنىڭ ٴبىرى بولىپ تابىلادى. سونىمەن قاتار، قۇرىلىپ جاتقان “astana business campus” اۋماعىندا كورپوراتيۆتىك عىلىمي-زەرتتەۋ جانە تاجىريبەلىك-كونسترۋكتورلىق ورتالىقتار ورنالاستىرىلاتىن بولادى، - دەدى تاحير وسپان ۇلى.

سونداي-اق، بريفينگ بارىسىندا ۆيسە-مينيستر عىلىم مەن ٴبىلىم بەرۋ ٴىسىن بىرىكتىرۋ، قازاقستاندا كورپوراتيۆتىك عىلىمي ورتالىقتار قۇرۋ شارالارى، جوعارى عىلىمي ۇيىمداردىڭ قولدانبالى عىلىمي-زەرتتەۋ قۇرىلىمدارىن قۇرۋ جانە دامىتۋ، عىلىم مەن بيزنەستى بىرىكتىرۋدە يننوۆاسيالىق جوعارى تەحنولوگيالىق كلاستەرلەردى دامىتۋ، ۇجىمدىق قولدانىستاعى زەرتحانالار، كوممەرسيالاندىرىلىپ جاتقان جوبالار تۋرالى باياندادى.

نۇرلىبەك دوسىباي،
سۋرەتتى تۇسىرگەن – عابيت ماداليەۆ
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!