اۋىزسۋ التىننان دا قىمبات قۇندىلىققا اينالادى

قازاق ەلى مەن «اسپاناستى ەلى» اراسىندا ورتاق سۋ كوزدەرىن ٴبولىسۋدىڭ وسىعان دەيىن بولعان بارلىق دەرلىك تۇيىندەرى ەندى ٴۇش جىلدان كەيىن تارقاۋى ىقتيمال: كەشە استانا قازاقستان مەن قىتايدىڭ ترانسشەكارالىق وزەندەر سۋىن ٴبولۋ بويىنشا كەلىسىمدى 2014 جىلى بەكىتۋى مۇمكىندىگى جاريالاندى. بۇل جاڭالىق كەشە ەلوردادا جۇمىسىن باستاعان يسلام ىنتىماقتاستىعى ۇيىمىنىڭ كەڭەسشىلىك توبىنىڭ جيىنىندا جاريا ەتىلدى. ايتپاقشى، وسى وتىرىستا تاعى ٴبىر جاڭالىق ٴمالىم بولدى: جاقىندا عانا قازاق جەرىندە ٴوز اتاۋىن اۋىستىرعان وسىناۋ جاھاندىق مۇسىلمان ۇيىمىنا قازاقستاننىڭ ٴتوراعالىعى بارىسىندا الەمدەگى بارلىق يسلام ەلدەرىنىڭ ورتاق سۋ ستراتەگياسى قابىلدانادى دەپ كۇتىلۋدە.

كەشە استانادا يسلام ىن­تى­ماقتاستىعى ۇيىمىنا قاتىسۋشى ەلدەردىڭ سۋ ستراتەگياسىن ازىرلەۋ بويىنشا كونسۋلتاتيۆتىك توپتىڭ ەكىنشى وتىرىسى اشىلدى. عاسىر­دىڭ ورتاسىنا قاراي، اۋىزسۋ ال­تىن­نان دا قىمبات قۇندىلىققا اي­نالۋى عاجاپ ەمەس. تاياۋدا بۇۇ ساراپشىلارى جەر شارى تۇرعىن­دارىنىڭ سانى 2011 جىلى 7 ميل­لياردتان اسىپ كەتەتىندىگى جونىندە بولجام جاريا ەتتى. ارى قاراي، 2023 جىلعا قاراي ادامزات 8 ميل­لياردتىق مەجەنى باعىندىرادى ەكەن! ال ىشۋگە جارامدى سۋ رە­سۋرس­تارى دوڭگەلەنگەن دۇنيەدە تەڭ­دەي تارالماعان. باسىم كوپ­شىلىگى قۇمدى دالادا قونىستانعان اراب الەمى ٴۇشىن اۋىزسۋ ماسەلەسى - كۇن تارتىبىندەگى كۇيىپ تۇرعان ٴما­سەلەلەردىڭ ٴبىرى ەكەندىگى داۋسىز. بۇل جەردە قازاق جەرىنىڭ ۇشتەن ەكىسى، 67 پايىزى ٴشول جانە ٴشو­لەيت­ٴتى ايماقتار ەكەندىگىن دە ەسكە العان ٴجون. ەندەشە، اشتىقتان دا جا­مان شولگە ۇرىنىپ، اڭقا كەپ­پەۋى ٴۇشىن جاتجۇرتتاردان اعىپ كە­لەتىن سۋلاردىڭ تارتىلماۋى ٴھام تاۋسىلماۋى ماسەلەسىن تەزدەتىپ، تاياۋ جىلداردا شەشىپ العان ٴجون. مۇنى قازاقستان باسشىلىعى دا باعامداپ وتىرعانعا ۇقسايدى: نۇرسۇلتان نازاربايەۆتىڭ بەيجىڭگە مەملەكەتتىك ساپارى كەزىندە قا­زاقستان مەن قىتاي ترانسشەك­ارا­لىق وزەندەر سۋىنىڭ ساپاسىن قورعاۋ تۋرالى ۇكىمەتارالىق كە­لىسىمگە قول قويىلعان بولاتىن. ەل­­باسىنىڭ ساپارى قورىتىن­دى­سىندا ەكى جاق «قازاقستان رەس­پۋبليكاسى مەن قحر-دىڭ ترانس­شەكارالىق وزەندەرىندەگى سۋدى ٴبولۋ بويىنشا نەگىزگى تەحنيكالىق جۇمىستاردى ىسكە اسىرۋ جوسپارىن» بەلسەندى ىلگەرىلەتۋگە ورتاق نيەت ٴبىلدىردى.
ال كەشەگى جيىن اياسىندا جۋر­ناليستەرگە تۇسىنىكتەمە بەرگەن اۋىل شارۋاشىلىعى مينيستر­لىگىنىڭ سۋ رەسۋرستارى كوميتەتىنىڭ ٴتوراعاسى ا.ورمان، اسىرەسە، ٴدال وسى قحر-مەن سۋدى ٴبولىسۋ بويىن­شا كەلىسىمگە قول قويۋ ماسەلەسىنىڭ ماڭىزدىلىعىن باسا ايتتى. «قوس ەل پرەزيدەنتى تاپسىرما بەردى،-دەدى اناربەك ورمان. - بۇگىندە قىتاي جانە قازاق جاعىنىڭ عى­لىمي-زەرتتەۋ جانە جوبالاۋ ينس­تيتۋتتارى بۇل ماسەلەمەن اي­نا­لىسۋدا. بارلىق زەرتتەۋ جۇ­مىس­تارىن زەردەلەپ جاتىر. سونىڭ ناتيجەسى بويىنشا، 2014 جىلى قىتاي حالىق رەسپۋبليكاسىمەن ٴتيىستى كەلىسىمگە قول قويىلادى دەپ ويلايمىن».

ايحان ٴشارىپ

http://www.aikyn.kz/index.php؟option=com_content&task=view&id=8904&itemid=2

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!