باعا ساياساتى رەتكە كەلمەسە، ەلىمىزدە جانارماي تاپشىلىعى باستالۋى مۇمكىن

تىعىرىقتان شىعۋدىڭ ٴبىر جولى – جانارماي باعاسىن كوتەرۋ. كىشىگىرىمدەردى ايتپاعاندا، ەلىمىزدەگى ەڭ ٴىرى كومپانيالار وسىلاي دەپ دابىل قاعۋدا. ايتۋلارىنشا، ۇكىمەت بولشەك ساۋداداعى باعانى بەلگىلەپ، كوتەرمە نارىقتى ەسكەرۋسىز قالدىرعان. ەندى بەنزيندى قىمباتقا العان كاسىپكەرلەر، مەملەكەتتىك مەجەدەگى باعاعا ساتا الماي، كاسىپتەرىن جابۋعا ٴماجبۇر ەكەن.

دەنيس تراندوفيلوۆ، “helios” جشس ماركەتينگ جانە ساۋدا ٴبولىمىنىڭ ديرەكتورى:

- ەگەر كوتەرمە نارىقتاعى جاعداي قالىپقا تۇسپەسە، وندا ٴبىزدىڭ كەي ايماقتارداعى بەكەتتەرىمىزدىڭ جۇمىسىن امالسىز توقتاتۋىمىزعا تۋرا كەلەدى. سوندىقتان باقىلاۋشى ورگانداردان ٴبىزدى ەمەس، كوتەرمە باعامەن ساتۋشىلاردى جاۋاپقا الۋلارىن سۇرايمىز.

الپاۋىت كومپانيالاردىڭ ٴوزى وسىلايشا زار قاعىپ جاتقاندا، ودان وزگەلەرى بۇلاي جالعاسا بەرسە، ٴتىپتى، وزدەرىن “بانكروت” دەپ جاريالاماق. سەبەبى اي 92، 93 ماركالى بيزيندەردى قويىپ، ديزەل وتىنىنىڭ نارىقتاعى كوتەرمە قۇنى 100 تەڭگەگە جەتكەن. 

رۋسلان مۇحامەدقاليەۆ، “t-oil” جشس ديرەكتورىنىڭ ورىنباسارى:

ٴ-بىز بۇل ماسەلەنىڭ شەشىمىن سۇراپ مۇناي جانە گاز مينيسترلىگىنە نەشە قايتارا ٴوتىنىش بىلدىردىك. ٴبىراق ەشقانداي تۇشىمدى جاۋاپ الا المادىق.

ويتكەنى ۇكىمەتتىڭ تەجەۋىنەن كەيىن كوك تيىنسىز قالدىق. بۇلاي ۇزاققا شىدامايمىز.

جانارماي باعاسىنىڭ جىل سايىن ەمەس، اي سايىن ٴوسۋ ەكى ورتادا قاراپايىم تۇتىنۋشىلاردىڭ قالتاسىن قاعۋدا.

قۋانىش راقىموۆ، كولىك جۇرگىزۋشىسى:

- باعا قىمبات. قالتامىز كوتەرمەيدى. اسىرەسە، جۇرگىزۋشىلەرگە قيىن. سونداي مۇنايلى جەردە تۇرىپ.

قايتكەنمەن، ەستەرىڭىزگە سالا كەتەيىك، اپتا باسىندا عانا باسەكەلەستىكتى قورعاۋ اگەنتتىگى باعانى نەگىزسىز كوتەردى دەپ “گەليوس” پەن “قازمۇنايگاز”-عا قاتىستى ٴىس قوزعاعان بولاتىن. سونداي-اق باسقا دا جانارماي بەكەتتەرىن تەكسەرۋ ٴالى ٴجۇرىپ جاتىر. ەگەر ولاردىڭ باعانى سەبەپسىز كوتەرگەندەرى دالەلدەنسە، بارلىعىنا ٴىرى كولەمدە ايىپپۇلدار سالىنباق. 

قۇرالاي پيونەر

http://www.ktk.kz/kz/news/video/2011/07/21/10009

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!