BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازاقستاندا جىل سوڭىنا دەيىن قوسىمشا 9 ميكروقارجى ۇيىمى قۇرىلادى

استانا، baq.kz ٴتىلشىسى. 2018 جىلدىڭ سوڭىنا دەيىن ەلىمىزدە ميكروكرەديت ۇسىناتىن قوسىمشا 9 ميكروقارجى ۇيىم قۇرىلادى. بۇل جونىندە كەزەكتى ۇكىمەت وتىرىسىندا قر ۇلتتىق ەكونوميكا ٴمينيسترى تيمۋر سۇلەيمەنوۆ مالىمدەدى.

«ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى شەڭبەرىندە قالالارداعى ميكروكرەديتتەۋ ٴۇشىن 2018 جىلى بولىنگەن قارجى 17 ملرد تەڭگەنى قۇرادى. قازىرگى كەزدە 11،1 ملرد تەڭگە يگەرىلىپ، 1 042 جوبا قارجىلاندىرىلدى. 2018 جىلدىڭ 1 قاڭتارىنداعى جاعدا بويىنشا سالىق ورگاندارىنىڭ مالىمەتىنە سايكەس، 2017 جىلى ميكروكرەديت العان باعدارلاما قاتىسۋشىلارى 7،6 ملرد تەڭگەگە ٴونىم شىعاردى، مىڭعا جۋىق جۇمىس ورنىن قۇردى جانە ساقتاپ قالدى، سونداي-اق، بيۋدجەتكە 299 ملن تەڭگە سالىق تولەدى. 2018 جىلدىڭ ناتيجەسى بويىنشا بيزنەستىڭ سالىق ەسەپتىلىگى باعالانىپ، ياعني، ەكونوميكاداعى بيۋدجەت قاراجاتى تولىق قولدانىلعاننان كەيىنگى تيىمدىلىك كورسەتكىشتەرىنىڭ ايتارلىقتاي ارتۋى كۇتىلۋدە»، - دەدى مينيستر.

سۇلەيمەنوۆتىڭ ايتۋىنشا، ەكونوميكا سالالارىنىڭ بولىنىسىندە اتالعان باعدارلاما اياسىندا قارىز الۋشىلاردىڭ كوپ بولىگى ساۋدا، قىزمەت كورسەتۋ، وڭدەۋشى ونەركاسىپ جانە قۇرىلىس سالالارىندا قىزمەت اتقارادى.

«ميكروكرەديتتەردى كەپىلدەندىرۋ بويىنشا 2018 جىلى 1،9 ملرد تەڭگەگە 320 شارت جاسالىپ، ٴاربىر ٴۇشىنشى قارىزعا كەپىلدىك ۇسىنىلعان. اعىمداعى جىلدىڭ ٴساۋىر ايىندا ٴىسىن جاڭا باستاعان كاسىپكەرلەردىڭ شاعىن جوبالارىنا قولداۋ كورسەتۋ ماقساتىندا باعدارلامانىڭ قارىز الۋشىلارى سانىنان بەلسەندى كاسىپكەرلەر الىنىپ تاستالدى»، - دەپ باياندادى ۆەدومستۆو باسشىسى.

بەلگىلى بولعانداي، كرەديتتەردىڭ قايتارىلماۋ تاۋەكەلى جوعارى بولعاندىقتان، باعدارلاماعا قاتىساتىن ەكىنشى دەڭگەيلى بانكتەردىڭ سانى ايتارلىقتاي قىسقارىپ وتىر.

«وسىعان وراي، اعىمداعى جىلى بانكتىك قارجىلاندىرۋدان بولەك، وڭىرلەردە جەڭىلدىكتى نەسيەلەندىرۋدىڭ التەرناتيۆتىك ينفراقۇرىلىمىن قۇرۋ ۇسىنىلىپ وتىر. قازىرگى ۋاقىتتا «اتامەكەن» ۇلتتىق كاسىپكەرلەر پالاتاسىنىڭ قاتىسۋىمەن 4 وبلىستا، ولار قوستاناي، جامبىل، قىزىلوردا، ماڭعىستاۋدا ميكروقارجى ۇيىمدارى قۇرىلعان. اعىمداعى جىلدىڭ سوڭىنا دەيىن اقمولا، اتىراۋ، الماتى، اقتوبە، شىعىس قازاقستان، قاراعاندى، پاۆلودار، باتىس قازاقستان، سولتۇستىك قازاقستان وبلىستارىندا تاعى 9 ميكروقارجى ۇيىمى قۇرىلاتىن بولادى»، - دەدى سۇلەيمەنوۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي