BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

پىسىقتاۋ: ٴتورت ونەركاسىپتىك رەۆوليۋسيا ەكسكليۋزيۆ

فوتو: zakon.kz

ديقان ەگىنىن سالىپ، مالشى مالىن باعىپ، ۇستا سوقاسىن سوعىپ، قۇمىراشى قىش كۇيدىرىپ مامىراجاي تىرشىلىك ەتكەن ادامزاتتىڭ ٴومىر سالتىنا وزگەرىس ەنەتىنى ايقىن ەمەس ەدى. بۇلاي كۇنكورىس ٴادىسى وزىنەن ٴوزى بەلگىلى، نەشەمە ۇرپاقتىڭ ماڭدايىنا و باستان تاعدىردىڭ جازۋى سياقتى كورىنگەن.

ٴبىراق xvii عاسىردان باستاپ، ٴوندىرىس كۇرت وزگەردى. ونەركاسىپ ٴبىر ەمەس، ٴتورت رەۆوليۋسيانى باسىنان كەشتى دەپ ٴجۇرمىز. ەلىمىزدەگى سوڭعى قوعامدىق-ساياسي ترەندتەرگە بايلانىستى وسى رەۆوليۋسيالاردى جادىمىزدى جاڭعىرتىپ، ٴبىر پىسىقتاپ الساق.

ٴبىرىنشى ونەركاسىپتىك رەۆوليۋسيا

بيدايدى تاسپەن ۇگىتۋدى جانە قول ديىرمەنمەن تارتۋدى سالىستىرايىق.

تاسپەن ۇگىتەتىن ادام بالكىم، كۇنۇزاق تىرباڭداپ، ٴوزى مەن وتباسىنا جەتەرلىك ۇن شىعارار. ال ديىرمەنمەن تارتقان ادامدا باسى ارتىق ۇن قالىپ، ونى ساتىپ نە باسقا تاۋارعا اۋىستىرىپ الماس پا ەدى؟

ەندەشە تاپ وسى، اۋەلدە پايداكۇنەمدىك (مەركانتيليزم) دەپ اتالعان، وسى كۇنى جۇمسارتىلىپ - «جاقسى ٴومىر سۇرۋگە ۇمتىلىس» دەپ قولپاشتالاتىن قاسيەت ادام بالاسىن باسى ارتىق ٴونىم الۋدىڭ ٴايلا-تاسىلىن كۇندىز-تۇنى ويلاۋعا ٴماجبۇر قىلدى. سوندىقتان قولونەرشىلەر قول ديىرمەندى دە مىسە تۇتپاي، ەندى ەسەكپەن، سۋمەن، جەلمەن اينالاتىن ديىرمەن جاساۋعا كوشتى. دوربالاۋدىڭ ورنىنا اربالاۋ ٴداۋىرى باستالدى. تاريحشىلار ول ٴداۋىردى ايقىن تىركەگەن تۇس – xvii عاسىر.

بۇعان دەيىن بۇكىل جەر بەتىندەگى ادامزاتتىڭ ٴومىر سالتى شامامەن ۇقساس بولاتىن. ادامزات باسى ٴبۇتىن اگراريي ەدى. ولاردىڭ ىشىندە اعىلشىندار قاعىلەزدەۋ بولىپ شىعىپتى. مول ٴونىم جولىندا تىڭايتقىش سەبۋ، تۇقىم ساقتاۋ، ورۋ جانە باستىرۋ ىسىندە بۇل حالىق العا كەتتى دەلىنەدى. بۋمەن جۇرەتىن سوقا باسقا كاسىپ يەلەرىن دە قاناتتاندىردى. ىزە-شالا توقىما ونەركاسىبى، مەتاللۋرگيا مەن جول-تاسىمال سالاسى دا مەحانيكالانىپ، جۇزەيىپ شىعا كەلدى.

شارۋا مەن جۇمىسشىعا، ودان قالدى ۇستالار مەن باسقا دا جالقى ەڭبەك ادامىنا العاشقى جايسىز بەلگى دە وسى تۇستا كورىندى. ايتالىق، ەدموننىڭ مەحانيكالىق تىگىن ستانوگى ونداعان تىگىنشىنى الماستىرا الاتىن. ال گاز لامپاسىنىڭ شىعۋى – كاسىپورىنداردا ىمىرت ۇيىرىلگەنشە عانا جۇمىس ىستەۋ سالتىن بۇزىپ، ەندى جۇمىس كۇنى ۇزاردى.

جۇمىس كۇنى ۇزاردى، ٴبىراق جالاقى قىسقاردى. ونەركاسىپتىڭ ىقشامدالعان سايىن تيىمدىلىگى ارتا بەرەتىن قاسيەتى وسى تۇستاردا بەلگىلى بولدى. قىزىق سوندا، ونەركاسىپتىك رەۆوليۋسيا بولماي جاتىپ، ونىڭ الەۋمەتتىك داعدارىسقا اكەلىپ سوعاتىنى سول كەزدە-اق ايتىلدى. مىسالى، كارل ماركس وسى كەزەڭدەردىڭ بەينەسىنە سۇيەنە وتىرىپ، ونەركاسىپتىك ٴونىمنىڭ وزىندىك قۇنى بارعان سايىن ارزانداپ، ەسەسىنە - مىڭداعان جۇمىسشىنىڭ قايىرشىلىققا ۇشىرايتىنىن جازعان ەدى. شىنىمەن، مىسالى اعىلشىن تىگىنشىسىنىڭ جالاقىسى باس-اياعى 30 جىل ىشىندە 3 ەسەگە كەمىدى. ۇستالار مەن باسقا دا قولونەرشىلەر داعدارىسقا ۇشىرادى. اتاپ تۇرىپ اتقا تاعا سوعاتىن، دوڭگەلەك جاسايتىن ۇستا ەندى زاۋىت سياقتى – ونىڭ جاساعانىن مىڭداپ قۇسىپ جاتاتىن تاجالعا توتەپ بەرۋگە قاۋقارى بولمادى. ەندەشە، كاسىپوداق ۇيىمدارىنىڭ العاشقى كورىنىستەرى دە وسى كەزدەردە قىلاڭ بەردى.

كەيىن ٴبىز، ەكونوميكالىق داعدارىستىڭ وسىنداي كورىنىسىن بارلىق دەرلىك رەۆوليۋسيالاردان كورەمىز.

ەكىنشى ونەركاسىپتىك رەۆوليۋسيا

ەكونوميكا الدە ونەركاسىپ جىلناماشىلارىنىڭ نەلىكتەن وسىنداي شارتتى اتاۋلارعا قۇمار ەكەنى بەلگىسىز. سەبەبى ەكىنشى ونەركاسىپتىك رەۆوليۋسيانىڭ مازمۇنى بىرىنشىسىنە ۇقساس: ول – وندىرىستەگى يننوۆاسيالار.

ەكىنشى رەۆوليۋسيانىڭ لوكوموتيۆى – اقش بوپ ەسەپتەلەدى. ال اقش توڭكەرىس جاساعان سالا – ستاندارتيزاسيا مەن كونۆەيەرلىك ٴوندىرىس.

ەرتەدە جاباي ۇستا سوققان ارباعا قاباي ۇستا دوڭگەلەك سوعا المايتىن. سەبەبى اركىمنىڭ ٴوزىنىڭ تۇرعىلىقتى جەرىندەگى ٴتۇرلى شارتتىلىقتارى، اقىر اياعى – قولتاڭباسى مەن ٴادىسى بار ەدى. ويلارى دا، ينجەنەرلىك ايلاسى دا اركەلكى بولاتىن. بۇل تاۋاردىڭ بەلگىلى قولونەرشىگە نەمەسە ارتەلگە تاۋەلدىگىنە اكەلىپ سوعاتىن. بۇل ماسەلەنى اقش-تا كونۆەيەرلىك ٴوندىرىس ٴادىسىنىڭ شىعۋى شەشتى. بۇل ٴادىستىڭ ەڭ كورنەكى وكىلى – گەنري فورد.

