ىشكى ىستەر ٴمينيسترى 21،5 ملرد قارىزدىڭ قالاي جابىلاتىنىن ٴتۇسىندىردى - قارجى|05 ماۋسىم 2018، 18:46
كۋرسى ۆاليۋت وبنوۆليايۋتسيا
استانا:

ىشكى ىستەر ٴمينيسترى 21،5 ملرد قارىزدىڭ قالاي جابىلاتىنىن ٴتۇسىندىردى

فوتو: primeminister.kz

ٴماجىلىستىڭ جالپى وتىرىسىندا قر ىشكى ىستەر ٴمينيسترى قالمۇحانبەت قاسىموۆ دەپۋتاتتارعا 21،5 ملرد تەڭگەنى قۇرايتىن دەبيتورلىق جانە كرەديتورلىق بەرەشەكتىڭ قالاي جابىلاتىنىن ٴتۇسىندىردى، دەپ حابارلايدى baq.kz ٴتىلشىسى.

وتىرىستا دەپۋتات قانات مۋسين قر ىشكى ىستەر مينيسترىنە ٴوزىن تولعاندىرىپ جۇرگەن ساۋالدى جولدادى.

«2017 جىلى ىشكى ىستەر مينيسترلىگىندە دەبيتورلىق جانە كرەديتورلىق بەرەشەكتەر بويىنشا قوماقتى قارجى جينالدى. دەبيتورلىق بەرەشەكتىڭ سوماسى 18،5 ملرد تەڭگەنى جانە كرەديتورلىق بەرەشەك 3 ملرد تەڭگەنى قۇرادى. قارىزدىڭ جالپى سوماسى – 21،5 ملرد تەڭگە. بيۋدجەتتىك كودەكسكە سايكەس، دەبيتورلىق ٴارى كرەديتورلىق بەرەشەكتىڭ بولۋى، بۇل – ساپاسىز اكىمشىلەندىرۋدىڭ قارجىلىق ٴتارتىپتىڭ السىزدىگىنىڭ كورسەتكىشى. سەبەبى، دەبيتورلىق بەرەشەك، بۇل مينيسترلىكتىڭ قاراجاتتى ٴتيىمسىز پايدالانۋىن كورسەتەدى. سونىمەن قاتار، ۆەدومستۆو ٴوز قىزمەتكەرلەرىنىڭ الدىنداعى جالپى بەرەشەك سوماسى - 1،9 ملرد تەڭگە. قۇرمەتتى قالمۇحانبەت نۇرماعانبەت ۇلى، دەبيتورلىق جانە كرەديتورلىق بەرەشەكتى قالاي جانە قاشان وتەيىن دەپ وتىرسىزدار»، - دەدى دەپۋتات.

ٴوز كەزەگىندە قالمۇحانبەت قاسىموۆ قويىلعان ساۋالعا تولىق جاۋاپ بەرۋگە تىرىستى.

«وتكەن جىلى ٴبىزدىڭ مينيسترلىكتە 18،5 ملرد تەڭگەگە دەبيتورلىق كرەديت پايدا بولدى. ونىڭ ىشىندە 17 ملرد تەڭگەنى ٴبىز ەكى ۇشاقتى ساتىپ الۋعا جۇمسادىق. ٴبىرىنشى ۇشاقتى ٴبىز قىتايدان ساتىپ الامىز. وعان 14،2 ملرد تەڭگە تولەندى. ال بيىل 3،2 ملرد تەڭگە تولەنەدى. ٴقازىر ۇشاعىمىز 97% دايىن تۇر. جىلدىڭ اياعىندا ساتىپ الامىز. ەكىنشى ۇشاقتى الۋعا ۋكراينانىڭ حاركوۆ قالاسىنداعى زاۋىتقا تاپسىرىس بەردىك. ٴبىراق ولارمەن 1،5 جىل بويى سوتتاسىپ، مامىر ايىندا حاركوۆ وبلىسىنىڭ سوتى شەشىم شىعاردى. بىزگە زاۋىت 15 ملن دوللاردى قايتارادى»، - دەدى مينيستر.

وسى ورايدا ول ىشكى ىستەر مينيسترلىگىنىڭ كرەديتورلىق بەرەشەگىنە توقتالدى.

«مينيسترلىكتىڭ كرەديتورلىق بەرەشەگى وسى جىلدىڭ باسىندا 3 ملرد تەڭگەگە جەتتى. ونىڭ ىشىندە 1،8 ملرد تەڭگە ۇلتتىق ۇلان قىزمەتكەرلەرىنىڭ تۇرعىن ٴۇيدى جالعا الۋ بويىنشا، قىزمەتتىك ۇيلەردى جەكەشەلەندىرۋگە مەملەكەت بەرەتىن وتەماقى. ٴقازىر ٴبىز وسى جاعدايدى قارجى مينيسترلىگىمەن بىرگە شەشىپ جاتىرمىز. سونىمەن قاتار باسقا كرەديتورلىق بەرەشەگىمىز بار. مىسالى، 5 ايدىڭ ىشىندە ٴبىز 400 ملن تەڭگەنى قۇرايتىن قارىزىمىزدى تولىقتاي جاپتىق. قالعان سوما بويىنشا قارجى مينيسترلىگىمەن جۇمىس ىستەپ جاتىرمىز»، - دەپ تۇيىندەدى ٴسوزىن قالمۇحانبەت قاسىموۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي