BAQ.kz - Қазақстан жаңалықтары USD 379.36 BAQ.kz - Қазақстан жаңалықтары EUR 424.47 BAQ.kz - Қазақстан жаңалықтары RUB 5.88
استانا:

«وڭتۇستىك رابات» گازەتى: جالاقىسى 300 مىڭ تەڭگە مۇعالىمدەر

استانا، baq.kz. بۇگىندە مۇعالىمدەردىڭ جالاقىسى كوپتەپ تالقىلاناتىن تاقىرىپتاردىڭ ٴبىرى. ۇستازداردىڭ باسىم بولىگى جالاقىسىنىڭ ازدىعىنا شاعىمدانعانىمەن، 300 مىڭ تەڭگەدەن استام جالاقى الاتىندار بارشىلىق. وسى رەتتە، «وڭتۇستىك رابات» گازەتى ەلىمىزدەگى تابىسى جوعارى مۇعالىمدەرمەن سۇحباتتاسقان ەكەن.

342 000 تەڭگە. بۇل – شىمكەنت قالاسىنىڭ ى. التىنسارين اتىنداعى №65 مەكتەپ-گيمنازياسىنىڭ ٴمۇعالىمى ايدا ايتقوجايەۆانىڭ ايلىعى. ايتكەنمەن، مۇنداي ەڭبەكاقى – ونىڭ ٴبىر اتتاپ جەتكەن ايلىق جالاقىسى ەمەس. تالاي جىلدارىنىڭ ەڭبەگى.
ايتۋىنشا، ەڭبەك جولىن العاش باستاعاندا العان ايلىعى بۇدان بىرنەشە ەسە از بولىپتى. ٴتىپتى، ايلىعى شايلىعىنا جەتپەي، قينالعان كەزدەرى دە جەتەرلىك.
دەگەنمەن قول قۋسىرىپ وتىرماي، ايلىعىن وسىرۋگە سەپ بولار بىلىكتىلىك جەتىلدىرۋ كۋرستارىنىڭ بارىنە قاتىسقان. سونىمەن ورىس ٴتىلى مەن ادەبيەتى ٴپانى ٴمۇعالىمىنىڭ وسىنداي ايلىق الۋىنىڭ سىرى نەدە؟ مەكتەپ مۇعالىمدەرى كوپ ايلىق الۋى ٴۇشىن نە ىستەۋى ٴتيىس؟ بار سۇراقتىڭ جاۋابىن ايدا ايتقوجايەۆانىڭ وزىنەن سۇراپ–بىلدىك.

العاشقى ايلىعىم 100 رۋبل بولدى

ايدا ايتقوجايەۆا

– پەدينستيتۋتتى 1988 جىلى ٴتامامدادىم. ول كەزدە جۇمىسقا وقۋ ورنىنىڭ جولداماسىمەن قابىلدايتىن. ٴسويتىپ، مەملەكەتتىك جولدامامەن №5 مەكتەپكە جۇمىسقا ورنالاستىم. ٴبىراق، جۇمىس ىستەمەدىم. سەبەبى، اياعىم اۋىر ەدى. مەكتەپكە تىركەلدىم دە، بىردەن دەكرەتتىك دەمالىسقا شىعىپ كەتتىم. اراعا ٴبىر جىل سالىپ، 1989 جىلدىڭ قاڭتار ايىنان ٴوز ەركىممەن №41 مەكتەپكە اۋىسىپ، جۇمىسقا كىرىستىم. ەڭ العاشقى ۇستازدىق جالاقىمدى سول كەزدە الدىم. مولشەرى – 100 رۋبل ەدى، – دەيدى ايدا ايتقوجايەۆا.
كسرو تۇسىندا العاشقى جالاقىسى 100 رۋبل بولعان ٴمۇعالىم: ەلىمىز تاۋەلسىزدىگىن جاريالاعانىنان كەيىن ۇلتتىق ۆاليۋتا – تەڭگە اينالىمعا ەنگەندە، ايلىعى 30 مىڭ تەڭگەدەن اسپاعانىن ايتادى.
– تەڭگە اۋىسقاندا دەكرەتتىك دەمالىستا بولدىم. سوندىقتان دا، العاشقى تەڭگەلەي جالاقىمدى 1995 جىلى وسى مەكتەپكە ورنالاسقاندا الدىم. ونىڭ مولشەرى – 30 مىڭ تەڭگە ەدى. اراعا 23 جىل سالىپ ايلىعىم – 342 مىڭ تەڭگەگە جەتتى. بۇدان زەينەتاقى جارنالارى، الەۋمەتتىك جارنالار مەن باسقاداي شىعىندار شەگەرىلەدى. سوندا قولىما تازا – 270–275 مىڭ تەڭگە تيەدى. بۇل دا از اقشا ەمەس. سوعان شۇكىرشىلىك ەتەمىن. ايلىعىم وسىعان جەتۋى ٴۇشىن كوپ ەڭبەكتەندىم، بىلىكتىلىگىمدى ارتتىردىم، قاجەتتى كۋرستارعا قاتىسىپ ٴبىلىمىمدى شىڭدادىم، تىنباي ىزدەندىم،–دەيدى كەيىپكەرىمىز.