فوردتى تەحنيكالىق جاپپاي ٴوندىرىستىڭ جەمىسىن كورگەن العاشقى ادام دەۋگە بولادى. تەحنيكالىق تاپسىرما بەرۋ ارقىلى بىرى-بىرىنە سايكەس كەلە بەرەتىن قوسالقى بولشەكتەر جاساۋ مادەنيەتىنىڭ ەنگىزىلۋى – ستاندارتيزاسياعا اكەلدى. ال جۇمىس ورنىندا اركىمگە ناقتى مىندەت قويىپ، وعان ۋاقىتتان باستاپ، نورماعا دەيىن ەكشەپ بەرۋى – كونۆەيەرلىك ٴوندىرىستىڭ نەگىزىن قالىپتاستىردى. اتادان اسىپ تۋعان تۋما قولونەرشىلەرگە تاۋەلدىلىك ٴبىرجولا ٴۇزىلدى. از عانا ۋاقىتتىڭ ىشىندە اقش اۆتوموبيل دەرجاۆاسىنا اينالدى. ول ٴوز كەزەگىندە – مۇناي-حيميا، مەتاللۋرگيا سالاسىن سۇيرەپ اكەتتى.

جالپى، عىلىم مەن ونەركاسىپ ٴبىرجولا بايلانىساتىن تۇس تا وسى ەكىنشى رەۆوليۋسيا كەزەڭى. ٴىرى الپاۋىتتاردىڭ، «جوقتان وزگەنى» جاساپ، وزىمەن ٴوزى بولىپ جۇرەتىن ونەرتاپقىشتارعا نازارى وسى تۇستاردا شىنداپ اۋدى. ەديسسوندار مەن بەللدەر ٴبىر كەزدەرى تۇككە تۇرعىسىز قيالشىل ادامدار بولاتىن. ەندى ولاردىڭ جاساعان دۇنيەلەرى بۇكىل امەريكانى جاپ-جارىق قىلىپ، بايلانىستىرىپ وتىر ەمەس پە؟

ەكىنشى ونەركاسىپتىك رەۆوليۋسيانىڭ باستى سەبەبى – ەلەكتر دەۋگە بولادى. ەلەكتر وسى كەزدەردە زەرتحانالار مەن اكادەميالىق ورتانى تاستاپ شىعىپ، ٴاربىر وتباسىنا، كوشەگە كەلە باستاعان بولاتىن. ترامۆايلار، تەلەفونيا، جارىق – سول كەزەڭنىڭ جەمىستەرى.

ٴۇشىنشى رەۆوليۋسيا: ول بولىپ پا ەدى؟

كانىگى ماتەماتيك ٴۇشىن كومپيۋتەر باعزى زامانداردان بەرى بار. ال قالعان بارلىعىمىز – كادىمگى كوميۋتەردى xxi عاسىردان باستاپ كوردىك. كومپيۋتەرلەردىڭ بۇقارالىق سيپات الۋى بازبىرەۋلەردى ٴۇشىنشى ونەركاسىپتىك رەۆوليۋسيا تۋرالى اڭگىمەگە قاناتتاندىرسا كەرەك. ٴبىراق ٴۇشىنشى رەۆوليۋسيانىڭ بولعانى-بولماعانى ٴالى دە اشىق سۇراق.

شىنىمەن، ٴبىر كەزدەردە تەك جابىق ۇيىمدار مەن اكادەميالىق ورتانىڭ قۇزىرىندا بولعان كومپيۋتەرلەردىڭ كەنەت كىشىرەيىپ، تۇرمىستىق جابدىق دەڭگەيىنە دەيىن ٴتۇسۋى ادامزاتتى دامۋدىڭ جاڭا ساتىسىنا سەكىرتتى. وفيستىك جۇمىستاردى ٴتىپتى ەلەمەي، جۇزدەگەن مىڭ پارامەترى بار مالىمەتتى قورىتۋ، قاجەتتى مالىمەتتى مەزەتتە تابۋ مۇمكىندىگىنىڭ ٴوزى بيزنەستىڭ پاراديگماسىن وزگەرتتى. ەڭ اياعىندا ينتەرنەت پەن ول ارقىلى مالىمەت الماسۋ مۇمكىندىگىنىڭ ٴوزىن ايتساق تا بولادى. كومپيۋتەر ونەركاسىپتىڭ دە اجىراماس بولىگىنە اينالدى. ٴبىر عانا مىسال: كانادالىق ٴبىر تۇز كەنىشىندە تۇيىرشىكتەردىڭ قاراسىن اعىنان ايىرىپ تۇراتىن جابدىق بار. ونى كومپيۋتەر جاسايدى. ساۋلاپ اعىپ جاتقان تۇز تۇيىرشىكتەرىنىڭ قاراسىن «بايقاعان» كەزدە، ونى اۋامەن اتىپ، «ۇشىرىپ» جىبەرەدى. ەندەشە سول كومپانيا شىعاراتىن اس تۇزىنان ٴبىر ٴتۇيىر قارا داق تاپپايسىز. ەندى وسى جۇمىستى قولمەن جاساۋدى ەلەستەتىپ كورىڭىزشى؟ ٴتىپتى مۇمكىن ەمەس. نە تۇتاستاي زاۋىت كۇنىنە بەس كيلا تۇز شىعارۋ ٴۇشىن عانا جۇمىس ىستەر ەدى.

مالىمەتتەر بازاسىنىڭ ادام ٴومىرىن قالاي جىلدامداتقانىن ايتىپ جەتكىزۋ ٴتىپتى مۇمكىن ەمەس. بۇگىندە جاھاندىق قارجى سەكتورى كومپيۋتەرسىز تۇل. ونىڭ ۇستىنە، قارجىلىق ساراپتاما سياقتى ٴبىرسارىندى جۇمىستان بوساتىپ، ۋاقىت پەن كەڭىستىكتەگى ميلليونداعان قۇبىلىستاردىڭ زاڭدىلىقتارىن قازىرگى كومپيۋتەرلەر ٴوزى ايقىنداي بەرەدى. مالىمەتتەر بازاسى كوزدەلگەن ماتەريالدى ٴدوپ تاۋىپ، ٴبىز بۇگىن ٴبىر ٴتۇيىر كىتاپتى ىزدەۋگە بولا شولانعا ساياحات جاساۋعا كەتەتىن كىتاپحاناشىنى، نەمەسە «سىعىركوزدەر مەن سارى ادامدار دەپارتامەنتىنە» سۇراۋ سالىپ جاتقان بيۋروكراتيانى كورمەيمىز.

ٴبىراق بۇل جەتىستىك سايىپ كەلگەندە – ەكىنشى رەۆوليۋسيانىڭ جالعاسى عانا ەمەس پە ەكەن؟ سيفرلانۋ رەۆوليۋسيا ما، الدە دامۋدىڭ جاڭا ساتىسى عانا ما؟

بۇل سۇراققا قوعامتانۋشىلار مەن فۋتۋرولوگتار كۇمىلجيدى. بىلىمگە مونوپوليانىڭ جويىلۋىن جانە جالپىادامزاتتىق ٴبىلىم قورىنىڭ جاساقاتالا باستاۋىن ەسەپكە الا وتىرىپ، رەۆوليۋسيا دەۋگە دە بولادى. دەگەنمەن بۇل دا رەۆوليۋسيالار اراسىندا ايقىن شەكارا سىزىپ بەرۋگە جەتكىلىكسىز.

