استىق بيىل مول بولادى-اۋ!..

استانا. 16 ٴساۋىر. baq.kz - بيىل «قازگيدرومەت» ەگىنشى قاۋىمدى قۋانتىپ وتىر. «جالپى، ۇستىمىزدەگى جىلى قازاقستاننىڭ بارلىق وڭىرلەرىندە كوكتەمگى دالا جۇمىستارىن جۇرگىزۋ كەزەڭىندە توپىراقتىڭ ىلعال قورى نەگىزىنەن، قاناعاتتانارلىق جانە وڭتايلى دەڭگەيدە بولادى!» دەدى «قازگيدرومەتتىڭ» اگرومەتەورولوگيالىق بولجاۋ باسقارماسىنىڭ باسشىسى ەربولات مۇقانوۆ.

راس، وسى سينوپتيكتەردىڭ بول­جامىنشا، مامىر ايىندا پاۆ­لودار وبلىسىندا، باتىس قا­زاقستان جانە اقتوبە وبلىستا­رىنىڭ اۋماعىندا جاۋىن-شا­شىننىڭ مولشەرى نورمادان تومەن بولادى دەپ كۇتىلۋدە، ال قالعان ايماقتاردا – نورمادان جوعارى.

اماندىق بولسا، بيىل قازاق ەلى كوڭىل قۋانتارلىق كولەمدە ەگىنگە قول جەتكىزۋى كەرەك. ويتكەنى اگرارشى-عالىمداردىڭ دا باعا­لاۋىنشا، «اعىمداعى اۋىل شارۋاشىلىعى جىلىنىڭ باسى ەلىمىزدىڭ نەگىزگى استىق سەبەتىن ايماقتارى ٴۇشىن قولايلى بولىپ قالىپتاسۋدا». وتكەن جىلى شىلدە ايىندا شەكتەن تىس جاۋعان جاۋىن-شاشىننان كەيىن توپى­راق­تىڭ كۇزدىك ىلعالى مول بولىپ قالىپتاستى، سونداي-اق قىس مەزگىلىندە قازاق جەرىنە جەتكىلىكتى مولشەردە قار ٴتۇستى. سوندىقتان اگرارشىلار قوردالانعان ىلعالدى ساقتاپ، ونى ٴتيىمدى پايدالانسا، كوكتەمگى دالا جۇمىستارىن وتكىزۋ ٴۇشىن سونىڭ ٴوزى جەتكىلىكتى.

اۋىل شارۋاشىلىعى مينيستر­لىگىنىڭ اقپارىنشا، رەسپۋب­ليكا­مىزدا 2015 جىلى اۋىل شارۋا­شىلىعى داقىلدارى 21،5 ميلليون گەكتار القاپقا ەگىلەتىن بولادى. ونىڭ ىشىندە ٴداستۇرلى تۇردە بيداي جانە باسقا ٴداندى داقىلداردىڭ ۇلەسى باسىم: 15،2 ميلليون گەكتار­دى الىپ جاتادى. بۇل رەتتە مايلى داقىلدار 2،2 ميلليون گەكتارعا ەگىلەدى. ال مالعا ارنالعان ازىق-جەمگە – 3،7 ميلليون گەكتار، كوكونىس داقىل­دارى مەن كارتوپقا – 413،6 مىڭ گەكتار بولىنەدى.

اشم كەيبىر ايماقتاردا «تۇقىم تاپشىلىعى» ورىن العان­دىعىن حابارلايدى، ٴبىراق ول وبلىسىشىلىك، وبلىسارالىق ال­ماسۋ جانە بيدايدى فورۆاردتىق ساتىپ الۋ باعدارلاماسى ەسەبىنەن ەندىگى تولتىرىلىپتى.

كوكتەمگى دالا جۇمىستارىن جۇرگىزۋ ٴۇشىن شارۋالار «قازاگرو» حولدينگى مەن كوممەرسيالىق بانكتەر ارقىلى ەندىگى 60 ميل­ليارد تەڭگە كولەمىندە بيۋدجەتتىك نەسيە الدى.

قازىرگى ۋاقىتتا اۋىل شارۋا­شى­لىعى تاۋارلارىن ٴوندىرۋ­شىلەرگە 47 ميلليارد تەڭگە بەرىل­ٴدى، ونىڭ ىشىندە «قازاگرو» حول­دينگى ارقىلى – 21،8 ملرد تەڭگە، فورۆاردتى ساتىپ الۋ بويىنشا – 11،8 ملرد تەڭگە ارنا تارتقان. ەكىنشى دەڭگەيلى بانكتەر ارقىلى 25،2 ملرد تەڭگە يگەرىلدى.

بۇدان بولەك، وسىمدىك شارۋا­شىلىعى سالاسىن سۋبسيديالاۋعا اعىمداعى جىلى 78،2 ميلليارد تەڭگە باعىتتالادى. سونىمەن بىرگە مەملەكەتتىك رەسۋرسقا 3،5 ميلليارد تەڭگەگە استىق ساتىپ الىنادى.

ەگىنشىلەر جانار-جاعار­مايدان دا كەندە بولماۋعا ٴتيىس. اشم كوكتەمگى دالا جۇمىستارىن جۇرگىزۋگە قاجەتتى ديزەل وتى­نىنىڭ كولەمىن 366 مىڭ توننا مولشەرىندە بەلگىلەدى. 13 ساۋىردەگى جاعداي بويىنشا 1 ٴليترىن 81 تەڭگەدەن – 146،8 مىڭ توننا، ال ەركىن نارىقتان 35،3 مىڭ توننا ديزەل وتىنى ساتىپ الىندى. جالپى، رەسپۋبليكا بويىنشا اۋىل شارۋاشىلىعى تەحنيكا­سىنىڭ دايىندىعى 93-99% دەڭگەيىندە ەكەن.

قازاقستاندا جازعى داقىلدار ٴقازىردىڭ وزىندە 353 مىڭ گا القاپقا سەبىلىپ ۇلگەردى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!