تۇركىستان وبلىسىنىڭ ەكسپورتتاۋشىلارىنا كەشەندى قولداۋ كورسەتىلەدى

بۇل تۋرالى تۇركىستان وبلىسى اكىمىنىڭ ورىنباسارى ەربول تاسجۇرەكوۆ كاسىپكرەلەرمەن كەزدەسۋ بارىسىندا مالىمدەدى، دەپ حابارلايدى baq.kz اقپارات اگەنتتىگى.

جيىنعا وڭىردەگى 30-دان اسا ەكسپورتتىق الەۋەتى بار كاسىپكەر قاتىسىپ، وبلىس اكىمىنىڭ ورىنباسارى ولاردىڭ جەكە قاجەتتىلىكتەرىمەن تانىستى. سونىمەن قاتار، جيىنعا تۇركىستان وبلىسىنىڭ كاسىپكەرلىك جانە يندۋستريالدى-يننوۆاسيالىق دامۋ باسقارماسى جانە كەدەندىك دەكلاراسيانى باقىلاۋ ٴبولىمىنىڭ باسشىلارى، سونداي-اق، «kazakhexport» ەكسپورتتىق ساقتاندىرۋ كومپانياسى» اق، «اتامەكەن» ركپ» اق، «اۋىل شارۋاشىلىعىن قارجىلاي قولداۋ قورى» اكسيونەرلىك قوعامىنىڭ جانە «اگرارلىق نەسيە كورپوراسياسى» اكسيونەرلىك قوعامىنىڭ تۇركىستان اۋدانى بويىنشا ايماقتىق فيليالدارى جانە «وڭتۇستىك» ايو وكىلدەرى قاتىسىپ، ٴوز تاراپتارىنان ەسپورتتاۋشى كومپانيالارعا كورسەتەتىن قىزمەتتەرى تۋرالى ايتىپ بەردى.

ەلىمىزدىڭ ەكونوميكاسىن دامىتۋدا وتاندىق ونىمدەردىڭ ەكسپورتقا شىعۋى جوعارى ماڭىزعا يە ەكەندىگىن تىلگە تيەك ەتكەن ەربول تاسجۇرەكوۆ كاسىپكەرلەردىڭ ەكسپورتتىق الەۋەتىن كوتەرۋ بويىنشا ارنايى جۇمىس توبى قۇرىلعاندىعىن جەتكىزدى.

«قازىرگى تاڭدا كاسىپكەرلەردىڭ كورشى ەلدەر نارىعىنا كىرۋىنە بەلگىلى توسقاۋىلدار بار. ولار وندىرىستىك كولەمىنىڭ جەتكىلىكسىزدىگى، تاسىمالداۋ ماسەلەلەرىنىڭ جولعا قويىلماعاندىعى نەمەسە كەدەندىك كەدەرگىلەر. مىنە، وسىنداي ماسەلەلەردى شەشۋدە قولداۋ كورسەتىپ، كومپانيانىڭ ەكسپورتقا شىعۋىنا دەيىن سۇيەمەلدەۋ ماقساتىندا ٴبىز ارنايى جۇمىس توبىن قۇردىق. جۇمىس توبى «وڭتۇستىك» ايماقتىق ينۆەستيسيالىق ورتالىعىنىڭ ماماندارىنان قۇرالعان»، - دەدى وبلىس اكىمىنىڭ ورىنباسارى.

بۇگىندە تۇركىستان وبلىسى بويىنشا 50 الەۋەتتى ەكسپورتتاۋشى كومپانيا بار. ولار تاۋارلارىن ەۋرووداق ەلدەرىنە، قىتاي جانە ورتالىق ازيا ەلدەرىنە ەكسپورتقا شىعارۋدا. الايدا، ەكسپورت كولەمىن ارتتىرىپ، جالپى شەت ەل نارىعىنا شىعۋدا كەدەرگىلەر جوق ەمەس. كەزدەسۋ بارىسىندا كاسىپكەرلەر كەدەندىك راسىمدەۋ پروسەدۋراسىن جەڭىلدەتۋ، ٴوندىرىس كولەمىن ارتتىرۋعا قارجىلاي كومەك كورسەتۋ جانە ەكسپورتتىق كەلىسىم-شارتتاردى ساقتاندىرۋ بويىنشا قولداۋ قاجەتتىگىن ايتتى.

اتالعان ماسەلەلەر ٴتيىستى سالا ماماندارىنا جۇكتەلىپ، وبلىستىق اكىمدىك تاراپىنان باقىلاۋعا الىناتىن بولدى. جيىن سوڭىندا كاسىپكەرلەر بارلىق دامۋ ينستيتۋتتارىنىڭ باسشىلارىمەن كەزدەسىپ، قاجەتتى اقپاراتتارمەن قامتاماسىز ەتىلدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!