ەلەكتروندى ساتىپ الۋ - ەل ەكونوميكاسىنىڭ نەگىزگى تىرەگى - ن. الدابەرگەنوۆ

استانا. 21 قاراشا. baq.kz - بۇگىن استانادا «ەلەكتروندى ساتىپ الۋ ساۋداسىنىڭ ادىلدىگى مەن مولدىرلىگىن قامتاماسىز ەتۋ: ەۋرازيالىق ينتەگراسيا تاجىريبەسى مەن دامۋى» تاقىرىبىندا وتكەن حالىقارالىق كونفەرەنسيادا بايانداما جاساعان ەۋرازيالىق ەكونوميكالىق كوميسسيانىڭ باسەكەلەستىك جانە مونوپولياعا قارسى رەتتەۋ بويىنشا القا مۇشەسى نۇرلان الدابەرگەنوۆ مالىمدەدى.
 

ٴبىز سوڭعى ەكى جىل ىشىندە مەملەكەتتىك ساتىپ الۋلار سالاسىندا ۇلتتىق زاڭنامامىزدى جۇيەلى تۇردە رەتتەدىك. ەندى مەملەكەتتىك ساتىپ الۋلاردى جۇزەگە اسىرۋ زاڭنامالارى مەن تاجىريبەلەرىنە تالداۋ جۇرگىزەتىن بولامىز. سونىمەن قاتار، مەملەكەتتىك ساتىپ الۋ سالاسىندا ۇلتتىق رەجيم قالىپتاستىردىق. ەندىگى جەردە ەەو مۇشە-مەملەكەتتەر اراسىنداعى مەملەكەتتىك ساتىپ الۋ ٴىسىنىڭ ۇلەسىن 2015 جىلعا قاراي 60 پايىزعا جەتكىزۋدى جوسپارلاپ وتىرمىز. سەبەبى، قىزمەتتىڭ بۇل ٴتۇرىن جانداندىرۋ زامان تالابى. ويتكەنى، ول - اشىق، قولجەتىمدى، ساپالى، سىبايلاستىقتان ادا جانە ەڭ باستىسى جەدەل ٴارى شاپشاڭ، - دەدى نۇرلان شابدىبەك ۇلى.
بايانداماشىنىڭ سوزىنە قاراعاندا، تاراپتاردىڭ كو اياسىندا الىس-بەرىس جاساعانىنا دەيىنگى كورسەتكىشتەر مەن ودان كەيىنگى سانداردىڭ ايىرماسى جەر مەن كوكتەي كورىنەدى.
- مىسالى، كو كۇشىنە ەنگەنگە دەيىن ٴۇش ەلدىڭ اراسىنداعى تاۋار اينالىمىنىڭ جيىنتىق كورسەتكىشى 47 ملرد اقش دوللارىنا دەيىن جۋىقتاعان. ال قول قويىلعانان كەيىنگى ساۋدا اينالىمىنىڭ كورسەتكىشى 2012 جىلى 33،9 پايىزعا جوعارىلاپ، ال 2013 جىلى 43 پايىزدى قۇراعان. وسى ەكونوميكالىق تاۋاراينالىمىنىڭ باسىم بولىگى نەگىزىنەن مەملەكەتتىك ساتىپ الۋ قىزمەتىنە تيەسىلى. ال ەندى بۇل سالانىڭ باستى تىرەگى - ەلەكتروندى ساتىپ الۋ قىزمەتى بولىپ تابىلاتىنى ٴسوزسىز. سوندىقتان دا ٴبىز وسى ٴۇش ەل اراسىنداعى ەلەكتروندى ساتىپ الۋ ٴىسىن جانداندىرۋعا كوڭىل بولەتىن بولامىز، - دەيدى ول.
ايتا كەتەيىك، بۇگىنگى تاڭدا كو مۇشە-مەملەكەتتەر اراسىنداعى جالپى تاۋاراينالىمىنىڭ كورسەتكىشىندە مەملەكەتتىك ساتىپ الۋ قىزمەتىنە تيەسىلى ۇلەس سالماق 42 پايىزدى قۇرايدى ەكەن.

نۇرلىبەك دوسىباي
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!