BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اتى الەمگە ٴماشھۇر كولىك قازاقستاننان شىعادى

استانا. 6 تامىز. baq.kz – كەلەسى جىلى اتى الەمگە ٴماشھۇر اۆتوموبيلدىك برەند قازاقستاننان شىعا باستاماق. ۇكىمەت ونىڭ اتىن ازىرگە قۇپيادا ۇستاپ وتىر.  

«ۇكىمەت ۇيىندەگى» ماشينا جاساۋ سالاسىنا ارنالعان كەشەگى ۇلكەن جيىندا تەك يندۋستريا جانە جاڭا تەحنولوگيالار مينيسترلىگىنىڭ ونىمەن كەلىسسوزدەر جۇرگىزىپ جاتقاندىعى جاريا ەتىلدى. تاعى ٴبىر بەلگىلىسى، ول قوستانايدا قۇراستىرىلا باستاماق. جالپى، ۇكىمەتتەگى وسى كەڭەستە اڭعارىلعانىنداي، قوستاناي جەرى قازاقستاندىق اۆتوونەركاسىپتىڭ ٴىرى ورتالىعىنا اينالاتىن كورىنەدى.

جەر-جاھاندا بيۋدجەتى بىرنەشە ميللياردتى عانا قۇرايتىن ەلدەر بار. ال، كەڭەس كەزىندە-اق كەنجە قالعان قازاقستاندىق ماشينا جاساۋ سالاسى قازىرگى كەزدە ٴبىر ٴوزى وسىنداي دەڭگەيگە جەتىپتى. كەشە يندۋستريا جانە جاڭا تەحنولوگيالار ٴبىرىنشى ۆيسە-مينيسترى البەرت راۋ ۇكىمەت مۇشەلەرىنە وتاندىق ماشينا جاساۋ سالاسى ٴونىم شىعارۋ كولەمى بويىنشا بيىلعى جىلى 5 ميلليارد دوللارلىق مەجەنى باعىندىراتىندىعىن جاريا ەتتى. تامساندىراتىن، سۇيسىندىرەتىن ستاتيستيكانى قازاقستاننىڭ ماشينا جاساۋشىلارى وداعىنىڭ باسقارما ٴتوراعاسى، ٴماجىلىس دەپۋتاتى مەيرام پىشەمبايەۆ راستادى.

–ماشينا جاساۋ سالاسى ەلىمىزدە ەڭ ۇدەمەلى دامۋشى سالا بولىپ تابىلادى،–دەدى ول،–ۇدەمەلى يندۋستريالىق-يننوۆاسيالىق دامۋ باعدارلاماسى جۇزەگە اسىرىلعان ٴۇش جىل ىشىندە بۇل سالا ٴوندىرىسى 2،5 ەسەدەن ارتىق ٴوستى!

مەيرام پىشەمبايەۆ ۇكىمەت مۇشەلەرىنە، سول باعدارلامادا 2015 جىلعا قاراي سالانىڭ جالپى ٴونىم 588 ميلليارد تەڭگەنى قۇراۋعا ٴتيىس دەگەن «ماقساتتى ينديكاتور» بەلگىلەنگەندىگىن ەسكە سالدى. ەندى قاراڭىز: 2012 جىلى 657 ميلليارد تەڭگەنىڭ ٴونىمىن شىعارىپتى. ٴسويتىپ، جوسپاردى ۋاقىتىنان بۇرىن ٴارى اسىرا ورىنداعان. بيىلعى جىلى ماشينا جاساۋ سالاسىنىڭ ٴوندىرىس اۋقىمى 800 ميلليارد تەڭگەگە جەتەدى دەپ بولجانۋدا. ال، 2015 جىلعا قاراي ساراپشىلار بۇل كورسەتكىش تريلليون تەڭگەدەن اسىپ كەتەدى دەپ كۇتۋدە.

– بيىلعى ٴساۋىر ايىندا toyota كومپانياسىمەن كەلىسىمگە قول قويىلدى. وعان سايكەس وسى ماركالى ماشينالار 2014 جىلدىڭ كوكتەمىنەن باستاپ قازاقستاندا قۇراستىرىلا باستايدى،–دەپ ٴمالىم ەتتى جۋرناليستەرگە، جيىننان شىققان قازاقستاننىڭ ماشينا جاساۋشىلارى وداعىنىڭ باسقارما ٴتوراعاسى. –وسىدان كەيىن رەنو، نيسسانمەن مەموراندۋم بەكىتىلدى. ياعني، الەمدىك اۆتوونەركاسىپتىڭ كوشباسشىلارى قازاقستاندا ٴوز قورلارىن قۇرۋدا. وسى جاھاندىق كومپانيالارعا قاراپ، ٴوزىمىزدىڭ باسقا كاسىپورىندار دا بوي تۇزەۋدە.

مەيرام پىشەمبايەۆتىڭ ايتۋىنشا، قازىرگى كەزدە ەلىمىزدە كولىك قۇراستىرۋعا كوپتەگەن كومپانيالار قىزىعۋشىلىق بىلدىرۋدە. «ويتكەنى بۇگىندە رەسپۋبليكامىزدىڭ نارىعى 17 ميلليون تۇتىنۋشىمەن شەكتەلمەيدى، ٴبىز ارقىلى كەدەن وداعىنا مۇشە مەملەكەتتەردىڭ نارىعىنا شىعۋعا بولادى،–دەدى ول،–جاقىندا مىسالعا، يتاليانىڭ «iveco» كومپانياسىمەن يتالياندىق جۇك كولىكتەرىن قۇراستىرۋ تۋرالى كەلىسىمگە قول قويىلدى. ياعني، ۇدەرىس باستاۋ الدى. ول كۇن سايىن، جىل ساناپ دامۋدا. قازاقستاندا شىعارىلاتىن كولىكتەردىڭ مودەلدەرى بارعان سايىن كوبەيە بەرەدى. ەلىمىزدەگى بۇل سالادا جۇمىس جاسايتىن كومپانيالار سانى ارتقان ۇستىنە، ارتا تۇسەدى».

ۇكىمەتتەگى جيىن كەزىندە يندۋستريا جانە جاڭا تەحنولوگيالار ٴبىرىنشى ۆيسە-مينيسترى البەرت راۋ جاڭا تەحنولوگيالى ٴوندىرىس – «اۆتوماتتاندىرىلعان دانەكەرلەۋ جەلىسى» وڭتۇستىك كورەيادا سىناقتان ٴوتىپ، ەلىمىزگە بەت العانىن حابارلادى:

– ەندىگى «نوماد» دەگەن جاڭا برەندكە يە بولىپ، ٴبىزدىڭ ماركاعا اينالعان ssangyong كولىكتەرىنىڭ ونداعان شاناق-كۋزوۆتارى كورەيادا وسى قۇرال-جابدىقتا تەستىلىك رەجيمدە شىعارىلدى،–دەدى ا.راۋ،–ياعني، وسى قۇرال-جابدىق سىناقتان ٴوتتى. ٴقازىر ول ەندى قوستانايعا جونەلتىلدى. بۇعان قوسا، قوستانايدا ەندىگى «بوياۋشى قۇرال-جابدىق» مونتاجدالۋدا. وسىلايشا، ٴبىز جىل سوڭىنا قاراي قۋاتتىلىعى جىلىنا 75 مىڭ ماشينانى قۇرايتىن بوياۋشى جەلىگە يە بولامىز. ونىڭ ىشىندە سسانگيونگتىڭ ەنشىسى 25 مىڭ ماشينانى قۇرايدى.

يندۋستريا مينيسترلىگى باسشىلىعىنىڭ وكىلى، كەلەسى جىلى ول جەردە اتاقتى toyota دا ٴوز كولىكتەرىن قۇراستىرۋعا كىرىسەتىنىن ايتتى. «مۇنىڭ سىرتىندا قازىرگى كەزدە ٴبىز الەمگە تانىمال برەندىمەن قازاقستانعا كىرۋى ٴۇشىن الەۋەتتى ستراتەگيالىق ارىپتەستەرىمىزبەن كەلىسسوزدەر جۇرگىزۋدەمىز. سولارعا وسى جەلىنى جۇكتەمەكپىز» دەدى البەرت راۋ.

– ول جەلىدە دانەكەرلەۋ دە، بوياۋ دا جۇرەدى عوي؟–دەپ ناقتىلادى پرەمەر سەرىك احمەتوۆ.

–ٴيا. بۇل رەتتە بوياۋ جەلىسى ورتاق بولادى. ال، قاسىندا بىرنەشە اۆتوالىپتاردىڭ ٴوز دانەكەرلەۋ جەلىلەرى جۇمىس جاسايدى. ياعني، ٴبىرىنشى – جىل سوڭىنا دەيىن ssangyong بولادى. الداعى جىلدىڭ ٴى توقسانىندا toyota ٴوزىنىڭ دانەكەرلەۋ جەلىسىن ورناتادى. ٴبىز تاعى ٴبىر جەلىنى قويۋدى جوسپارلاپ وتىرمىز، ودان دۇنيەجۇزىنە بەلگىلى برەند مودەلدەرى شىعادى.

البەرت راۋ ۇكىمەتكە قازاقستاندىق وندىرۋشىلەردى قولداپ، وتاندىق كولىكتى ساتىپ الۋشى قازاقستاندىقتاردىڭ شىعىنىنىڭ ٴبىر بولىگىن وتەۋدى ۇسىندى. «سىزدەن ٴبىر ۇسىنىستى قولداۋدى سۇرار ەدىك،–دەدى ۇكىمەت جەتەكشىسىنە قايىرىلعان ول،–رەسەي كەزەكتى رەت وزىندە قۇراستىرىلاتىن اۆتوكولىكتەرىن ساتۋ بويىنشا تۇتىنۋشىلىق كرەديتتەردى سۋبسيديالاۋدى تاعى باستادى. بۇل – وتە جاقسى قۇرال. ٴبىراق، وكىنىشكە قاراي، بۇل بىرنەشە جىل بويى ٴبىزدىڭ قولىمىزدان كەلمەۋدە. مەملەكەتتىك ورگانداردان وسى ماسەلەنى تاعى دا ٴبىر رەت قاراۋدى وتىنەمىز!».

ٴبىرىنشى ۆيسە-مينيستردىڭ ايتۋىنشا، ماشينا جاساۋ بويىنشا جاڭا باعدارلاما ازىرلەنىپتى، ول مەمورگانداردىڭ قاراۋىندا جاتىر ەكەن. ەگەر ۇكىمەت باسشىسى قۇپتاسا، رەسپۋبليكالىق بيۋدجەت كوميسسياسى ماقۇلداسا،الگى تەتىك تۇڭعىش رەت باعدارلاما بولىپ قابىلدانادى.

جيىندى قورىتقان پرەمەر سەرىك احمەتوۆ 2020 جىلعا قاراي قازاقستاندا جىلىنا 300 مىڭ اۆتوكولىك شىعارۋ مىندەتى قويىلىپ وتىرعاندىعىن ٴارى بۇل مەجەگە قول جەتكىزۋگە مۇمكىندىك بارلىعىن نىقتادى. 

 

ايحان ٴشارىپ


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي