بانكتەر كەدەرگى كەلتىرىپ وتىر

كوڭىل كونشىتپەيتىن كورسەتكىشتىڭ سەبەپتەرى مەن سالدارىن ەكونوميكالىق دامۋ جانە ساۋدا ۆيسە-مينيسترى مارات قۇسايىنوۆ باعدارلامانىڭ بىلتىرعى قاناتقاقتى جوباسىنان كورىپ وتىر. ونىڭ ايتۋىنشا، بۇعان كاسىپكەرلەر دە كىنالى. ولار قۇپتالعان جوبالاردى ىسكە اسىرۋ ٴۇشىن ازىرلەنەتىن قۇجاتتاردى دەر كەزىندە وتكىزبەگەن. مەملەكەتتىك قاراجاتتىڭ پايدالانىلۋىن باقىلاۋ جونىندەگى كوميسسيانىڭ وتىرىسىندا باس بايانداماشىنىڭ قىزمەتىن اتقارعان ۆيسە-مينيستر بيىلعى جىلدىڭ 1 اقپانىنداعى مالىمەتتەرگە سۇيەنىپ، جينالعانداردى «بيزنەستىڭ جول كارتاسى - 2020» باعدارلاماسىنىڭ بارلىق 3 باعىتى بويىنشا جالپى نەسيە سوماسى 105،1 ميلليارد تەڭگەنى قۇراعانىنان قۇلاعدار قىلدى. قاراستىرىلعان قارجىنىڭ 29 ميلليارد تەڭگەسى باعدارلامانىڭ ٴبىرىنشى باعىتى جاڭا بيزنەس باستامالاردى قولداۋ ماقساتىندا وڭىرلەردەگى 141 جوباعا جولدانىپتى. كاسىپكەرلىك سەكتوردى ساۋىقتىرۋعا ارنالعان 65 جوباعا 447،9 ملرد تەڭگە بولىنگەن. ال ەكسپورتقا باعىتتالعان ٴوندىرىستى قولداۋ اتتى ٴۇشىنشى باعىت اياسىندا 30،5 ملرد تەڭگەنى قۇرايتىن 29 جوبا ماقۇلدانعان. «باعدارلامانىڭ بارلىق 3 باعىتى بويىنشا جوبالاردىڭ ٴ53-ىن «قازاقستان حالىق بانكى» اكسيونەرلىك قوعامى سۋبسيديالادى. بۇعان 23،6 ملرد تەڭگە شىعىندالدى»، - دەدى م.قۇسايىنوۆ. ۆيسە-مينيستردىڭ سوزىنە قاراعاندا، «بيزنەستىڭ جول كارتاسى - 2020» باعدارلاماسى بويىنشا جالپى سوماسى 11،1 ميلليارد تەڭگەنى قۇرايتىن 32 نەسيەگە كەپىل كوزدەلىپ وتىر. جوبالاردىڭ دەنى اقتوبە وبلىسىندا قۇپتالىپ، نەسيە قۇنى 1،8 ميلليارد تەڭگەنى قۇرايتىن 7 جوبا وڭ باعالانعان. وتىرىستا «بيزنەستىڭ جول كارتاسى - 2020» باعدارلاماسىنىڭ جۇزەگە اسۋىنا وتاندىق بانكتەر كەدەرگى كەلتىرىپ وتىرعانىن تىلگە تيەك ەتكەن «اتامەكەن وداعى» ۇلتتىق ەكونوميكالىق پالاتاسىنىڭ ٴتوراعاسى ازات پەرۋاشەۆ: «بىزگە بانكتەردىڭ قوسىمشا كەپىل سۇرايتىندىعىنا شاعىمدانىپ كەلۋشىلەردىڭ قاتارى كوبەيىپ كەتتى. باعدارلامانىڭ تالاپ-تىلەگى بويىنشا ونىڭ كەز كەلگەن باعىتىنا قاتىستى ماسەلە وڭتايلى ورايلاستىرىلۋى ٴتيىس. الايدا بىزدە بۇلاي بولماي تۇر. ٴتىپتى كەيبىر بانكتەر كاسىپكەرلەر قوسىمشا كەپىل تاپقان كۇننىڭ وزىندە باعدارلامانىڭ شارتتارىن قايتا قارايدى ەكەن»، - دەدى. ونىڭ ايتۋىنشا، «اتف بانكتىڭ» الماتى قالاسىنداعى بولىمشەسى باعدارلاما شەڭبەرىندە قوسىمشا كەپىلىنىڭ بولماۋىنا بايلانىستى قازاقستاندا قاعاز وندىرەتىن «پريما-ت» جشس-عا قاراسپاي قويعان. الماتى وبلىسىنداعى «رەسەي جيناقتاۋشى بانكىنىڭ» بولىمشەسى دە جوعارىداعىداي جاعداي بويىنشا ۇشتوبە قالاسىنداعى زاۋىتقا قول ۇشىن بەرۋدەن باس تارتقان. «بانكتەر كاسىپكەرلەردىڭ «بيزنەستىڭ جول كارتاسى - 2020» باعدارلاماسىنا قاتىسۋعا دەگەن نيەتىن جويىپ، بەلسەندىلىگىن ازايتىپ وتىر. سەبەبى ولار وتىنىشتەردى قاراۋدىڭ مەرزىمىن ۇزاققا سوزادى. وتىنىشتەرگە ٴار كەزەڭ بويىنشا 3-4، ٴارى كەتسە 6-8 ايدا ناقتى جاۋاپ بەرىلۋى كەرەك. بىزدە بۇل ٴىستى 8 ايدان دا اسىراتىن بانكتەر بار. وسىنداي ارەكەتكە بارۋ ارقىلى بانكتەر كاسىپكەرلەردى ابدەن شارشاتىپ، ولارعا اقشا بەرگىلەرى كەلمەيتىندىكتەرىن جەتكىزەدى. بانك كاسىپكەرگە قولداۋ كورسەتكىسى كەلمەيتىندىگىن رەسمي جاريالامايدى. كوبىنەسە اۋىزشا ايتادى. بۇل - وتە ٴتيىمدى ٴادىس. سەبەبى ەشكىمگە ەشتەڭە تۇسىندىرمەيدى»، - دەدى پالاتا ٴتوراعاسى.قانات ماحامبەت استانا http://www.aikyn.kz/index.php؟option=com_content&task=view&id=6219&itemid=2

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!