استانا: 
445 
0
استانا. 14 جەلتوقسان. baq.kz – 2015 جىلعا ارنالعان بقو بيۋدجەتى كىرىستەرى مەن شىعىندارىنىڭ جالپى كولەمى 118،2 ملرد. تەڭگەنى قۇراماق. بۇل تۋرالى وبلىستىق ٴماسليحاتتىڭ كەزەكتەن تىس ٴححى سەسسياسىندا بقو ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى رۋسلان بەكتەمىر ٴمالىم ەتتى.
ونىڭ سوزىنە قاراعاندا، سونىڭ ىشىندە رەسپۋبليكالىق بيۋدجەتتەن بولىنەتىن ماقساتتى ترانسفەرتتەر مەن نەسيەلەر - 53 602،8 ملن. تەڭگە. وبلىستىق بيۋدجەتتىڭ نەگىزگى ارناسى الەۋمەتتىك قولداۋ، دەنساۋلىق ساقتاۋ جانە ٴبىلىم بەرۋگە، ٴومىر ٴسۇرۋ جاعدايىن جاقسارتۋعا باعىتتالعان. اتالعان ماقساتقا شامامەن 60،4 ملرد. تەڭگە قاراستىرىلعان. بۇعان قوسا اۋىل شارۋاشىلىعىن دامىتۋعا شامامەن 5،8 ملرد.، كولىك ينفراقۇرىلىمىنا 6،9 ملرد. تەڭگە ٴبولىنىپ وتىر. سونداي-اق ٴبىلىم بەرۋ سالاسى بويىنشا ەكى، دەنساۋلىق ساقتاۋ بويىنشا ٴبىر نىساندى سالۋ، دەنە شىنىقتىرۋ جانە سپورت، كولىك ينفراقۇرىلىمىن دامىتۋ، اۋىلدىق ەلدى مەكەندەردى سۋمەن قامتۋ، تۇرعىن ٴۇي جانە ينجەنەرلىك-كوممۋنيكاسيالىق ينفراقۇرىلىمدى تارتۋ سەكىلدى بىرنەشە باعىتتا قارجى قارالعان.
اتالعان سەسسيادا 2015-2017 جىلدارعا ارنالعان ٴوڭىر بيۋدجەتى قابىلدانۋمەن بىرگە 2014-2016 جىلداردىڭ بيۋدجەتىنە وزگەرىستەر مەن تولىقتىرۋلار ەنگىزىلدى. 2014 جىلعى ٴوڭىر بيۋدجەتى رەسپۋبليكالىق بيۋدجەتتەن تۇسەتىن قارجىنىڭ ناقتىلانۋىنا بايلانىستى 1،4 ملرد. تەڭگەگە، سونىڭ ىشىندە ماقساتتى ترانسفەرتتەر بويىنشا 298،3 ملن. تەڭگەگە كەمىدى. وسىعان بايلانىستى ٴبىلىم بەرۋ، تۇرعىن ۇي-كوممۋنالدىق شارۋاشىلىق، تابيعات پايدالانۋ سالاسىنا كەتەتىن شىعىندار قايتا ٴبولىندى. وسى وزگەرىستەرمەن بيىلعى وبلىس بيۋدجەتى 112،9 ملرد. تەڭگەنى قۇراپ وتىر.
سەسسياعا قاتىسقان وبلىس اكىمىنىڭ ٴبىرىنشى ورىنباسارى سەرىك شاپكەنوۆتىڭ اتاپ وتكەنىندەي، ٴۇش جىلدىق بيۋدجەتتىڭ قابىلدانۋى ەلباسى جولداۋىندا العا قويىلعان ماقسات-مىندەتتەر ۇدەسىنەن شىعۋعا مۇمكىندىك بەرەدى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5010
0