BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ۇستازدىڭ مارتەبەسىن انىقتايتىن زاڭ جوباسى تالقىلاندى

استانا، baq.kz. وتكەن سەنبى كۇنى «پەداگوگ مارتەبەسى تۋرالى» زاڭ جوباسىنىڭ تۇجىرىمداماسىن تالقىلاۋ بويىنشا ٴبىلىم جانە عىلىم مينيسترلىگىنىڭ ۇيىمداستىرۋىمەن قازمەديا ورتالىعىندا جيىن ٴوتتى. شاراعا مينيسترلىك وكىلدەرى، قالالىق جانە اۋىلدىق مەكتەپ مۇعالىمدەرى مەن مەكتەپ ديرەكتورلارى، اتا-انالار، سونداي-اق كاسىپوداق وكىلدەرى قاتىستى.

زاڭ جوباسىنىڭ تۇجىرىمداماسى ەلباسىنىڭ 2018 جىلدىڭ 5 قازانىنداعى «قازاقستاندىقتاردىڭ ٴال-اۋقاتىنىڭ ٴوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋى اياسىندا ازىرلەنگەن بولاتىن. تالقىلاۋعا ٴبىلىم جانە عىلىم ۆيسە-مينيسترى ەلميرا سۋحانبەرديەۆا الماتى قالاسىنان ونلاين قاتىسىپ، ٴبىرقاتار سۇراقتارعا جاۋاپ بەردى.

«ەلباسى جولداۋىن ورىنداۋ ماقساتىندا مينيسترلىك «پەداگوگ مارتەبەسى تۋرالى» زاڭ جوباسىن ازىرلەپ، تالقىلاۋدا. وسى ماقساتتا جۇمىس توبى قۇرىلدى. ونىڭ ىشىندە مەكتەپ مۇعالىمىنەن باستاپ كوللەدج، جوو پەداگوگتارى، مەملەكەتتىك ورگاندار وكىلدەرى، اتا-انالار دا بار. حالىق جاڭادان ازىرلەنىپ جاتقان زاڭ جوبالارىن تالقىلاۋعا بەلسەندى قاتىسىپ جاتىر. بۇگىندە رەسپۋبليكانىڭ تۇكپىر-تۇكپىرىنەن 2000-عا جۋىق ۇسىنىس كەلىپ ٴتۇستى. ٴالى دە قوسار ۇسىنىستارىڭىزدى bilimdiel.project@mail.ru، pressa.edu@gmail.com ەلەكتروندى ادرەسىنە جىبەرۋلەرىڭىزدى سۇرايمىز»، - دەدى ۆيسە-مينيستر.

زاڭ جوباسىنىڭ تۇجىرىمداماسى ٴبىلىم بەرۋ ۇيىمدارىنىڭ قۇقىقتارى مەن كەپىلدىكتەرىن، پەداگوگيكالىق جانە عىلىمي جۇمىستارىن جۇزەگە اسىرۋدى، سونداي-اق ٴبىلىم بەرۋ دەڭگەيىنىڭ، مەنشىك نىساندارىنىڭ، ٴبىلىم بەرۋ ۇيىمدارىنىڭ ٴتيپى مەن تۇرلەرىنە قاراماستان مەملەكەتتىك، قوعامدىق قولداۋ جانە تانۋ شارالارىن جۇزەگە اسىرۋدى قامتيتىن ٴمۇعالىم مارتەبەسىن كوتەرۋگە باعىتتالعانىن ايتا كەتكەنىمىز ٴجون.

ٴبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ٴبىلىم دەپارتامەنتىنىڭ باس ساراپشىسى ايمان تەلمانقىزىنىڭ ايتۋىنشا، زاڭ جوباسىنىڭ تۇجىرىمداماسى الەۋمەتتىك جەلىدە قىزۋ تالقىلانۋدا. «الايدا، ۇسىنىستار مەن سۇراقتار كوپ قايتالانادى. كوبىسى ۇستازداردىڭ الەۋمەتتىك جاعدايىنا قاتىستى ساۋال جولدايدى. سونداي-اق ٴمۇعالىم مەن اتا-انا اراسىنداعى قارىم-قاتىناسقا قاتىستى ماسەلەلەر ٴجيى كوتەرىلىپ جاتىر. ودان بولەك ۇستازداردى زەينەتكە ەرتە شىعارۋ جايلى كوپ حات الدىق»، دەيدى ا. دۇيسەنبايەۆا.

ٴبىر سوزبەن ايتقاندا، اتالعان زاڭ قايتكەن كۇندە دە ٴمۇعالىمنىڭ توردەگى ورىنىن تومەنگە تۇسىرمەيتىنى انىق. جالپى زاڭ جوباسى كەلەسى جىلدىڭ مامىر، ماۋسىم ايلارىندا قابىلدانۋى مۇمكىن.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي