ٴازىربايجاندا قازاقستاندىق جوعارى سۇرىپتى ۇن ساتىلىمعا ٴتۇستى

 استانا. 12 اقپان. baq.kz – ٴازىربايجان ەلىندە «بايتەرەك» دەگەن ساۋدا بەلگىسىمەن جوعارى سۇرىپتى قازاقستاندىق ۇن شىعارىلىپ جاتىر. قازاق دالاسىندا پىسكەن التىن ٴداندى كاسپيي تەڭىزى بويىنشا كورشىمىزدىڭ نارىعىنا شىعارۋ «باكۋ بيداي تەرمينالى» ارقىلى جۇزەگە اسۋدا.

 بۇل نىسان قوس ەلدىڭ قولداۋىمەن ٴازىربايجانداعى بۇرىنعى بالىق پورتىنىڭ اۋماعىندا بوي كوتەرگەن بولاتىن. 2006 جىلى ەكى ەلدىڭ باستاماسىمەن قوس تاراپتىڭ بىردەي ۇلەسىنىڭ ارقاسىندا «باكۋ بيداي تەرمينالى» اتتى ورتاق كاسىپورىن قۇرىلدى. جاڭا نىسان قازاقستاندىق بيدايدىڭ ەكسپورتىن ارتتىرىپ، ٴازىربايجاندى جوعارى ساپالى سارى التىن جانە ودان وندىرىلەتىن ونىمدەرمەن قامتاماسىز ەتۋى ٴتيىس بولاتىن. نىسان ۇن تارتاتىن كەشەن مەن بيداي تەرمينالىنان تۇرادى. تەرمينال بيداي ساقتاۋعا ارنالعان 5 قويمامەن قامتىلعان. ٴبىر ۋاقىتتا مۇندا 15 مىڭ توننا سارى التىن ساقتاۋعا بولادى. ۇن تارتۋ كەشەنىندەگى زاماناۋي قوندىرعىلار جىلىنا 50 مىڭ توننا بيداي وڭدەۋگە مۇمكىندىك بەرەدى. تەرمينال ارقىلى بيدايدى بۇدان 10 ەسە كوپ كولەمدە جەتكىزۋگە بولادى. وسىنىڭ بارلىعى قوس تاراپتىڭ بۇل ىسكە 12 ملن دوللار ورتاق قاراجاتتى جۇمساۋىنىڭ ارقاسىندا ىسكە اسىپ وتىر. باكۋدەگى تەرمينال ٴازىربايجاندى ساپالى بيداي جانە دايىن ۇن ونىمدەرىمەن قامتاماسىز ەتۋدەن بولەك، قازاقستاندىق سارى التىندى كاۆكاز بەن قارا تەڭىز ەلدەرى، سونداي-اق ەۋرووداق مەملەكەتتەرىنە جەتكىزۋدىڭ ماڭىزدى ٴبىر جولى بولىپ وتىر.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!