ٴتورتىنشى ونەركاسىپتىك رەۆوليۋسيا

ادامزاتتىڭ جاڭا ەكونوميكالىق پاراديگمانىڭ الدىندا تۇرعانى كوپتەن ايتىلىپ كەلەدى. ەندى ٴوندىرىستىڭ جالپىدان جالقىنىڭ سۇرانىستارىن قاناعاتتاندىرۋى مۇمكىن بولىپ وتىر. ادامنىڭ تۇرمىستىق ماسەلەلەردەن مەيلىنشە وقشاۋلانىپ، ۋاقىتىنىڭ كوپ بولىگىن جەكە جەتىلۋگە جۇمساۋى – ٴتورتىنشى رەۆوليۋسيانىڭ باستى كورىنىسى. بۇل ٴۇشىن تەحنولوگيالىق العىشارتتاردىڭ بارلىعى بار. روبوتيزاسيا ٴوندىرىستى الدەقاشان باعىندىرىپ بولىپ، ەندى داياشىنىڭ قىزمەتىنە دەيىن جاۋلاپ كەلەدى. ونىڭ ۇستىنە بۇگىنگى يننوۆاسيالىق جاڭالىقتار ەتيكالىق ماسەلەلەردى دە ەسەپكە الادى. مىسالى، قورشاعان ورتاعا زيان تيگىزبەي، ٴدال سول ۋاقىتتا بۇرىنعىدان دا قۋاتتى جابدىق جاساۋ – بۇگىنگى ونەركاسىپتىڭ باستى كونسەپسياسى.

ەكىنشى رەۆوليۋسيا كەزەڭىندە قالىپتاسقان ستاندارتيزاسيا قايتادان ينديۆيدۋاليزمگە قاراي باعىت ۇستايتىن ٴتۇرى بار. مىسالى، كيىم تىگۋدى الايىق.

بۇرىن ٴوندىرۋشى پيدجاكتىڭ بىرنەشە ٴتۇرىن تىگۋگە ٴماجبۇر بولدى دەلىك. سەبەبى تۇتىنۋشىنى قىزىقتىراتىنى – اسسورتيمەنتتىڭ الۋاندىعى. بىرەۋگە قىزىل پيدجاك كەرەك، بىرەۋگە كوگى كەرەك. قىزىل پيدجاكتى تاڭداعان تۇتىنۋشىعا ەندى تۇيمەسى ۇناماي قالۋى مۇمكىن. ٴارى ەتەگىن قىسقارتۋ نەمەسە ۇزارتۋ كەرەك بولادى. بۇل ٴوندىرۋشىنى قىمبات ماركەتولوگيالىق زەرتتەۋلەر جۇرگىزۋگە، جارناماعا شىعىن بولۋعا ٴماجبۇر قىلادى. جانە وندا مىڭداعان مەتر ماتا، وتپەي قالعان كيىم-كەشەكتەر قالادى.

ال industry 4.0 كەزەڭىندە ول پيدجاك تەك قاجەت بولعان كەزدە تىگىلەدى. جانە قاجەت ٴتۇس پەن قاجەت تۇيمەمەن تىگىلەدى. الدىن الا ٴوندىرىپ تاستاۋ دەگەن بولمايدى. ەندەشە وندىرۋشىگە وراسان زور ٴجىپ پەن ماتانىڭ قورىن جاساۋدىڭ دا قاجەتى جوق. بولاشاقتىڭ روبوتتارى سۇراعان-ۇناعان تاۋارىڭدى سول جەردە جاساپ بەرەدى. ارينە، بۇل كونسەپت اۆتوموبيلدەن باستاپ، شاينەك وندىرىسىنە دەيىن تارالماق.

