باعانى دوللارمەن قويعاندار جازالاناتىن بولدى

استانا. 26 جەلتوقسان. baq.kz - باعانى دوللارمەن قويعاندار جازالانادى. ۇكىمەت ەندى اۆتوسالون نەمەسە دۇكەندەر بولسىن، كەز-كەلگەن تاۋار قۇنىن شەتەلدىك ۆاليۋتامەن كورسەتكەندەرگە قاتاڭ شارا قولدانباق. ياعني، ليسەنزيالارىنان جاپپاي ايىرىلادى. ٴتيىستى زاڭعا ٴتىپتى وزگەرۋ ەنگىزىلۋى مۇمكىن. دەگەنمەن ەكسپورتتان پايدا تاۋىپ وتىرعان ٴبىزدىڭ ەل ٴۇشىن دەدوللوريزاسيا ٴتيىمسىز دەيتىندەر دە بار. ۇلتتىق بانك تالابىنا ساتۋشىلاردىڭ وزدەرى قالاي قارايدى؟ 

ۇكىمەت پەن ۇلتتىق بانكتىڭ كەشەگى مالىمدەمەسى قوعامدا ٴقازىر قىزۋ تالقىلانىپ جاتىر. وندا 2015 جىلعا ارنالعان ەكونوميكالىق ساياساتتىڭ باعىت-باعدارى كورسەتىلگەن. اسىرەسە باعانى شارتتى بەلگىلەرمەن قويۋعا تىيىم سالىنۋى كوپتىڭ ٴالى مۇنداي وزگەرىسكە دايىن ەمەستىگىن كورسەتكەندەي. ياعني، بۇدان بىلاي تاۋارلار مەن قىزمەت قۇنىنا قويىلاتىن باعا تەك ٴتول تەڭگەدە بولۋى كەرەك.

ەربولات دوسايەۆ، قر ۇلتتىق ەكونوميكا ٴمينيسترى:

ٴ-بىزدىڭ ەلدە تاۋاردىڭ باعاسىن شارتتى بەلگىلەرمەن كورسەتۋ قالىپتاسقان. ولاي بولماۋى كەرەك. بۇل پوست كەڭەستىك ەلدەردىڭ ويلاپ تاپقانى. ەندى سونىمەن قوعام بولىپ كۇرەسۋىمىز قاجەت. ياعني، بارلىق تاۋاردىڭ باعاسى تەك ۇلتتىق ۆاليۋتادا كورسەتىلۋى كەرەك. بۇل ٴتول تەڭگەنى نىعايتۋعا سەپ بولادى.

ەگەر تاۋاردىڭ قۇنىن تەڭگەمەن ەمەس دوللارمەن ايتساڭىز جاۋاپقا دا تارتىلۋىڭىز مۇمكىن. سەبەبى، اكىمشىلىك قۇقىق بۇزۋ تۋرالى زاڭعا وسىنداي وزگەرتۋلەر ازىرلەنىپ جاتىر. مۇنىڭ بارلىعى حالىقتىڭ تەڭگەگە دەگەن سەنىمىن ارتتىرۋ ٴۇشىن ىستەلۋدە. وعان قوسا، دوللار تۇرىندەگى دەپوزيتتەردىڭ جىلدىق سىياقىسى 4 پايىزدان 3 پايىزعا ازايدى. ال، تەڭگە دەپوزيتتەردىڭ كەپىلدىك ەتىلەتىن سوما كەرىسىنشە ەكى ەسەلەنبەك. دەگەنمەن دەدوللوريزاسيا ويداعىداي ناتيجە بەرەدى دەگەنگە كۇمانمەن قارايتىن ساراپشىلار از ەمەس.

مەرۋەرت ماحمۇتوۆا، تاۋەلسىز ساراپشى:

-بۇگىنگى كۇنى ٴبىزدىڭ بار كىرىسىمىز ەكسپورتتان. مۇنايدان ٴتۇسىپ وتىر. ٴبىزدىڭ شيكىزاتتارىمىز شەت ەلگە دوللارمەن ساتىلادى. سول ارقىلى بيۋدجەتكە اقشا دوللارمەن تۇسەدى. ٴتىپتى، مەملەكەتتىك اكتيۆتەر دوللارمەن ساقتالعان. سول حالىقتىڭ دوللارعا دەگەن سەنىمى ٴبارىبىر باسىمىراق.

باعانى تەك تەڭگەمەن ايتۋ اسىرەسە جىلجىمايتىن مۇلىك نارىعىندا قيىندىق تۋعىزاتىن سىڭايلى. سەبەبى بۇرىن باسپانا قۇنى بىرنەشە مىڭ دوللار دەپ ەسەپتەلسە، ەندى بىرنەشە ميلليون تەڭگە دەپ ٴتۇسىنۋ وڭاي ەمەس. ال سۋ جاڭا كولىك مىنگىسى كەلگەندەر ٴۇشىن قولايلى جاعداي جاساپ كەلگەن ەكىنشى دەڭگەيلى بانكتەر ٴقازىر نەسيە بەرۋدى شەكتەگەن. باسىم بولىگى تەك دوللارمەن ەسەپ ايىرىسامىز دەسە، ەكىنشىلەرى العاشقى جارنا مەن ۇستەمە پايىز كولەمىن كوبەيتىپ ۇلگەرگەن. سوندىقتان اۆتوسالونداردىڭ جۇمىسى جاڭا جىل قارساڭىندا تۇرالاپ تۇر.

يۋريي كولومىچەنكو، اۆتوسالوننىڭ كولىك ساتۋ جونىندەگى ديرەكتورى:

-اۆتوسالونداعى بارلىق كولىكتەردىڭ باعاسى شارتتى بىرلىك بويىنشا كورسەتىلگەن. سەبەبى، ادامدارعا سولاي ىڭعايلى. تەك كولىكتى ساتارعا كەلگەندە تەڭگەگە شاعامىز. ەندى شارتتى بىرلىك دەگەن ۇعىم جويىلسا بيۋدجەت پەن كومپانيا ساياساتىن قايتا قاراستىرۋىمىزعا تۋرا كەلەدى.

ۇكىمەت پەن ۇلتتىق بانك دەۆالۆاسيانى بولدىرماۋ شارالارىن دا قولعا العاندارىن مالىمدەدى. سونداي-اق، اقشا ايىرباسىنا نارىقتا الىپ-ساتارلىقتى شەكتەۋ ەنگىزىلگەن بولاتىن. ساتۋ مەن ساتىپ الۋدىڭ ايىرماشىلىعى كەمى 10-شى اقپانعا دەيىن وزگەرمەۋى ٴتيىس. ول ٴۇشىن ۇلتتىق بانك ۇكىمەتپەن بىرلەسىپ، ۆاليۋتا ايىرباستاۋ پۋنكتتەرىنە قاتىستى تالاپتاردى كۇشەيتىپ وتىر. ەگەر ەرەجە ەسكەرىلمەسە جاپپاي ليسەنزيالارىنان ايىرىلاتىن بولادى. 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!