ەت ساتىپ الۋشىلاردان جەكە تابىس سالىعى قازىرشە ۇستالمايتىن بولدى

استانا. 19 جەلتوقسان. baq.kz - جارقايىڭ اۋدانىنىڭ كاسىپكەرلەرى حالىقتان ەت ساتىپ الۋ كەزىندە 10 پايىز جەكە تابىس سالىعىن تولەۋگە قاتىستى جاعىمدى جاۋاپ الدى، - دەپ حابارلايدى ۇلتتىق كاسىپكەرلەر پالاتاسىنىڭ ٴباسپاسوز قىزمەتى.

ەستەرىڭىزگە سالا كەتەيىك، اقمولا وبلىسى كاسىپكەرلەر پالاتاسىنا وسى ماسەلەنى شەشۋدە جاردەم كورسەتۋدى سۇراعان ٴبىر توپ جارقايىڭدىق كاسىپكەرلەردەن ٴوتىنىش كەلىپ تۇسكەن بولاتىن. اۋداننىڭ سالىق باسقارماسى جەتكىزۋشىلەردەن ەت ساتىپ الۋ كەزىندە ولاردى 10 % جتس ۇستاپ قالۋعا مىندەتتەپ وتىر. مىسالى، ەگەر كاسىپكەر شارۋادان ٴبىر باس ٴىرى قارانى 200 مىڭ تەڭگەگە ساتىپ الاتىن بولسا، وندا ول 20 000 تەڭگەنى بىردەن بيۋدجەتكە تولەۋگە ٴتيىس. بۇل جاعدايدا كاسىپكەرلىك قىزمەت ەش تابىس اكەلمەيدى.

پالاتا ساراپشىلارى قالىپتاسقان جاعدايعا تولىققاندى ساراپتامالىق باعا بەرۋ ٴۇشىن، سايكەس ساتىلارعا سۇراۋلار جولدادى. ٴىستىڭ انىق-قانىعىنا جەتكەن سوڭ، وكپ ساراپشىلارى بەرگەن ۇسىنىستاردى ەسكەرە وتىرىپ، اۋداندىق سالىق ۆەدومستۆوسىنان سالىق اگەنتتەرىنە، ياعني كاسىپكەرلەرگە، اقپاراتتى مىندەتتى ۇسىنۋمەن جەكە قوسالقى شارۋاشىلىقتار وندىرگەن اۋىل شارۋاشىلىق ٴونىمىن وندىرۋدەن تۇسكەن تابىستى جكس-تەن بوساتۋ تۋرالى ماسەلەنىڭ قازىردە ۇكىمەت قاراۋىندا جاتقانى جايلى جاۋاپ كەلدى. وسىلايشا، سالىق زاڭناماسىنا وزگەرتۋلەر ەنگىزگەنگە دەيىن ەت وتكىزۋمەن اينالىساتىن جەكە كاسىپكەرلەردىڭ جتس ەسەپتەۋى جانە ۇستاپ قالۋى جۇرگىزىلمەيتىن بولدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!