بۇل كونسەپتتىڭ كومپيۋتەرلىك «بۇلتتى تەحنولوگيالاردان» كەلگەنى انىق. رەسۋرستاردىڭ تەك قاجەت كەزدە عانا قاجەتتى كولەمدە پايدا بولۋى – وسى كەزدىڭ وزىندە ينتەرنەت-بيزنەستە ۇلكەن ۇنەم جاساۋعا اكەلىپ وتىر. ۇسىنىستىڭ تەك سۇرانىس بولعان كەزدە پايدا بولۋى – ەندى مەتالدى گراممعا دەيىنگى، ٴجىپتى – ميلليمەترگە دەيىنگى دالدىكپەن پايدالانۋعا جول اشادى. بۇدان ٴارى قاراي – ادامزاتتىڭ تەك ينتەللەكتۋالدىق ەڭبەكپەن اينالىساتىن كەزەڭى قىلاڭ بەرەدى. راس، روبوتتار مەن جاساندى ينتەللەكت ادامنىڭ بۇل قاسيەتىنە دە اۋىز سالادى دەگەن بولجام بار. ول ەندى – فۋتورولوگتاردىڭ ەنشىسىندەگى باسقا اڭگىمە.

قازاقستاننىڭ بۇگىنى مەن ەرتەڭى

جاھاندانۋ. قازاقستاندىقتار ٴۇشىن وتە ماڭىزدى ٴتىل مەن ٴدىلدىڭ ٴبولاشاعىنىڭ فۋتۋريستىك الەمدەگى بەينەسى ايقىن ەمەس. ٴبىر جاعىنان، بۇكىلالەمدىك ۇردىستەر قازاقستاندى ٴوزىنىڭ مادەني وربيتاسىنا تارتپاي قويمايدى. ٴقازىردىڭ وزىندە تۇرمىستىق دەڭگەيدەگى ينتەگراسيا بارعان سايىن سوزدەردى ٴتىل اينالىمىنان تىقسىرىپ، ۇلتتىق دۇنيەتانىمدى وزگەرتىپ جاتىر.

ٴبىراق بىزدە گەرمانيا مەن جاپونيانىڭ دا مىسالى بار.

xix عاسىردىڭ اياعىنا دەيىن نەمىس ٴتىلى – عىلىم ٴتىلى بولىپ ەسەپتەلدى. ەۋروپانىڭ كەز كەلگەن عالىمى مەن ينجەنەرىنە نەمىس ٴتىلىن ٴبىلۋ مىندەت بولاتىن. ٴبىراق ٴبىرىنشى ونەركاسىپتىك رەۆوليۋسيادان كەيىن اعىلشىن ٴتىلى الدىڭعى ورىنعا شىعىپ، xx عاسىر باسىندا ٴبىرجولا ۇستەمدىك قۇردى. بۇل جەردە بىزگە نەمىس ٴتىلىنىڭ ەڭ بولماسا ٴوز جەرىندە قالايشا ۇستەمدىك قۇرىپ قالعانى قىزىق.

xix عاسىردىڭ ورتاسىنا دەيىن نەمىستەر كىنازدىكتەر مەن گرافتىقتارعا بولىنگەن الا-قۇلا ۇلت بولاتىن. ٴتىپتى ٴار گرافتىق پەن كۋرفيۋرستانىڭ ٴوزىنىڭ كيلاسى مەن مەترى بولعان. انگليا مەن فرانسيادان ارتتا قالا باستاعان گەرماندىقتار بىرىنشىدەن اۋىزبىرشىلىكتى نىعايتىپ، ەكىنشىدەن، ونەركاسىپتىك جارىسقا بىردەن قويىپ كەتپەي، ۇلتتىق ەرەكشەلىكتەردى ەسكەرە وتىرىپ رەفورما جاسادى. سونىڭ ارقاسىندا تاريح ٴۇشىن از ۋاقىت ىشىندە عانا عىلىمى مەن ونەركاسىبى الپاۋىت ەلدەرمەن تەڭەسە قالدى. بۇگىندە ٴبىز نەمىس تەحنولوگيالارىنىڭ داڭقىن كورىپ ٴجۇرمىز. جاپونيا دا شامامەن وسى باعىتپەن ٴجۇردى.

ەندەشە جاھاندانۋ ۇردىسىنە ۇلتتىق بولمىستى الا كەتۋ مۇمكىندىگى ابدەن بار. تەك ونى كەرتارتپالىقپەن شاتاستىرىپ الماساق بولعانى.

الەۋمەتتىك پروبلەمالار. وندىرىسكە يننوۆاسيا ەنتەلەگەن سايىن، ٴالەۋمەتتىك پروبلەمالاردىڭ ۋشىعاتىنى ٴبىرىنشى ونەركاسىپتىك رەۆوليۋسيا كەزەڭىندە-اق بەلىگى بولعانىن اتاپ وتتىك. مەحانيكانىڭ ادامدى ٴوندىرىس الاڭىنان ىعىستىرىپ شىعۋى جاپپاي جۇمىسسىزدىققا اكەپ سوعاتىنىنا ماركس، كەيىن گەنري دجوردج نۇسقاعان بولاتىن.

قوعامدىق يگىلىك ارتقان سايىن ونىڭ ادەلتسىز ۇلەسۋى كوبەيىپ، بايلار بايي، كەدەيلەر كەدەيلەنە بەرەتىن ٴۇردىس – ادامزاتتىڭ يننوۆاسيا ٴۇشىن تولەگەن اقىسى سياقتى. بۇل جەردە ساياسي شەشىمدەردەن باسقا شەشىم كورىنبەيدى. بۇل ورايدا قازاقستان ٴۇشىن جالپىادامزاتتىق وسى پروبلەمانى تولىقتاي باسىنان وتكىزۋگە ٴماجبۇر بولاتىن ٴتارىزدى.

بۇلشىق ەت پەن ٴبىلىم. ٴبىز ٴبىرىنشى ونەركاسىپتىك رەۆوليۋسياعا دەيىن اتادان الىپ بولىپ تۋۋدىڭ قانداي ماڭىزدى بولعانىن كوردىك. سەبەبى ول تۋرا ماعىناسىندا – بۇلشىق ەتتى، بىلەكتىڭ كۇشىن تاماق پەن كيىمگە كونۆەرتاسيا جاسايتىن زاماندار ەدى. كۇشتى بولساڭ – كەندى كوبىرەك قازاسىڭ، قاپشىقتى كوبىرەك تاسيسىڭ، سايكەسىنشە – تابىسىڭ دا كوبىرەك بولادى. ٴالجۋاز بولساڭ – جارىق جوق. ونى كەز كەلگەن حالىقتىڭ فولكلورىنان ايقىن كورۋگە بولادى.

ٴقازىر ەندى، ٴبىلىم العا شىعىپ وتىر. ٴوندىرىس وشاقتارىنداعى قيامپۇرىس تەحنولوگيالار بۇگىندەرى جۇزدەگەن ادامدى الماستىرىپ وتىر. ال ول – بىلىممەن كەلگەن.

ٴبىلىمدى ۇيلەستىرۋ، ولاردى وڭتايلى توعىستىرىپ، ناتيجە الۋ دا ماڭىزدى. بۇگىن ادامزات ستاتيستيكالىق سانانى پايدالانۋعا كوشتى. ەندىگارى جالعىزىلىك دانىشپانداردىڭ زامانى ٴوتتى. ونىڭ ورنىنا - ماسەلە بويىنشا اركىمنىڭ بىلەتىنى ورتاعا سالىناتىن بولدى. كومپيۋتەردەن باستاپ، جەرسەرىككە دەيىن – سونداي ٴبىلىم كووپەراسياسىنىڭ ناتيجەسى.

ارينە، بۇل اڭگىمەدە ٴبىز كەز كەلگەن بولجاۋشىنىڭ باستى قاتەسى – تاريحتى قانداي دا ٴبىر زاڭدىلىقتارمەن سىزىقتىق داميدى دەپ الىپ وتىرمىز. الدا ٴبىز ٴتىپتى ەسكەرمەگەن قانداي عاجايىپتار بولاتىنىن ەشكىم بىلمەيدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي