BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازاقستاندىقتاردىڭ پولشانىڭ الماسىن جوعارى باعالايتىنىنا قۋانىشتىمىز – حوۋبوۆسكي

فوتو: Абзал Қалиев

بۇگىن استانادا قازاقستان-پولشا بيزنەس فورۋمى ٴوتىپ جاتىر. وعان 450-گە جۋىق كاسىپكەر مەن قوس ەلدىڭ ٴىرى كومپانيالارىنىڭ باسشىلارى قاتىسۋدا. اتالعان شاراعا مەملەكەت باسشىسى نۇرسۇلتان نازاربايەۆ پەن پولشا پرەزيدەنتى اندجەي دۋدا كەلەدى دەپ كۇتىلۋدە، دەپ حابارلايدى baq.kz ٴتىلشىسى.

بيزنەس فورۋمدى قر ينۆەسيتيسيالار جانە دامۋ مينيسترلىگى، «اتامەكەن» ۇلتتىق كاسىپكەرلەر پالاتاسى مەن ۇلتتىق پالاتانىڭ ەنشىلەس ۇيىمى قازاقستاننىڭ سىرتقى ساۋدا پالاتاسى ۇيىمداستىردى.

جيىندا قر ينۆەستيسيالار جانە دامۋ ۆيسە-مينيسترى ەرلان حايىروۆ ەكى مەملەكەت اراسىنداعى ساۋدا-ەكونوميكالىق بايلانىستىڭ تۇراقتى دامىپ كەلە جاتقانىن العا تارتتى.

«فورۋمعا 350-گە جۋىق كاسىپكەر قاتىسۋدا. قازاقستان پولشامەن ساۋدا-ەكونوميكالىق بايلانىسىن نىعايتۋعا باسا ٴمان بەرۋدە. ٴبىزدىڭ كەزدەسۋىمىز –بىر-بىرىمىزگە دەگەن ەكىجاقتى قىزىعۋشىلىقتى بىلدىرەدى. ستاتيستيكالىق دەرەكتەرگە توقتالساق، سوڭعى 10 جىلدا پولشادان قازاقستانعا 200 ملن دوللار ينۆەستيسيا تارتىلدى. ال 2016 جىلى قوس ەل اراسىنداعى ساۋدا اينالىمى 783 ملن دوللاردى قۇرادى. قازاقستاندا پولشالىق كاسىپكەرلەرمەن بىرىككەن 115-كە تارتا كاسىپورىن جۇمىس ىستەيدى»، - دەدى ٴمينيستردىڭ ورىنباسارى.

وسى ورايدا پولشا اگرارلىق نارىعى اگەنتتىگىنىڭ ٴتوراعاسى لۋكاش حوۋبوۆسكي ٴوز ەلىنىڭ قازاقستاندى سەنىمدى سەرىكتەس رەتىندە باعالايتىنىن اتاپ ٴوتتى.

«پولشالىق كاسىپكەرلەر قازاقستاندى ورتالىق ازياداعى سەنىمدى سەرىكتەس رەتىندە باعالايدى. ٴبىز قازاقستاننىڭ سوڭعى جىلدارى قالاي دامىپ كەلە جاتقانىن كورىپ وتىرمىز. سونىمەن قاتار ەلدەرىڭىزدىڭ ىشكى ينۆەستيسيا سالاسىنداعى اشىقتىعىن جوعارى باعالايمىز. مۇندا كاسىبىن اشقىسى كەلەتىن شەتەلدىك كاسىپكەرلەرگە جاقسى جەڭىلدىكتەر جاسالعان»، - دەدى ول.

سونداي-اق، اتالمىش اگەنتتىك ٴتوراعاسى قوس مەملەكەت اراسىنداعى بايلانىستى ودان ٴارى نىعايتا تۇسۋگە مۇمكىندىك بار ەكەنىن جەتكىزدى.

«سوڭعى بىرنەشە جىلدا پولشا-قازاقستان ەكونوميكالىق ديالوگىنىڭ جاندانىپ كەلە جاتقانىنا كۋامىز. ٴبىز قوس تاراپ اراسىنداعى ديالوگتىڭ ەكونوميكالىق اسەرى بولعانىن قالايمىز. بۇل ديالوگ قازاقستان مەن پولشانىڭ قارىم-قاتىناسىن نىعايتا تۇسەدى. سەبەبى، ەكى مەملەكەت تە جىبەك جولىندا ورنالاسقان. ٴبىز قوس ەل اراسىندا بىرىككەن جوبالار بويىنشا بايلانىس كوپىرىن ورناتىپ، تاۋار اينالىمىن كەڭەيتە الامىز. وسى ورايدا باسىمدىق بەرىلەتىن سالا – تاماق ٴوندىرىسى»، - دەدى ول.

وسى ورايدا لۋكاش حوۋبوۆسكي قازاقستاننىڭ اۋىل شارۋاشىلىعى سالاسىندا بولاشاعى زور ەكەنىن تىلگە تيەك ەتتى.

