استانادا 289 تۇرعىن ٴۇي زاڭداستىرىلعان

 استانا. 24 جەلتوقسان. baq.kz - 2017 جىلدان باستاپ قازاقستاندا كىرىستى جاپپاي دەكلاراسيالاۋ ناۋقانى باستالادى. بۇل شارا كىرىستەردىڭ جاپپاي قامتىلۋى ارقاسىندا سالىق ٴوسىمىنىڭ كوبەيۋىنە جول اشادى، دەپ حابارلايدى استانا قالاسى بويىنشا مەملەكەتتىك كىرىستەر دەپارتامەنتىنىڭ ٴباسپاسوز قىزمەتى.

 قازاقستان ازاماتتارىنىڭ مۇلكى مەن كاپيتالىن زاڭداستىرۋ ازاماتتاردىڭ كىرىستەرىن جاپپاي دەكلاراسيالاۋ ناۋقانى قارساڭىندا جۇرگىزىلىپ جاتىر.
ەسكە سالا كەتەيىك، قازاقستانداعى اقشا مەن مۇلىكتى زاڭداستىرۋ ناۋقانى ۇستىمىزدەگى جىلدىڭ 1 قىركۇيەگىندە باستالدى. مۇلىكتى زاڭداستىرۋعا وتىنىشتەر 2015 جىلدىڭ 30 قاراشاسىنا دەيىن قابىلدانىپ، ٴبىر اي كولەمىندە قارالادى. كاپيتالدى زاڭداستىرۋعا ٴوتىنىشتى 2015 جىلدىڭ 31 جەلتوقسانىنا دەيىن بەرۋگە بولادى.
مۇلىكتى زاڭداستىرۋعا قۇجات قابىلداۋ مەرزىمى باستالعالى بەرى استانا قالاسىندا 972 ٴوتىنىش كەلىپ ٴتۇستى. استانا قالاسى مەملەكەتتىك كىرىس دەپارتامەنتىنىڭ مالىمدەۋىنشە، بۇگىنگى تاڭدا 289 تۇرعىن ٴۇي، تۇرعىن ۇيگە جاتپايتىن 249 قۇرىلىس نىسانى جانە 10 كوممەرسيالىق نىسان زاڭداستىرىلعان. زاڭداستىرىلعان مۇلىك قۇنىنىڭ جالپى سوماسى 2 ميلليارد تەڭگەدەن اسادى. ال اقشالاي قاراجاتتى زاڭداستىرۋ بويىنشا 20 جەلتوقسان كۇنگى قورىتىندىعا ساي، جيناق شوتتارداعى سوما 578 ميلليون 196 مىڭ تەڭگەنى قۇرايدى.
ايتا كەتەيىك، اقشانى، قۇندى قاعازداردى زاڭداستىرۋ ٴۇشىن ەكىنشى دارەجەلى بانكتەرگە جۇگىنۋ كەرەك. زاڭداستىرىلعان ۇلتتىق نەمەسە شەتەلدىك ۆاليۋتاداعى قارجى قازاقستان رەسپۋبليكاسىنىڭ ەكىنشى دارەجەلى بانكىنەن اشىلعان جيناق شوتتا بولۋى ٴتيىس.
استانالىق فيسكالدار اقشا مەن مۇلىكتى زاڭداستىرۋ ارقىلى ازاماتتاردىڭ جاۋاپكەرشىلىكتەن بوساتىلاتىنىن جانە ٴوز قارجىسىن «قالتادا» ساقتاپ قالۋىنا مۇمكىندىك بەرەتىنىن ەسكەرتەدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!