استانا: 
2778 
0
قازاقستان رەسەي فەدەراسياسىمەن اراداعى ستاندارتتاۋ مەن اككرەديتتەۋ سالاسىنداعى ٴوزارا ىس-ارەكەت ستراتەگياسىن قايتا قاراستىرۋ بويىنشا ناقتى ۇسىنىستار دايىندادى. بۇل جونىندە قر يدم تەحنيكالىق رەتتەۋ جانە مەترولوگيا كوميتەتىنىڭ ٴتوراعاسى ارمان شاققاليەۆ مالىمدەدى، دەپ حابارلايدى baq.kz ٴتىلشىسى.
«بۇگىن ٴبىز رەسەي فەدەراسياسىنان كەلگەن قوناقتاردى – فەدەرالدىق رەتتەۋ جانە مەترولوگيا اگەنتىگىنىڭ باسشىسى الەكسەي ابراموۆپەن جانە فەدەرالدىق اككرەديتتەۋ قىزمەتىنىڭ باسشىسى الەكسەي حەرسونوۆتىڭ باسشىلىق ەتۋىندەگى دەلەگاتتارمەن كەزدەسىپ وتىرمىز. ەكى ەل اراسىنداعى قارىم-قاتىناس تىعىز ەكەنىن بىلەسىزدەر. قازاقستان دا، رەسەي دە ەۋرازيالىق ىنتىماقتاستىق يدەياسىن بەلسەندى جۇزەگە اسىرىپ كەلە جاتقان مەملەكەتتەر. ستاندارتتاۋ، اككرەديتتەۋ، مەترولوگيا ماسەلەلەرىنىڭ بارلىعى ونەركاسىپ سالاسىن قولداۋعا، ٴونىم ەكسپورتى ٴۇشىن قولايلى جاعداي جاساۋعا باعىتتالعان. جالپى، ٴبىز 19 مىڭنان استام مەملەكەتتىك ستاندارتتى قولدانامىز. بۇگىندە ولاردى قايتا قاراستىرۋ، وزەكتىلەندىرۋ جانە جاڭعىرتۋ ماسەلەسى ٴبىرىنشى كەزەكتە تۇر. سەبەبى، ونەركاسىپ دامىپ جاتىر، تەحنولوگيا وزگەرۋدە، بيو جانە نانو تەحنولوگيالاردى قولدانۋ سايكەس تەحنولوگيالىق جانە نورماتيۆتىك-تەحنيكالىق قولداۋدى قاجەت ەتەدى. ونىڭ ۇستىنە، ٴبىر جاھاندىق الەمدە تىرشىلىك ەتىپ جاتقاندىقتان، جەتەكشى ەلدەرمەن ٴبىر تەحنيكالىق تىلدە سويلەۋ قاجەتتىلىگىنىڭ ماڭىزى زور»، - دەدى كوميتەت ٴتوراعاسى.
ول ەۋرازيالىق ەكونوميكالىق وداق اياسىندا ستاندارتتاۋ وداعى قۇرىلعانىن جانە اتالعان وداق تەحنيكالىق رەتتەمەلەۋ مەن اككرەديتتەۋ سالاسىندا قابىلدانىپ جاتقان شارالاردىڭ تيىمدىلىگىن ارتتىرۋدى قاداعالايتىنىن ايتتى.
«كەزدەسۋ قورىتىندىسى بويىنشا ٴبىز ستاندارتتاۋ مەن اككرەديتتەۋ سالاسىنداعى ٴوزارا ىس-ارەكەت ستراتەگياسىن قايتا قاراستىرۋ بويىنشا ناقتى ۇسىنىستار دايىندادىق. سونىمەن قاتار، بۇگىنگى كۇنى بۇرمالانعان، كونترافاكتىلىك جانە ساپاسىز ونىمدەردىڭ جولىن كەسۋ وزەكتى بولىپ وتىر. ٴبىز ەكى ەل اراسىندا وسى تەكتەس ونىمدەردىڭ اينالىمىن بولدىرماس ٴۇشىن، ٴبىزدىڭ نارىق پەن تۇتىنۋشىلار ٴۇشىنشى مەملەكەتتەن كەلەتىن تاۋارلاردان قورعالعان بولۋى ٴۇشىن جيىنتىقتى شارالار ازىرلەمەكشىمىز»، - دەدى شاققاليەۆ.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
2389
0