«پولشانىڭ اۋىل شارۋاشىلىعى مينيسترلىگى قازاقستاندى بولاشاعى زور نارىق رەتىندە باعالايدى. سوندىقتان ٴبىز بايلانىستى نىعايتا تۇسكىمىز كەلەدى. عىلىمي كووپەراسيا دا ٴبىزدى قىزىقتىرادى. ٴبىز تەك پولشالىق ونىمدەردى ناسيحاتتاماي، ٴبىرقالىپتى بايلانىستى دامىتقىمىز كەلەدى. قازاقستان نارىعىندا وزگە دە سالالاردا پولشالىق كاسىپكەرلەر جۇمىس ىستەيدى. بىزدە پولشالىق ينۆەستيسيانىڭ ۇلگىلەرى بار. بۇل اۋىل شارۋاشىلىعى تەحنيكاسىنا قاتىستى. وسى بازادا ٴبىز ٴوز قارىم-قاتىناسىمىزدى دامىتپاقپىز»، - دەدى اگەنتتىك ٴتوراعاسى.

ٴسوز سوڭىندا ول قازاقستان مەن پولشانىڭ ساۋدا-ەكونوميكالىق بايلانىسىنداعى كورسەتكىشتەردى ودان ٴارى جاقسارتۋ ٴۇشىن ٴبىرقاتار جۇمىس جۇرگىزۋ قاجەتتىگىن ايتتى. لۋكاش حوۋبوۆسكيدىڭ پىكىرىنشە، قازاقستاندىقتار پولشالىق ونىمدەردى جوعارى باعالايدى ەكەن.

«پولشا نارىعى قازاقستاننان ونىمدەردى يمپورتتاۋعا اشىق. وسى ورايدا قازاقستان پولشا اگرارلىق سەكتورىنىڭ سەنىمدى سەرىكتەسى رەتىندە باعالانادى. ٴبىز سىزدەردەن ۇزاق جىلدار بويى تەڭىز ونىمدەرىن، بالىق، تۇقىم، ماي يمپورتتايمىز. وسىمەن ٴۇشىنشى جىل قوس ەل اراسىندا اۋىل شارۋاشىلىعى سالاسىندا يمپورت ٴبىر دەڭگەيدە كەلەدى. ٴبىراق ٴبىز بۇل كورسەتكىشتىڭ جىلدان جىلعا وسكەنىن قالايمىز. قازاقستاندىق تۇتىنۋشىلاردىڭ پولشالىق ونىمدەردى، اسىرەسە الماعا جوعارى باعا بەرەتىنىنە قۋانىشتىمىز»، - دەدى ول.

سونىمەن قاتار بيزنەس فورۋمدا قر اۋىل شارۋاشىلىعى ۆيسە-مينيسترى رۇستەم قۇرمانوۆ پولشالىق كاسىپكەلەردى قازاقستانعا جۇمىس ىستەۋگە شاقىردى.

«مەن پولشالىق كاسىپكەرلەرگە اۋىل شارۋاشىلىعى ونىمدەرىن وڭدەۋ سالاسىندا بىرىككەن كاسىپورىندار قۇرۋ ماسەلەسىن قاراۋدى ۇسىنامىن. ٴبىز پولشادا ونىمدەردى وڭدەۋ سالاسىنىڭ قانداي دەڭگەيدە دامىعانىن بىلەمىز. سوندىقتان كاسىبىن اشقىسى كەلەتىن كاسىپكەرلەردى قازاقستانعا شاقىرامىز. سەبەبى، مۇندا تاۋارلاردى وتكىزۋگە ۇلكەن مۇمكىندىك بار»، - دەدى ول.

بيزنەس فورۋمنىڭ رەسمي بولىگى اياقتالعاننان كەيىن، قازاقستان مەن پولشانىڭ ٴبىرقاتار كومپانياسى ىنتىماقتاستىق تۋرالى كەلىسىمدەرگە قول قويىلدى. ناقتىراق ايتساق، پاۆلودار وبلىسىندا «اگروقالاشىق» باعدارلاماسىن ىسكە اسىرۋ، «kazakhinvest» پەن «polpharma» اراسىنداعى ىنتىماقتاستىق، «قازپوشتا» مەن «پولشا پوشتاسى» اراسىنداعى ارىپتەستىك، قازاقستاننىڭ سىرتقى ساۋدا پالاتاسى مەن ptak warsaw expo اراسىندا بايلانىس ورناتۋ جانە تاعى باسقا قۇجاتتار بەكىتىلدى. جالپى بيزنەس فورۋمدا بارلىعى 10 قۇجات راسىمدەلدى. سونىڭ ىشىندە ftc equity مەن soldir اراسىندا الما باقتارىنا تامشىلاپ سۋارۋ جۇيەسىن جەتكىزۋ كەلىسىمى دە بار.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي