مەركىنىڭ سۋى شيپا، اۋاسى ەم

فوتو: YouTube

بيىل ەل تاۋەلسىزدىگىنىڭ 25 جىلدىعىن اتاپ وتكەلى وتىرمىز.وسىناۋ شيرەك عاسىر ۋاقىت ىشىندە مەرەيلى مەركى جەرى، ونىڭ ىشىندە «مەركى شيپاجايى» دا جاڭارىپ، جاسارا ٴتۇستى.

«مەركى شيپاجايى» ٴوزىنىڭ 60 جىلعا جۋىق تاريحىندا ونداعان مىڭ دەمالۋشىنى قۇشاق جايا قارسى الىپ، شيپالى ەمى مەن ساپالى قىزمەتتەرىن كورسەتتى. سونىڭ ارقاسىندا مەركىمىزدىڭ اتى تەك قازاقستاننىڭ ٴتۇرلى ايماقتارىنا عانا ەمەس، الىس تا، جاقىن شەت مەملەكەتتەرگە دە تارادى. شيپاجايدا، نەگىزىنەن، سۇيەك-بۋىن، جۇرەك قان- تامىرلارى، ايەلدەردىڭ جىنىس اۋرۋلارىنا، جۇيكە جۇيەسى، جۇقپالى ەمەس تەرى، قان-تامىرلارى، اسقازان-ىشەك جولدارى، ۋرولوگيالىق جانە ەندوكريندىك اۋرۋلارىنا ەم قولدانىلادى. دەمالىس ورنى قىرعىز الاتاۋىنىڭ مەركى شاتقالىندا ورنالاسقاندىقتان، ول تەڭىز دەڭگەيىنەن 720 مەتر بيىكتىكتە تۇر. مۇنداعى باستى ەرەكشەلىك – ەمدىك شارالار كەزىندە رەسپۋبليكادا تەڭدەسى جوق رادون مينەرالدى سۋى قولدانىلادى. سوڭعى ٴۇش جىل ىشىندە «مەركى شيپاجايىنىڭ» الەۋەتىن كوتەرۋ، دەمالۋشىلاردىڭ تالاپ-تىلەكتەرىنەن كورىنۋ   ماقساتىندا جوسپارلى جۇمىستار اتقارىلىپ، كوپتەگەن وزگەرىستەرگە قول جەتكىزىلدى.كورپۋستارداعى جاتىن بولمەلەر مەن ەمدىك شارالار جۇزەگە اسىرىلاتىن ورىندارعا، اسحانا زالدارىنا قاجەتىنە قاراي كۇردەلى جانە اعىمدى جوندەۋ جۇمىستارى جۇرگىزىلىپ، ديزاينى جاڭعىرتىلدى. توسەك- ورىنداردان باستاپ، پەردەلەر مەن توسەنىش كىلەمدەرگە دەيىن جاڭارتىلدى.

مۇنداعى ٴاربىر دەمالىس بولمەسى مەن بۇرىشتارىنىڭ جانعا جايلى، كوڭىلگە قونىمدى، ٴارى اسەرلى بولۋى نازارعا الىندى. دەمالۋشىلارعا قىزمەت كورسەتۋ ساپاسىن جوعارى دەڭگەيدە ۇستاۋ – تۇراقتى باقىلاۋعا قويىلعان. دەمالۋشىلارعا ۆاننا كورپۋسىندا، پارافين بولىمىندە، رەلاكساسيالىق، قۇيىندى جانە سيركۋليارلىق ەمدەۋ ادىستەرى بولمەلەرىندە، گينەكولوگيالىق شايىلۋ مەن ۋرولوگيالىق كابينەتتەردە، باسسەيندە، فيزيوتەراپيا، گالوكامەرا، ياعني، تۇزدى شاحتا، ەمدىك دەنە شىنىقتىرۋ زالى جانە تاعى باسقا ورىنداردا قىزمەتتەر كورسەتۋ جاقسى جولعا قويىلعان. سونداي-اق، تمد ەلدەرىنىڭ ەشبىرىندە جوق «سكانديناۆتىق ٴجۇرۋ ادىسىمەن» جاتتىقتىرۋ ٴتۇرى ەنگىزىلسە، سۋ استىنان ومىرتقانى سوزۋ كابينەتى جاڭادان ىسكە قوسىلىپ، شيپاجايدىڭ مارتەبەسىن ارتتىرىپ وتىر. وسىنىڭ ٴبارى الىستان ات ارىلتىپ كەلۋشىلەرگە ساپالى قىزمەت ۇلگىسىن كورسەتىپ، شيپالى ەم جاساۋ ٴۇشىن جاسالۋدا. شيپاجايدىڭ عيماراتتارىمەن قاتار، سىرتقى كەلبەتىن جاڭارتۋ، لاندشافتىن جاڭعىرتۋ ماسەلەسى دە قولعا الىنىپ، ناقتى جۇمىستار جاسالدى.

مىسالى، 2014 جىلى 2000 شارشى مەتر جەردەگى اسفالت توسەمەلەرى اۋىستىرىلسا، الداعى جىلى تاعى 1000 شارشى مەتر اۋماقتاعى توسەمەلەر جاڭارتىلماق. وعان تالاس پەن مويىنقۇم اۋداندارىنان اكەلىنگەن قىزىل تاستار قولدانىلۋدا. دەمالۋشىلارعا قولايلى اسپالى كوپىر دە سالىندى. 2016 جىلى 1500 شارشى مەتر اسحانا شاتىرى جاڭارتىلدى. زامان تالابىنا ساي قۇرال-جابدىقتار، ۇستەل-ورىندىقتار مەن ىدىس-اياقتار ساتىپ الىندى. تاعى ٴبىر جاڭالىعىمىز، مۇندا بيىل شاعىن ناۋبايحانا ىسكە قوسىلدى. وندا پىسىرىلگەن نان تەك كەلۋشىلەردى عانا قامتاماسىز ەتىپ قويماي، مەركى شاتقالىندا تۇراتىن تۇرعىندار ساتىپ الىپ، پايدالانۋدا. مۇندا جاسالىپ جاتقان سان الۋان جۇمىستار، قىزمەت تۇرلەرى مەن ونىڭ ساپاسىنىڭ ارتۋى – ٴوز ناتيجەسىن بەرە باستادى.ولاي دەيتىنىم، 2014-2015 جىلدارعا قاراعاندا بيىل كەلۋشىلەر سانى ارتىپ وتىر. اتاپ ايتار بولساق، وسى جىلدىڭ 9 ايىنىڭ قورىتىندىسىمەن 851 ادامدى ارتىق قابىلداپ وتىرمىز. ياعني، 9241 توسەك/كۇنگە ارتىق دەگەن ٴسوز. دەمالۋشىلار، اسىرەسە، جامبىل، وڭتۇستىك قازاقستان، اتىراۋ، ماڭعىستاۋ، قاراعاندى، اقمولا جانە قىزىلوردا وبلىستارىنان كوپتەپ كەلەدى.سونداي- اق، ٴىشىنارا گەرمانيا مەن رەسەيدەن كەلەتىندەر دە بار. نەگىزگى كورسەتكىشتەرگە قول جەتكىزۋدە ۇجىم قىزمەتكەرلەرىنىڭ، ماماندار مەن جۇمىسشىلارىنىڭ ەڭبەگى زور.

سوندىقتان دا، بىزدە ەڭ الدىمەن، ەڭبەك ادامىنا جاعداي جاساۋ جولعا قويىلعان. شيپاجاي بويىنشا 200 ادام جۇمىس اتقارۋدا. ولار ٴبىر مەزگىل تولىق كەشەندى ىستىق اسپەن قامتاماسىز ەتىلگەن. جۇمىس بارىسىندا قاجەتىنە قاراي ماتەريالدىق كومەكتەر بەرۋ، ىنتالاندىرۋ شارالارى جۇزەگە اسىرىلىپ كەلەدى. تۇرمىس جاعدايى تومەن وتباستارىنا قايىرىمدىلىق كومەك قولىن سوزامىز. 2015 جىلى مەكەمەنىڭ 27 قىزمەتكەرى قازاقستاننىڭ تۇكپىر-تۇكپىرىندەگى دەمالىس ورىندارىنا تەگىن دەمالۋعا جىبەرىلدى، بۇل شيپاجاي تاريحىندا بۇرىن بولماعان. دالىرەك ايتار بولساق، ولار: قىزىلوردا وبلىسىنداعى «جاڭاقورعان»، وقو-داعى «مانكەنت»، پاۆلودارداعى مويىلدى، قوستانايداعى «سوسنوۆىي بور»، الماتى وبلىسىنداعى «كوكتەم» دەمالىس ورىندارىندا بولىپ، تىنىعىپ قايتتى. ٴيا، مەركىمىزدىڭ تاماشا تابيعاتى، تازا اۋاسى مەن شيپالى سۋى ەشتەڭەگە تەڭ كەلمەيدى. وزگە وبلىستاردان كەلۋشىلەر تابيعاتىمىزعا تامسانىپ، ەمدىك قىزمەتىمىزدى پايدالانۋ ٴۇشىن ەرىنبەي كەلىپ-كەتىپ جاتادى. وسى رەتتە ٴوزىمىزدىڭ مەركىلىكتەردىڭ دە «مەركى شيپاجايىنا» كوپتەپ كەلىپ، دەمالۋىنا ۇسىنىس جاساعىم كەلەدى. «الىستان اربالاعانشا، جاقىننان دوربالا» – دەگەن ٴسوز بار ەمەس پە، قازاعىمىزدا. قولداعى باردىڭ ٴقادىرىن بىلەيىك. ەندەشە، كەلىڭىزدەر، قىزمەتىمىزدى كورىڭىزدەر!

ابدراحيم مومبەكوۆ، «مەركى شيپاجايى»اق-نىڭ باس ديرەكتورى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!