استانا: 
2231 
0
بۇگىن «نازاربايەۆ ورتالىعىندا» 29 ناۋرىز بەن 9 ماۋسىم ارالىعىندا وتكەن kazroboproject-2018 ٴبىلىم بەرۋ روبوت تەحنيكاسى بويىنشا عىلىمي-زەرتتەۋ جانە شىعارماشىلىق جوبالار كونكۋرسىنىڭ فينالى ٴوتتى. وندا زاعيپ جاندارعا كومەك كورسەتەتىن روبوتتى دايىنداعان وقۋشىلار جەڭىمپاز اتاندى، دەپ حابارلايدى baq.kz ٴتىلشىسى.
سايىستىڭ ەڭ جاس قاتىسۋشىلارىنىڭ ٴبىرى – 11 جاسار توقبەرگەن ٴنۇرالي مەن بەكبولات قۇنانبايەۆ الماتى قالاسىنان كەلدى. ولار بايقاۋدىڭ قورىتىندىسى بويىنشا 1-ورىن الدى.
«ٴبىزدىڭ روبوتىمىزدىڭ ەرەكشەلىگى مۇمكىندىگى شەكتەۋلى جانداردى تاسىمالداۋعا كومەكتەسەدى. زاعيپ جانداردى ارنايى جولاقشا ارقىلى روبوتىمىز ٴبىر جەردەن ەكىنشى جەرگە تاسىمالداۋ قىزمەتىن اتقارادى. مىسالعا الاتىن بولساق، ماكەتىمىزدىڭ قىزىل باتىرماسىن باسساق بەلگىلەنگەن سىزىقپەن بايتەرەككە جەتۋگە بولادى. بولاشاقتا ٴبىز تەك قانا كوشەلەردە ەمەس، عيماراتتىڭ ىشىندە دە جۇرگىزەتىن قىلامىز. جاسالعان جوباعا ٴبىر اي كولەمىندە ۋاقىت كەتتى»، - دەدى جەڭىمپاز وقۋشىلاردىڭ ٴبىرى توقبەرگەن ٴنۇرالي.
بايقاۋدىڭ تاعى ٴبىر قاتىسۋشىسى قاراعاندى وبلىسىنان كەلدى. ٴالىمحان رۋلان مەن راقىمجان ەرەنعايىپ «اقىلدى مەكتەپ» اتتى جوباسىن قورعادى.
«ۇسىنىپ وتىرعان جوبا مەكتەبىمىزدىڭ ۇلگىسىندە جاسالعان. نەگىزگى قۇرىلىمى سيفرلانعان مەدياستانسيا، اۆتوماتتى جارىق قوسۋ جۇيەسى، فوتورەزيستور تۇرىندە جاسالعان. جوبامىز كۇردەلى بولعاندىقتان، كوپ تەر توگىپ جارتى جىلداي ۋاقىت جۇمسادىق. ٴبىز اۋىلدىق جەردىڭ تۋماسى بولعاندىقتان، ادام ٴومىرىن جەڭىلدەتۋ ماقساتىمەن قازىرگى قوزعالىپ وتىرعان ماسەلەلەردىڭ ٴبىرىن شەشۋ جولىندا جوبامىز اكتۋالدى دەپ ەسەپتەيمىز»، - دەپ ويىن ٴبىلدىردى ٴالىمحان رۋلان.
ايتا كەتسەك، اتالعان بايقاۋدىڭ ماقساتى: قازاقستانداعى بالالار مەن جاسوسپىرىمدەردىڭ اراسىندا ٴبىلىم بەرۋ جانە سپورت روبوتتارىن دامىتۋ جانە دارىپتەۋ. چەمپيونات ەكى جاس ساناتى بويىنشا ٴوتتى: 10-15 جاس ارالىعى جانە 16-25 جاس ارالىعى. روبوت تەحنيكاسى جوباسىنا قاتىسۋشىلار ەركىن تاقىرىپ تاڭداي الدى. باستى تالاپ - جوبا قازاقستان حالقىنىڭ ٴومىر ٴسۇرۋ دەڭگەيىن كوتەرۋگە ىقپال ەتۋى ٴتيىس.
مارجان اعىباي
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
14933
0