استانا: 
846 
0
استانا. 10 قازان. قازاقپارات /قانات مامەتقازى ۇلى/ - وبلىس اكىمدىكتەرىنىڭ مالىمەتتەرىنە سايكەس قازىرگى كەزدە ەلىمىزدەگى استىق ٴونىمى 24 ملن. توننادان اسىپ كەتتى. ونىڭ ىشىندەگى بيداي 20،2 ملن. توننانى قۇراپ وتىر. وسىعان وراي تازا سالماقتاعى استىق ٴونىمى 22-23 ملن. توننا دەڭگەيىندە بولجانۋدا.
الدىڭعى جىلدارمەن سالىستىرعاندا مۇنداي ٴونىم كولەمى رەكوردتىق بولىپ تابىلادى. بۇگىن پارلامەنت ماجىلىسىندە ٴوتىپ جاتقان ۇكىمەت ساعاتىندا اۋىل شارۋاشىلىعى ٴمينيسترى اسىلجان مامىتبەكوۆ وسىلاي مالىمدەدى.
ٴمينيستردىڭ سوزىنە قاراعاندا، بيىلعى جىلى ەلىمىزدىڭ اگرارلىق سالاسىندا ەگىننىڭ 1 گەكتاردان تۇسەتىن شىعىمدىق بولىگىندە تاۋەلسىزدىكتەن بەرى قارايعى رەكوردتىق استىق ٴونىمى كۇتىلۋدە. مۇنداي ٴونىم الۋعا اعىمداعى جىلى قالىپتاسقان قولايلى اۋا رايى سەپتىگىن تيگىزگەن. «بۇدان بولەك ەلباسىنىڭ ماقساتتى اگرارلىق ساياساتىنا سايكەس تاۋەلسىزدىكتەن بەرگى كوپتەگەن جىلدار بويىندا سالانى جۇيەلى تۇردە مەملەكەتتىك قولداۋدا وسىنداي رەكوردتىق كورسەتكىشكە جەتەلەپ وتىر. ويتكەنى، ٴدال بيىلعىداي اۋا رايىنىڭ قولايلىلىعى بۇدان بۇرىن دا، ماسەلەن 1999-2001 جىلدارى دا بولعان. الايدا سول كەزدەرى اۋىل شارۋاشىلىعىندا جاقسى تۇقىم بولمادى، وڭتايلى مەرزىمدە ەگىن سەۋىپ، جيناۋعا مۇمكىندىك بەرەتىن ونىمدىلىگى جوعارى تەحنيكانى، تىڭايىتقىشتار مەن گەربيسيتتەر قولدانۋدىڭ بۇگىنگىدەي دەڭگەيى دە بولعان جوق»، - دەدى مينيستر.
ونىڭ سوزىنە قاراعاندا، اعىمداعى جىلى كوكتەمگى دالا جانە ەگىن وراعى جۇمىستارىنا بيۋدجەتتەن جانە «قازاگرو» حولدينگىنىڭ ەنشىلەس ۇيىمدارىنان 94،4 ملرد. تەڭگە بولىنگەن. ونىڭ ىشىندە 78 ملرد. تەڭگە بيۋدجەتتىك نەسيە بولىپ تابىلادى. ال، ٴتيىمدى سىياقى مولشەرلەمەسى جىلدىق 12 پايىزدان 8 پايىزعا دەيىن تومەندەتىلگەن.
«قازىرگى تاڭدا ەگىن وراعى 90 پايىز القاپتا اياقتالدى. استىقتىڭ ورتاشا تۇسىمدىلىگى گەكتارىنا 16،5 سەنتنەردى قۇراۋدا. 1،6 ملن. گەكتار ٴداندى-داقىلدار ونىڭ ىشىندە 1،3 ملن. گەكتار بيداي الداعى ۋاقىتتا جينالادى»، - دەدى ا. مامىتبەكوۆ.
http://www.inform.kz/kaz/article/2410698
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5015
0