استانانىڭ جاڭا بيۋدجەتى بەكىتىلدى

استانا. 31 ناۋرىز. baq.kz - بۇگىن قالالىق ٴماسليحاتتىڭ كەزەكتەن تىس سەسسياسى ٴوتىپ، كۇن تارتىبىندە استانانىڭ 2015 جىلعا ارنالعان بيۋدجەتىن وزگەرتۋ، جەڭىستىڭ 70 جىلدىعىنا وراي الەۋمەتتىك كومەك كورسەتۋ ەرەجەلەرىن وزگەرتۋ، سونداي-اق، جەر تەلىمدەرىن مەملەكەتتىڭ قاجەتتىلىگى ٴۇشىن الۋ تۋرالى كەلىسىمشارتتار جوباسىن ماقۇلداۋ ماسەلەلەرى قاراستىرىلدى. بۇل تۋرالى استانا اكىمدىگىنىڭ رەسمي سايتى حابارلادى.

سەسسياعا استانا قالاسى اكىمىنىڭ ورىنباسارى اندرەي لۋكين، قالالىق ٴماسليحات حاتشىسى سانسىزباي ەسىلوۆ، ەلوردا اۋداندارىنىڭ اكىمدەرى، قالالىق باسقارمالاردىڭ باسشىلارى قاتىستى.

استانا قالاسى ەكونوميكا جانە بيۋدجەتتى جوسپارلاۋ باسقارماسىنىڭ باسشىسى جانات نۇرپەيىسوۆتىڭ حابارلاۋىنشا، استانانىڭ 2015 جىلعى ناقتىلانعان بيۋدجەتىنىڭ كولەمى 349،861 ملرد تەڭگەنى قۇرايدى. جەكە تابىستار بويىنشا تۇسكەن قارجى 169،194 ملرد تەڭگە، رەسپۋبليكا بيۋدجەتىنەن ترانسفەرتتەر 168،882 ملرد تەڭگەنى قۇرايدى.

قوسىمشا قارجى الەۋمەتتىك جانە ينفراقۇرىلىمدىق جوبالاردى ىسكە اسىرۋعا جۇمسالاتىن بولادى. ەلوردا جولدارى مەن كوشەلەرى قايتا جوندەلىپ، سالىنادى، ينجەنەرلىك جەلىلەر تارتىلادى، ايالداما بەكەتتەرى قالپىنا كەلتىرىلەدى، جەدەل جاردەم بريگادالارى ٴۇشىن جاڭا ماشينالار ساتىپ الىنادى، قالالىق مەكتەپتەردىڭ جاپسارجايلارىن جوبالاۋ جانە جاڭا بالاباقشالار سالۋ جۇمىستارى جالعاسادى.

استانا اكىمىنىڭ ورىنباسارى ا. لۋكين اتاپ وتكەندەي، «نۇرلى جول» باعدارلاماسىنىڭ اياسىندا، بيۋدجەتتەن بولىنگەن قارجى ٴبىرىنشى كەزەكتە ەلوردادا جىلۋ ماگيسترالدارى مەن مەكتەپتەر سالۋعا جۇمسالادى. قالا اكىمدىگى تۇراقتى تۇردە بيۋدجەت قارجىسىن يگەرۋدى قاداعالاپ وتىرادى، بيۋدجەتتىك باعدارلامالار اكىمشىلەرىمەن بىرلەسكەن جۇمىستار جۇرگىزىلەدى،دەبيتورلىق جانە كرەديتورلىق قارىزداردىڭ وسۋىنە جول بەرمەۋ - تۇراقتى باقىلاۋدا.

ٴماسليحات سەسسياسىنىڭ كۇن تارتىبىنە ۇوس جەڭىستىڭ 70 جىلدىعىنا وراي كومەك كورسەتۋ ماسەلەسى ەنگىزىلدى. استانا قالاسىجۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ٴلاززات ابۋەۆانىڭ ايتۋىنشا، ۇوس ارداگەرلەرى مەن مۇگەدەكتەرىنە ٴبىر ۋاقىتتا قارجىلاي وتەماقى تولەۋ، ٴبىرىڭعاي كيىم فورماسىمەن قامتۋ، جەرلەۋ ورىندارىنا بارۋ جولاقىسىن تولەۋ، سونداي-اق، ساناتوريالىق-كۋرورتتىق ەم الۋ اقىسىن تولەۋ ماسەلەلەرى قاراستىرىلعان.

دەپۋتاتتار جاڭا مەكتەپ پەن بالاباقشا سالۋ ٴۇشىن جەر الۋ كەلىسىمشارتتارى جوباسىن، ٴبىلىم بەرۋ ماسەلەلەرى، الەۋمەتتىك سالا بويىنشا كەيبىر قالالىق كوميسسيالاردىڭ قۇرامىن وزگەرتۋدى، ۇەۇ بىرلەسە جۇمىس ىستەۋدى ماقۇلدادى. 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!