BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازاقستاندا قۇراستىرىلعان كولىكتەرگە سۇرانىس ارتادى

وتكەن جىلى كولىك ساۋداسىن قىزدىرىپ، مول پايداعا كەنەلەمىز دەگەن وتاندىق اۆتوديللەرلەردىڭ ٴۇمىتى اقتالمادى. ويتكەنى جاڭا كولىككە دەگەن سۇرانىس ەكى ەسە تومەندەگەن.

بىلتىر ٴوز ەلىمىزدە شىعارىلعان 47 مىڭ تەمىر تۇلپار ساۋدالانىپتى. وتكەن جىلعى جۇمىسىن قورىتىندىلاعان قازاقستان اۆتوبيزنەس قاۋىمداستىعىنىڭ وكىلدەرى الداعى باعىت-باعدارىن ايقىندادى.

وتكەن جىلى ەلىمىزدە قيىر شىعىس پەن باتىس ەۋروپا ەلدەرىندە شىعارىلعان كولىككە دەگەن سۇرانىس جوعارى بولدى. ال رەسەيلىك كولىكتى ساتىپ الۋ كورسەتكىشى 67%-عا تومەندەگەن. بيىل ماماندار ەلىمىزدە قۇراستىرىلعان كولىككە سۇرانىس ارتادى دەپ سەنەدى.

2010 جىلدان بەرى ەكونوميكانىڭ كۇرە جولىندا جىلدامدىعىن ۇدەتىپ، جۇيىتكىگەن اۆتونارىق سالاسى وتكەن جىلى ٴسال باسەڭسىپ قالدى. ويتكەنى تۇتىنۋشىنىڭ تولەم قابىلەتى تومەندەگەندىكتەن، سۇرانىس تا ازايدى. جاعدايدىڭ جاي-جاپسارىن تۇسىندىرگەن قازاقستان اۆتوبيزنەسى قاۋىمداستىعىنىڭ وكىلدەرى وسىلاي دەپ قىنجىلدى. سىرتتان اكەلىنگەن اۆتوكولىكتەر ساۋداسى باسەڭدەگەنىمەن، وتاندىق ونىمگە دەگەن سۇرانىس ۇلعايىپ كەلەدى.

انتون افونين، وتاندىق ٴاۆتووندىرۋشى كومپانيانىڭ اتقارۋشى ديرەكتورى:

- 2015 جىلدىڭ ورتاسىنا دەيىن نارىقتاعى وتاندىق كولىك ۇلەسى 10%-دان ٴسال اسقان ەدى. ٴبىراق بىلتىر الەمدىك قارجى داعدارىسىنا قاراماستان ەلىمىزدە قۇراستىرىلعان كولىك سانى ەكى ەسە ۇلعايىپ، جىل قورىتىندىسى بويىنشا 20%-دى قۇرادى.

سونىمەن بىرگە جاڭا كولىكتەرتەر «ەۋرو-5» مىندەتتى ەكولوگيالىق تالاپقا ساي بولۋى ٴتيىس. بۇل ەكولوگيالىق تالاپ دەگەنىڭىز، كولىكتەن بولىنەتىن گازداعى زياندى حيميالىق قوسپالاردى انىقتايدى. ەۋرووداق ەلدەرىندە «ەۋرو-5» تالابى 2008 جىلدان بەرى مىندەتتەلگەن. ال قازاقستاندا ول 2011 جىلدان بەرى بىرتە-بىرتە ەنگىزىلىپ كەلەدى.

اندرەي لاۆرەنتەۆ، قازاقستان اۆتوبيزنەسى قاۋىمداستىعىنىڭ پرەزيدەنتى:

- ەلىمىزدە وتاندىق اۆتوكولىككە دەگەن سۇرانىستىڭ ارتۋ ٴۇردىسى بايقالادى. بۇل جاقسى جاڭالىق. ويتكەنى نەسيەلەۋ باعدارلاماسى وتاندىق ٴاۆتوندىرىستىڭ دامۋىنا مۇمكىندىك بەرۋدە.

ەلىمىزدىڭ اۆتورانىق سالاسىنىڭ دامۋىنا سەنىم بىلدىرگەن ماماندار بيىل ساۋدالاناتىن وتاندىق كولىكتەر سانىن 55 مىڭعا جەتكىزەمىز دەپ وتىر.

حابار 24.kz


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي