BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ۇستازدار ۇلتتىق بىلىكتىلىك تەستىلەۋ جايلى: جالاقىمىزدى ارتتىرۋعا زور مۇمكىندىك

نۇرسۇلتان نازاربايەۆتىڭ حالىققا جولداۋىندا مۇعالىمدەر ٴۇشىن بىلىكتىلىك دەڭگەيىن ەسكەرەتىن كاتەگوريالاردىڭ جاڭا كەستەسىن ەنگىزۋ ماسەلەسىن كوتەرىپ، كاتەگوريالاردى ۇلتتىق بىلىكتىلىك تەستىلەۋ ارقىلى بەرۋ كەرەكتىگىنە باسا نازار اۋدارعان بولاتىن. وسى رەتتە ەلىمىز بويىنشا پەداگوگ قىزمەتكەرلەرگە ارنالعان ۇلتتىق بىلىكتىلىك تەستىلەۋ ناۋقانى 26-28 مامىر ارالىعىندا ٴوتتى. ۇلتتىق تەستىلەۋ ورتالىعىنان كەلىپ تۇسكەن اقپاراتقا سۇيەنسەك، ەلىمىز بويىنشا 60 476 ٴمۇعالىم ۇلتتىق بىلىكتىلىك تەستىلەۋىنەن وتۋگە ٴوتىنىش بىلدىرگەن، دەپ حابارلايدى baq.kz اقپارات اگەنتتىگى.

ۇلتتىق بىلىكتىلىك تەستىلەۋدىڭ وتكىزىلۋ بارىسىمەن ٴجىتى تانىسىپ، تەستىلەۋگە قاتىسقان پەداگوگتاردىڭ وي-پىكىرلەرىن ٴبىلۋ ماقساتىندا استانا قالاسىنداعى تەستىلەۋ ورتالىعىنا بارىپ، مەكتەپ مۇعالىمدەرىمەن اڭگىمەلەسكەن ەدىك.

«شىنىمەن، دەڭگەيلىك كۋرستاردان وتپەگەن، جاڭا جۇيەمەن تانىس ەمەس مۇعالىمدەر ٴۇشىن ۇلتتىق بىلىكتىلىك تەستىلەۋدىڭ «پەداگوگيكا، وقۋ ادىستەمەسى» بلوگىن ٴوتۋ قيىندىق تۋعىزاتىنى راس. الايدا، وسىنىڭ ارقاسىندا پەداگوگتار وزدەرىن جەتىلدىرە تۇسۋگە ۇمتىلاتىن بولادى دەگەن ويدامىن. جالپى ٴوزىڭ جەتىك مەڭگەرگەن ٴپان بويىنشا تەستىلەۋدى تاپسىرا الماۋ مۇمكىن ەمەس. اكادەميالىق تۇرعىدا دايىندىعى بار مۇعالىمدەر ٴۇشىن تەستىلەۋ ەش قيىندىق تۋعىزبايدى. سونىمەن قاتار، بىلىكتىلىكتى ارتتىرا وتىرىپ، جالاقىمىزدى دا ارتتىرۋعا زور مۇمكىندىك بار» - دەيدى استانا قالاسىنداعى رايىمبەك باتىر اتىنداعى №50 «قازعارىش» مەكتەپ-ليسەيىنىڭ تاريح ٴپانىنىڭ ٴمۇعالىمى شايكەنوۆ سايلاۋ سەرىكباي ۇلى.

ال، استانا قالاسىنداعى №70 مەكتەپ-ليسەيىنىڭ بيولوگيا ٴپانىنىڭ ٴمۇعالىمى، دەڭگەيلىك كۋرستاردان وتكەن سەرىكقايشا ساعاتبەكوۆا ساباق بەرەتىن ٴپانى بويىنشا ٴوز بىلىمىنە سەنىمدى بولعانىنا بايلانىستى، تەستىلەۋ كەزىندە ەشبىر قوبالجۋ سەزىمىنىڭ بولماعانىن ايتادى.

«پەداگوگتارعا ەشقانداي قىسىم كورسەتىلمەي، اركىم ٴوز قالاۋى بويىنشا تەستىلەۋگە قاتىسىپ جاتىر. تەستىلەۋدىڭ بارلىق پەداگوگتار ٴۇشىن كەزەكتى جانە ۋاقىتىنان بۇرىنعى اتتەستاتتاۋ بولىپ قالا بەرەتىنى قۋانتادى. ياعني، جاڭا اتتەستاتتاۋ مۇعالىمدەردىڭ تىلەكتەرىنە بايلانىستى. ٴبىر سوزبەن ايتقاندا - ەگەر جاڭا وقۋ جىلىنان باستاپ بىلىكتىلىگىڭ ٴۇشىن قوسىمشا تولەماقى العىڭ كەلسە، تەستىلەۋگە قاتىس، ال بۇرىنعى بىلىكتىلىگىڭ بويىنشا جۇمىس ىستەي بەرگىڭ كەلسە – ٴوز قالاۋىڭ دەگەن ٴسوز. تەست سۇراقتارىنا جاۋاپ بەرۋ بارىسىندا ٴبىر نەمەسە بىرنەشە دۇرىس جاۋاپتى تاڭداۋ اسا قيىنعا سوققان جوق، الايدا بەرىلگەن ٴماتىن شەڭبەرىندە ٴمۇعالىمنىڭ اكادەميالىق جانە ادىستەمەلىك الەۋەتىن بىلۋگە باعىتتالعان مان-ماتىندىك تاپسىرمالار بويىنشا ايتارلىقتاي ۋاقىت جۇمساپ، كوپ ويلانۋعا تۋرا كەلدى» - دەيدى ول.

