BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

كاسىپكەرلەر بيزنەس-باستامالاردى قولداۋعا دايىن

فوتو: Kursiv.kz

ساران قالاسىنىڭ ٴىرى بيزنەسمەندەرى ينۆەستيسيالىق كلۋب قۇرىپ، لايىقتى جوبالارىن ۇسىناتىن جاستارعا كومەگىن ۇسىنباق، دەپ حابارلايدى baq.kz.

ۇكپ ٴباسپاسوز قىزمەتى مالىمدەگەندەي، كلۋبتىڭ ماقساتى – مونوقالاداعى بيزنەس-باستامالاردى قولداپ، ستارتاپتاردىڭ جۇزەگە اسىرىلۋىنا كومەكتەسۋ. كاسىبىنىڭ جىلىگىن شاعىپ، مايىن ىشكەن بيزنەسمەندەر كەلەشەگى زور دەپ تانىعان جوبالارعا عانا قاراجات قۇيۋعا ٴازىر، ويتكەنى مۇنداي قارجىلاندىرۋ جۇيەسى بويىنشا كەلەشەكتە سول كاسىپورىنداردىڭ پايداسى كلۋب مۇشەلەرى اراسىندا پاي ۇلەسىنە سايكەس بولىنبەك.

الەمدە كەڭىنەن تارالعان مۇنداي ٴادىس «ۆەنچۋرلىق قارجىلاندىرۋ» دەپ اتالادى. ونىڭ نەگىزىندە بانك سياقتى نەسيەلەۋ ەمەس، قاجەتتى اقشاسىن بەرۋ ارقىلى بولاشاق پايدانى ٴبولىسۋ يدەياسى جاتىر. ۆەنچۋرلىق قوردىڭ قاراپايىم قاعيدالارى بويىنشا جۇمىس ىستەيتىن كلۋبتى قۇرۋ باستاماسىن «حولدينگ التىن ارنا» جشس ديرەكتورى رەنات مينحايروۆ كوتەردى. تاجىريبەلى بيزنەسمەن سونىمەن قاتار كاسىپكەرلەر پالاتاسىنىڭ ساران قالاسىنداعى فيليالى جانىنان قۇرىلعان شاعىن جانە ورتا بيزنەستى دامىتۋ كوميتەتىن باسقارادى.

«قالامىز شاعىن بولعانىمەن، شىعارماشىل، باستاماشىل جاستارعا باي. ولاردىڭ بۇرىننان كوكسەپ جۇرگەن يدەيالارى بار، ٴبىراق ونىسىن پايدالى كاسىپكە اينالدىرۋ ٴۇشىن نە اقشاسى بولمايدى، نە اقىلىمەن دەمەپ جىبەرەتىن كومانداسى جوق، ٴبىلىمى نەمەسە ماشىعى جەتىسپەي جاتادى. ٴبىز وسىنداي جاستاردى قارجىلاي بولسىن، باسقالاي بولسىن، قولداۋعا ٴازىرمىز. بىزگە كەرەگى – بيزنەسىن باستاۋعا شىن نيەتتى جاستار»، – دەيدى رەنات مينحايروۆ.

كلۋبتىڭ تانىستىرىلىمىندا ٴتورت ستارتاپەر وزدەرىنىڭ يدەيالارىن ۇسىندى. ينۆەستورلاردىڭ نازارىن اۋدارۋ ٴۇشىن ولار ابدەن تىرىستى.

كلۋب كەلەشەكتە جۇمىستى قالاي جۇرگىزبەك؟ بۇل ماسەلەنى جان-جاقتى تالقىعا سالعان كەزدەسۋگە قاتىسۋشىلار ناقتى ەرەجە بويىنشا جۇمىس ىستەۋگە كەلىستى. الدىمەن بيزنەس-جوبا يەلەرى وتىنىشتەرىن كاسىپكەرلەر پالاتاسى فيليالىنىڭ مەنەدجەرىنە وتكىزەدى، سول جەردەن قاجەتتى ەسەپتەۋلەرىن جۇرگىزىپ، بيزنەس-جوسپارىن جاساتادى. بولاشاق كاسىپ يەلەرى جوبالارىن مىندەتتى تۇردە ساران قالاسىندا جۇزەگە اسىراتىن بولۋى كەرەك. ابدەن سارالانعان جوبا ينۆەستيسيالىق كلۋبتىڭ مۇشەلەرىنە تانىستىرىلىپ، سوڭعى شەشىم قابىلدانادى. فيليال ديرەكتورى يانا ۆنۋكەۆيچتىڭ ايتۋىنشا، مۇنداي تاجىريبە باسقا دا قالا-اۋدانداردا جالعاسىن تابۋى ٴتيىس.

«بۇل كلۋبتىڭ جۇمىسى جەمىستى بولاتىنىنا سەنىمىم زور. «ۆەنچۋرلىق قور» ۇلگىسى نەسىمەن جاقسى؟ مۇندا ەكى تاراپ – ستارتاپەر دە، ينۆەستور دا جوبانىڭ تابىستى بولۋىنا مۇددەلى. اتاپ وتەرلىگى سول، تاجىريبەلى بيزنەسمەن جاس كاسىپكەرمەن تىعىز بايلانىستا بولادى، ونى قامقورلىعىنا العاندىقتان، وعان اقىل-كەڭەسىن دە بەرەدى، تاجىريبەسىمەن بولىسەدى، قاجەتتى ٴبىلىمىن بەرەدى. ياعني اقشاسىن ۇستاتىپ قويىپ، «ال، تابىس اكەل» دەگەن اڭگىمە بولمايدى. اعا بۋىن كاسىپكەرلەردىڭ وزدەرى كەلىپ، جاستارعا قارجى بەرۋدىڭ وسىنداي جولىن ۇسىنعاندىعى ٴتىپتى ەرەكشە. ارتىق قاراجاتىن جەكە قاجەتىنە جۇمساماي، بىرەۋگە كومەكتەسسەم دەگەن نيەتتەرى قۇرمەتكە لايىق. سوندىقتان، جاستاردىڭ «بيزنەس-پەرىشتە» بولۋعا بەل بۋعان اعالارىنىڭ كوڭىلىنەن شىعۋىنا تىلەكتەسپىن»، ­– دەيدى يا. ۆنۋكەۆيچ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي