الماتىدا بيزنەستى كولەڭكەدەن شىعارۋ ٴجۇرىپ جاتىر – باعدات تەلەباي

الماتى، baq.kz ٴتىلشىسى. الماتىدا ساۋدا سالاسىن كولەڭكەدەن شىعارۋ بويىنشا جۇيەلى جۇمىس جۇرگىزىلۋدە. بۇل تۋرالى الماتى قالاسى كاسىپكەرلەر پالاتاسىنىڭ ديرەكتورى باعدات تەلەباي باق وكىلدەرىمەن كەزدەسۋ بارىسىندا ايتتى.

مەكەمە ديرەكتورى ٴقازىر قالاداعى 57 بازاردىڭ 16-سى جاڭعىرتىلعانىن جانە 2018 جىلدىڭ شىلدە ايىندا پروبلەمالىق ماسەلەلەردى انىقتاۋ ٴۇشىن قالا بازارلارىنا پاسپورتتاۋ جۇرگىزگەنىن ايتىپ ٴوتتى.

«نەگىزگى پروبلەما بۇل بازارلاردى قازىرگى زامانعى فورماتقا وتكىزۋدەگى بازار مەنشىك يەلەرىنىڭ قاراجاتى جەتكىلىكسىزدىگى بولىپ وتىر. ٴبىز «جىبەك جولى» وڭىرلىك باعدارلاماسى اياسىندا ماقساتتى قارجىلاندىرۋ مۇمكىندىگى تۋرالى ماسەلە كوتەردىك. ياعني، بازارلاردى جاڭعىرتۋ ٴۇشىن جەڭىلدىگى بار نەسيە بەرۋدى سۇرادىق»، -دەيدى ول.

سونىمەن قاتار ول، سوڭعى جىلدارى مەملەكەتتىڭ ساياساتى بيزنەستى كولەڭكەدەن شىعارۋعا باعىتتالعانىن جانە «اتامەكەن» ۇكپ بۇدان تىسقارى قالماعاندىعىن جەتكىزدى.

«ٴبىزدىڭ ماماندار قالاداعى بازارلاردا كەڭەس بەرۋ جۇمىستارى جۇرگىزىلۋدە. بازاردا ساۋدا جاساۋشى ادام بيزنەسكە قاجەتتى بارلىق كەڭەستى ۇزاققا بارماي-اق الا الادى»، -دەيدى ب.تەلەباي.

ٴسوز اراسىندا ول ەلباسى بيىلعى جولداۋىندا وڭدەۋشى ونەركاسىپ كاسىپورىندارىن دامىتۋعا 500 ملرد تەڭگە جانە ەكونوميكانىڭ وسى سەكتورىنىڭ جوبالارىن نەسيەلەندىرەتىن بانكتەرگە 600 ملرد تەڭگە بولەتىندىگىن ايتا كەلە، بۇل ىشكى جانە سىرتقى نارىقتاردا باسەكەگە قابىلەتتى ٴونىم شىعارا الاتىن وندىرۋشىلەر ٴۇشىن قۋاتتى سەرپىن بەرەتىنىن جەتكىزدى.

«قازاقستاندىق شيكىزاتتىق ەمەس كومپانيالاردىڭ قىزمەتى ەلدىڭ تۇراقتى ەكونوميكالىق دامۋىنىڭ ماڭىزدى ەلەمەنتى سانالادى، سوندىقتان ٴبىزدىڭ ىس-ارەكەتتەرىمىز ەكونوميكانىڭ وسى سەكتورى كاسىپورىندارىنىڭ باستامالارىن قولداۋعا جانە دامىتۋعا باعىتتالۋى ٴتيىس. ٴقازىر ۇكىمەت، «اتامەكەن»، جەرگىلىكتى اتقارۋشى ورگاندار، بانكتەر ەلدىڭ وڭدەۋشى سالاسىن دامىتۋدىڭ ٴتيىمدى تەتىكتەرىن تالقىلاۋدا. بۇل الماتى ٴۇشىن ۋاقىت تالابى – ناقتى ازىق-تۇلىك بەلدەۋىن سالۋ، نارىقتى وتاندىق ونىممەن، كوتەرمە-تاراتۋ ورتالىقتارىنىڭ، قازىرگى زامانعى قويمالاردىڭ جەلىسىمەن تولتىرۋ دەپ ەسەپتەيمىز. ەكىنشىدەن، حالىقتىڭ جىل سايىنعى ۇلكەن ٴوسىمىن ەسكەرە وتىرىپ، توقىما سالاسىن جانە جالپى جەڭىل ونەركاسىپتى دامىتۋ»،-دەيدى ول.

كاسىپكەرلەر پالاتاسىنىڭ ديرەكتورى الداعى ۋاقىتتا الماتى قالاسىندا سكرينينگ وتكىزۋدى جوسپارلاپ وتىرعاندارىن ايتىپ ٴوتتى.

«ول كاسىپكەرلىكتى دامىتۋ ٴۇشىن پەرسپەكتيۆالى باعىتتاردى انىقتاۋعا جانە ناقتى مامانداندىرۋمەن، وڭىرلىك دامۋ كارتاسىن قالىپتاستىرۋعا مۇمكىندىك بەرەدى. سكرينينگ ناتيجەسىندە زەرتتەۋ توبى ايماقتا بيزنەس-جوبالاردى قۇرۋ ٴۇشىن قوسىمشا مۇمكىندىكتەردى قاراستىرىپ، تۇيىتكىلدى ساتتەردى ٴدوپ باسادى»، -دەيدى ول.

ونىڭ ايتۋىنشا، سكرينينگتىڭ كومەگىمەن جۇمىسسىزدار مەن ٴوزىن-وزى جۇمىسپەن قامتىعان تۇرعىنداردىڭ ناقتى سانىن انىقتاۋعا جانە جالپى ەڭبەك الەۋەتىن باعالاۋعا بولادى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!