استانا قالاسى №22 مەكتەپ-گيمنازياسىنىڭ باستاۋىش سىنىپ ٴمۇعالىمى، 25 جىلدىق ەڭبەك ٴوتىلى بار، جوعارى ساناتتى ۇستاز ايگۇل سادىربايەۆانىڭ پايىمداۋىنشا، ٴوز بىلىكتىلىگىن ۇنەمى ارتتىرىپ وتىراتىن مۇعالىمدەر ٴۇشىن بۇل سىناق وتە ورىندى، ٴارى كەمشىن تۇستاردىڭ ورنىن تولتىرۋ ٴۇشىن زور مۇمكىندىك:

«ۇلتتىق بىلىكتىلىك تەستىلەۋىنىڭ وتكىزىلۋ ۋاقىتى وتە قولايلى، ويتكەنى وقۋ جىلى اياقتالىپ، وقۋ جىلىنىڭ قورىتىندىسى شىعارىلدى. ۇلتتىق بىلىكتىلىك تەستىلەۋ سۇراقتارىنىڭ ۇلگىسىمەن «ەگەمەن قازاقستان»، «ٴبىلىمدى ەل – وبرازوۆاننايا سترانا» گازەتتەرى جانە ۇلتتىق تەستىلەۋ ورتالىعىنىڭ ينتەرنەت رەسۋرستارىندا تانىسقان بولاتىنبىز. تەستىلەۋ بارىسىندا ەكى بلوكتاعى تەست تاپسىرمالارىنا جاۋاپ بەردىك. اتاپ ايتساق، ٴبىرىنشى بلوك – «وقۋ ٴپانىنىڭ مازمۇنى» بويىنشا 70 تاپسىرما، ەكىنشى بلوك – «پەداگوگيكا، وقۋ ادىستەمەسى» بويىنشا 30 تاپسىرما بەرىلدى. «وقىتۋ ٴپانىنىڭ مازمۇنى» بويىنشا تەست تاپسىرمالارى مۇعالىمدەردىڭ پراكتيكالىق داعدىلارىن، تەرەڭ اكادەميالىق ٴبىلىمىن تەكسەرۋگە باعىتتالعان سياقتى» - دەيدى ايگۇل سادىربايەۆا.

ەلورداداعى №64 مەكتەپ-ليسەيىنىڭ بيولوگيا ٴپانىنىڭ ٴمۇعالىمى اسەل مولدابەكقىزى «پەداگوگ-مودەراتور» ساناتىنا ٴوتۋ ٴۇشىن ٴوز باعىن سىناپ كەلگەن ەكەن. ٴا.مولدابەكقىزى بۇل تەستىلەۋدى وز-وزىنە وقۋ جىلىنىڭ سوڭىندا بەرگەن ەسەپ دەپ باعالايدى.

«ۇلتتىق بىلىكتىلىك تەستىلەۋ پەداگوگ قىزمەتكەرلەردىڭ ٴبىلىمى مەن قابىلەتىن انىقتاۋداعى زور مۇمكىندىك. اتتەستاتتاۋدان وتكەن مۇعالىمدەرگە «پەداگوگ-مودەراتور»، «پەداگوگ-ەكسپەرت»، «پەداگوگ-زەرتتەۋشى»، «پەداگوگ-شەبەر» دەگەن جاڭا كاتەگوريالار بەرىلەدى دەگەن جاڭالىقتى قۋانىشپەن قارسى الدىم. جەكە ٴوز باسىم «پەداگوگ-مودەراتور» كاتەگورياسى بويىنشا تەستىلەۋگە ٴوتىنىش بەرگەن ەدىم. اتتەستاتتاۋدان بارلىق ٴوتىنىش بىلدىرۋشىلەر وتە الادى دەگەندى ەستىگەن سوڭ بىردەن ٴوتىنىش جازۋعا بەل بۋدىم» - دەيدى اسەل مولدابەكقىزى.

ال №79 مەكتەپ-ليسەيىنىڭ تاريح ٴپانىنىڭ ٴمۇعالىمى، ٴبىلىم بەرۋ سالاسىندا 24 جىلعا جۋىق ەڭبەك ەتكەن مارال بەرماگانبەتوۆ مۇعالىمدەر بىلىكتىلىك تەستىلەۋىن تاپسىرا وتىرىپ، وزدەرىن ۇدايى جەتىلدىرۋگە ىنتالاندىرا تۇسەتىندىگىن ايتادى.

«تەستىلەۋدىڭ ناتيجەسىندە مۇعالىمدەردىڭ جالاقىسى بىلىكتىلىگىنىڭ راستالۋىنا بايلانىستى وسەدى. بۇگىندە ۇستازدار قاۋىمى جاڭارتىلعان مازمۇنداعى وقۋ باعدارلاماسى شەڭبەرىندە ٴبىلىم بەرۋدە. حالىقارالىق ستاندارتتارعا ساي ٴارى نازاربايەۆ زياتكەرلىك مەكتەپتەرىندە بەيىمدەلۋدەن وتكەن زاما­ناۋي وقۋ باعدارلامالارىنان تۇراتىن جاڭارتىلعان مازمۇنداعى ٴبىلىم بەرۋ – بالالارىمىزدىڭ جارقىن بولاشاعىنىڭ كەپىلى. ويتكەنى جاڭارتىلعان باعدارلاما بالالارعا قاجەتتى فۋنكسيالىق ساۋاتتىلىق پەن سىني تۇرعىدان ويلاۋ قابىلەتىن دارىتادى. مۇعالىمدەردى اتتەستاتتاۋدان وتكىزۋدىڭ جاڭا فورماتتاعى جۇيەسى شەڭبەرىندەگى تەستىلەۋ سۇراقتارى ورىندى ٴارى ساۋاتتى قۇرىلعان دەپ انىق ايتا الامىن. بۇگىندە ارىپتەستەرىمنىڭ كوبى ٴوز ەرىكتەرىمەن وسى ۇلتتىق بىلىكتىلىك تەستىلەۋدەن سۇرىنبەي ٴوتىپ جاتىر. بۇل مۇعالىمدەرىمىز ٴبىلىمدى دە بىلىكتى، وقۋ باعدارلاماسىن جەتىك مەڭگەرگەن، وزدەرىنە سەنىمدى جانە ەشبىر تەستىلەۋدەن قورىقپايدى دەگەنگە سايادى» - دەيدى پەدوگوگ.

№37 ورتا مەكتەپتىڭ قازاق ٴتىلى مەن ادەبيەتى ٴپانىنىڭ ٴمۇعالىمى، 20 جىلدىق ەڭبەك ٴوتىلى بار جوعارى ساناتتى ۇستاز ارمان ٴازىمحان ۇلى دا ۇلتتىق بىلىكتىلىك تەستىلەۋىنىڭ ۇتىمدى تۇستارىمەن ٴبولىستى.

«وقۋ ٴپانىنىڭ مازمۇنى» جانە «وقۋ ادىستەمەسى مەن پەداگوگيكا» مودۋلدەرى بويىنشا ازىرلەنگەن سۇراقتاردىڭ 70%-ى پاندىك بىلىمگە جانە 30%-ى پەداگوگيكا مەن ادىستەمەگە باعىتتالعان. تەستىلەۋگە بولىنگەن 3 ساعات 20 مينۋت ۋاقىت كىتاپشاداعى سۇراقتارعا تولىققاندى جاۋاپ بەرۋگە جەتكىلىكتى. ارينە، ماتەماتيكا، فيزيكا، حيميا، ينفورماتيكا پاندەرى بويىنشا 30 مينۋتقا ارتىق ۋاقىت بولىنگەن، بۇل اتالمىش پاندەردەگى ەسەپ-قيساپقا بايلانىستى بولار. ايتا كەتكەن ٴجون، پەداگوگ قىزمەتكەرلەردى اتتەستاتتاۋ ٴۇشىن ۇلتتىق تەستىلەۋ ورتالىعىمەن قالىپتاستىرىلعان سۇراقتار ورىندى ٴارى ساۋاتتى قۇراستىرىلعان» - دەيدى ارمان ٴازىمحان ۇلى.

سونىمەن، پەداگوگتاردىڭ بىلىكتىلىك ساناتتارىن تاعايىنداۋ ەكى كەزەڭدە جۇرگىزىلەتىنىن اتاپ ايتۋ قاجەت. ياعني، مامىر ايىندا تەستىلەۋدەن وتكەن مۇعالىمدەر قىزمەتتىڭ قورىتىندىلارىن كەشەندى تالدامالىق قورىتىندىلاۋ كەزەڭىنە قۇجاتتارىن تاپسىرادى. ال تەستىلەۋدەن وتە الماعان نەمەسە بەلگىلى ٴبىر سەبەپتەرگە بايلانىستى تەستىلەۋگە قاتىسا الماعان مۇعالىمدەردىڭ الداعى قاراشا ايىندا تەستىلەۋدى تاپسىرۋ مۇمكىندىكتەرى بار.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي