ەندى ارزان ٴۇي بولمايدى...

استانا. 18 قاراشا. baq.kz - بۇگىن ورتالىق كوممۋنيكاسيالار قىزمەتىنىڭ الاڭىندا مەملەكەت باسشىسى نۇرسۇلتان نازاربايەۆتىڭ قازاقستان حالقىنا ارناعان "نۇرلى جول - بولاشاققا باستار جول" جولداۋىن ٴاقپاراتتىق-تۇسىندىرۋ ماقساتىندا ۇيىمداستىرىلعان بريفينگتە «سامۇرىق-قازىنا» جىلجىمايتىن مۇلىك قورى» اق باسقارما ٴتوراعاسى بولات پالىمبەتوۆ ەندى ارزان ٴۇي بولمايتىندى دەپ كەسىپ ايتتى، - دەپ حابارلايدى baq.kz ٴتىلشىسى.

الايدا، بولات ٴابىلقاسىم ۇلى ەلباسى جولداۋىندا ايتىلعان ارنايى تاپسىرماعا وراي، كەيبىر تەتىكتەر ارقىلى نارىقتاعى باسپانا باعاسىنىڭ قۇنى ٴبىرشاما رەتتەلۋى مۇمكىن ەكەندىگىن دە جوققا شىعارمادى.
- قازىرگە كەزدە باياعى «حرۋششەۆكا» اتالعان ەسكى ۇلگىدەگى ۇيلەردىڭ نارىقتاعى شارشى مەترىنىڭ باعاسى 600-700 اقش دوللارى شاماسىندا. بۇل ەڭ ارزان دەگەنىمىزدىڭ ٴوزى. ال ەندى بۇدان بىلاي باعا تومەندەيدى دەپ ويلامايمىن. الايدا، كەشەگى ەلباسى جولداۋىندا ايتىلعانداي العاشقى جارناسىز نەمەسە تومەن پايىزبەن يپوتەكالىق نەسيەلەندىرۋ ارقىلى باعا ازداپ تومەندەۋى نەمەسە تۇراقتالۋى مۇمكىن. ال ەندى ٴۇي باعاسىن تومەندەتۋ ٴۇشىن ٴبىز قۇرىلىسشىلاردىڭ جالاقىسىن قىسقارتامىز با، الدە، پايدالانىلاتىن ماتەريالدار كولەمىن شەكتەيمىز بە؟!. بۇل ەندى قيسىنسىز دۇنيە ەمەس پە؟
- بۇگىندە ەل ۇكىمەتى باسپانا باعاسىن تومەندەتۋ ٴۇشىن بارىنشا جۇمىس ىستەۋدە. وسى كەزگە دەيىن قازاقستانعا قۇرىلىس ماتەريالدارىنىڭ باسىم بولىگى شەتەلدەن تاسىمالدانىپ، ول باعانىڭ شارىقتاۋىنا سەپ بولىپ ەدى. ەندى ەلباسىنىڭ باستاماسىمەن، ۇكىمەتتىڭ قولداۋىمەن جەر-جەرلەردە قۇرىلىس ماتەريالدارى شىعارىلا باستادى. اينەك، كىرپىش، ارماتۋرا، گيپستىك قوسپالار مەن اقتاۋ، سىرلاۋ ماتەريالدارى دەگەندەي. وسىنىڭ ٴبارىن جيناقتاپ كەلگەندە تۇرعىن ٴۇيدىڭ ٴاربىر شارشى مەترىنىڭ باعاسى تومەندەۋى ٴتيىس بولاتىن. بۇل ارينە، لوگيكالىق تۇرعىدان العاندا. ٴبىراق، قازىرگى كەزدە نارىقتاعى سۇرانىستى قاپەردەن شىعارماعانىمىز ٴجون. دەمەك، سۇرانىستىڭ باسەڭدەۋىنە قاراي قۇبىلمالى نارىقتاعى پاتەر قۇنى رەتتەلەدى دەۋ دە وڭايعا سوقپايدى. ٴبىر انىعى، ەندى ارزان ٴۇيدىڭ بولمايتىنىن ٴتۇسىنۋىمىز كەرەك، - دەدى بولات ٴابىلقاسىم ۇلى.
ايتا كەتەيىك، «سامۇرىق-قازىنا» جىلجىمايتىن مۇلىك قورى» اق تۇرعىن ۇيلەردى جەكەمەنشىك كومپانيالارمەن بىرلەسىپ سالادى. وسى رەتتە جەكە كومپانيالاردىڭ ەڭ از ۇلەسى 20 پايىزدى قۇرايدى. ياعني، بۇل دەگەنىمىز ەلىمىزدەگى تۇرعىن ٴۇي قۇرىلىسىنا جەكەمەنشىك ينۆەستيسيالار تارتىلىپ جاتقاندىعىن ناقتىلاي تۇسەدى.
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!