قانداي ٴمۇعالىمنىڭ جالاقىسى وسەدى؟

ايدانىڭ ٴسوزىن ارىپتەستەرى دە قوستايدى. ينفورماتيكا ٴپانىنىڭ ٴمۇعالىمى نۇرزيا قاسىموۆا دا سولاردىڭ ٴبىرى. ايتۋىنشا، ىزدەنىمپاز، بىلۋگە قۇشتار، بىلىكتىلىگىن شىڭداۋدان قاشپايتىن ۇستازدار ٴۇشىن ٴورىس كەڭ. جوعارى جالاقى – سونىڭ ايعاعى.

نۇرزيا قاسىموۆا

– وسى مەكتەپتە ينفورماتيكا پانىنەن ساباق بەرگەنىمە 15 جىل بولدى. بۇرىندارى جالاقىم ورتا ەسەپپەن 70–80 مىڭ تەڭگەدەن اسپايتىن. 2016 وقۋ جىلدان باستاپ 1 سىنىپتار، 2017 جىلدان باستاپ 2; 5; 7، 2018 جىلدان باستاپ 3; 6; 8 سىنىپتار جاڭارتىلعان ٴبىلىم مازمۇنىمەن وقۋعا كوشتى. وسى سىنىپتاردا وتەتىن ساعاتتارىم بولعاندىقتان جالاقىما – 30 پايىز ۇستەمەاقى قوسىلدى. بۇدان بولەك ۇشتىلدىلىككە بايلانىستى اعىلشىن ٴتىلىنىڭ كۋرسىنا قاتىسىپ، «ۆ2» تىلدىك دەڭگەيى بويىنشا سەرتيفيكات الدىم. وسى سەرتيفيكات ماعان ينفورماتيكا ساباعىن اعىلشىن تىلىندە وتۋگە جول اشتى. بيىلدىڭ قىركۇيەك ايىنان باستاپ جالاقىما تاعى دا 35 مىڭ تەڭگە قوسىلدى. ٴسويتىپ، باسقا شىعىنداردى الىپ تاستاعاندا بۇگىندە الاتىن ايلىعىم – 180 مىڭ تەڭگەگە جەتتى،ٴ–ديدى نۇرزيا قاسىموۆا.

قازاق ٴتىلى مەن ادەبيەتى ٴپانىنىڭ ٴمۇعالىمى مارفۋعا كۋنتايەۆا دا بىلىكتىلىگىن ارتتىرىپ، ٴتۇرلى كۋرستارعا قاتىساتىن ۇستازدارعا مەملەكەت تاراپىنان قولداۋ بار ەكەنىن ايتادى.
– ەڭبەك ٴوتىلىم 20 جىلدان اساتىن، جوعارى ساناتتى، ٴبىرىنشى دەڭگەيلى ۇستازبىن. ەڭبەك ٴوتىلىم مەن ساناتىما بايلانىستى، 18 ساعاتقا ارنالعان جالاقىما بازالىق لاۋازىمدىق جالاقىنىڭ – 100%-ى قوسىلادى. ٴبىرىنشى دەڭگەيلى ۇستاز بولعانىم ٴۇشىن (18 ساعاتقا ارنالعان) جالاقىما تاعى دا ۇستەمەاقى قوسىلادى. ونىڭ مولشەرى لاۋازىمدىق جالاقىمنىڭ مولشەرىمەن پارا-پار. جاڭارتىلعان ٴبىلىم مازمۇنىمەن وقيتىن سىنىپتارعا ساباق بەرگەنىم ٴۇشىن تاعى دا 30 پايىز ۇستەمەاقى الامىن. وعان «شەبەر ٴمۇعالىم» دەگەن لاۋازىمىم ٴۇشىن تاعى دا 50 پايىز ۇستەمەاقىنى قوسىڭىز. وسىلايشا 30 ساعاتتىق جۇكتەمەمەن – 270 مىڭ تەڭگە جالاقى الىپ وتىرمىن. مۇنىڭ بارلىعى دا بىلىكتىلىگىمدى ارتتىرعانىمنىڭ ناتيجەسى،–دەيدى مارفۋعا كۋنتايەۆا.

جالاقىسى از مۇعالىمدەر دە بار

ايگۇل كەرىمبايەۆا

ى.التىنسارين اتىنداعى №65 مەكتەپ–گيمنازياسى ديرەك-تورىنىڭ ورىنباسارى ايگۇل كەرىمبايەۆانىڭ ايتۋىنشا، اتالعان ٴبىلىم ورداسىنداعى ەڭ تومەنگى جالاقى – 46 مىڭ تەڭگە.
– ول دا ماگيسترانت-وقىتۋشىنىڭ ايلىعى. ەڭبەك ٴوتىلى جوق، اپتاسىنا 3–اق كۇن جۇمىسقا كەلەتىن ونىڭ جالپى ساعاتى – 12. سوندىقتان ايلىعى از. ال ەڭبەك ٴوتىلى 1 جىلعا تولماعان، 18 ساعاتتان كەم ەمەس ساباعى بار كەيبىر ۇستازدار 83 مىڭ (گريازنىي) تەڭگە ايلىق الادى ەكەن. ٴبىراق، مۇنداي جالاقى الاتىن ۇستاز بۇل مەكتەپتە ساۋساقپەن سانارلىق. ماسەلەن، ٴبىلىم ۇياسىندا 180 ٴمۇعالىم بولسا، سونىڭ ٴ101–ى جوعارى، ٴ38–ى ٴبىرىنشى، ٴ24-ى ەكىنشى ساناتتى ۇستاز. وسى مۇعالىمدەردىڭ ٴ68–ى دەڭگەيلىك كۋرستان وتكەن. ياعني ولارعا دەڭگەيىنە وراي ۇستەمەاقى قوسىلادى. ال 1،2،3،5،6،7،8 سىنىپتاردا ساباق بەرەتىن مۇعالىمدەردىڭ بارلىعى جاڭارتىلعان ٴبىلىم باعدارلاماسىمەن جۇمىس جاساعانى ٴۇشىن 30 پايىز ۇستەمەاقى الادى. بولەك ۇلتتىق بىلىكتىلىك تەستىن تاپسىرىپ، «شەبەر پەداگوگ»، «زەرتتەۋشى پەداگوگ»، «ساراپشى پەداگوگ»، «پەداگوگ مودەراتور» بىلىكتىلىك ساناتىن العان ۇستازدارعا قوسىمشا ۇستەماقى بار. ۇشتىلدىلىك اياسىندا جاراتىلىستانۋ پاندەرىن اعىلشىن تىلىندە وقىتاتىن ۇستازدارعا دا 35 مىڭ تەڭگە كولەمىندە اقى تولەنەدى،-دەيدى ايگۇل كەرىمبايەۆا.
ول مۇعالىمدەرگە مەملەكەت تاراپىنان بارلىق جاعدايدىڭ جاسالىپ وتىرعانىن ايتىپ، مۇعالىمدەردى بىلىكتىلىگىن ارتتىرۋعا، كۋرستارعا قاتىسۋعا شاقىرادى. سەبەبى، كۋرسقا قاتىسىپ بىلىكتىلىگىن ارتتىرعان مۇعالىمدەردىڭ جالاقىسىنا اجەپتەۋىر ۇستەمەاقى قوسىلادى ەكەن

سونىمەن… نە ىستەمەك كەرەك؟

پەداگوگتاردىڭ اڭگىمەسىنەن تۇيگەنىمىز 250–300 مىڭ تەڭگە جالاقى الۋ ٴۇشىن بىلىكتىلىكتى شىڭداپ، كۋرستارعا قاتىسۋ كەرەك. وسى ورايدا پەداگوگتار ٴۇشىن قانداي كۋرستار بار؟ وعان قاتىسۋدىڭ تالاپتارى قانداي؟ ول ٴۇشىن نە ىستەۋ كەرەك؟ بۇل ساۋالداردىڭ جاۋابىن شىمكەنت قالالىق ٴبىلىم باسقارماسىنان سۇراپ-بىلدىك.

– ەلباسى 2011 جىلعى قازاقستان حالقىنا جولداۋىندا: «2020 جىلعا دەيىن بارلىق مەكتەپتەر 12 جىلدىق بىلىمگە كوشۋى كەرەك» دەگەن بولاتىن. وسى ورايدا «100 ناقتى قادام» ۇلت جوسپارىنا سايكەس، 2016 جىلدان باستاپ ەلىمىزدىڭ ٴبىلىم بەرۋ جۇيەسى جاڭارتىلعان ٴبىلىم بەرۋ باعدارلاماسىنا كەزەڭ-كەزەڭىمەن كوشىرىلە باستادى. بۇگىنگى تاڭدا جاڭا باعدارلاما 1،2،3،5،6،7،8 سىنىپتارعا ەنگىزىلگەن. جاڭا باعدارلاماعا سايكەس، وسى سىنىپتىڭ وقۋشىلارى 5 كۇندىك وقۋ اپتاسىنا كوشتى. ودان بولەك بۇل سىنىپتاردا ٴداستۇرلى وقۋلىقپەن قاتار سيفرلىق وقىتۋ رەسۋرستارى (سور) قولدانىلۋدا. ۇشتىلدىلىكتى قولداۋ ماقساتىندا، اعىلشىن ٴتىلىن وقىتۋ ساعاتتارى كوبەيىپ، «جاراتىلاستانۋ» پاندەرىن اعىلشىن تىلىندە وقىتۋ قولعا الىندى. سونداي–اق، جاڭا باعدارلاماعا سايكەس، العاش رەت قازاق ٴتىلدى مەكتەپتەردە 1-سىنىپقا «ورىس ٴتىلى» ٴپانى ەنگىزىلدى. ٴبىلىم جۇيەسىندەگى مۇنداي وزگەرىستەر پەداگوگتاردىڭ بىلىكتىلىگىنىڭ دە سوعان ساي بولۋىن تالاپ ەتەدى. ياعني، وسى ۇدەرىستەردىڭ ۇدەسىنەن شىعۋ ٴۇشىن وعان ۇستازدار قاۋىمى دا ساقاداي ساي بولۋى كەرەك. وسى ماقساتتا «نازاربايەۆ زياتكەرلىك مەكتەبى» دەربەس ٴبىلىم بەرۋ ۇيىمىنىڭ «پەداگوگيكالىق شەبەرلىك ورتالىعى» مەن «كەمبريدج» ۋنيۆەرسيتەتىنىڭ ٴبىلىم بەرۋ فاكۋلتەتى بىرلەسىپ بىلىكتىلىكتى ارتتىرۋدىڭ دەڭگەلىك باعدارلاماسى بويىنشا جانە «ورلەۋ» بىلىكتىلىكتى ارتتىرۋ ۇلتتىق ورتالىعى» بازاسىندا جاڭارتىلعان ٴبىلىم بەرۋ مازمۇنى اياسىندا بىلىكتىلىكتى ارتتىرۋ كۋرستارى ۇيىمداستىرىلۋدا،– دەيدى ٴبىلىم باسقارماسىنداعىلار.
بۇگىندە قالا پەداگوگتارىنىڭ 89%–ى (12 973) جاڭا مازمۇندا ٴبىلىم بەرۋ باعدارلاماسىنا سايكەس بىلىكتىلىگىن ارتتىرۋ كۋرستارىنان ٴوتىپتى. تاعى 3000–عا جۋىق ۇستاز بىلىكتىلىكتى ارتتىرۋدىڭ دەڭگەيلىك باعدارلاماسى بويىنشى ۇزارتىلعان كۋرستاردان وتكەن.
ٴۇش ٴتىلدى ٴبىلىم بەرۋ بويىنشا 956 ٴمۇعالىم تىلدىك كۋرستاردا بىلىكتىلىكتەرىن جەتىلدىرگەن. 2017–2018 وقۋ جىلىنان باستاپ قالامىزداعى 43 مەكتەپتە پيلوتتىق رەجيمدە فيزيكا، حيميا، بيولوگيا جانە ينفورماتيكا پاندەرى اعىلشىن تىلىندە وقىتىپ جاتىر. 2018 جىلدىڭ قىركۇيەك ايىنان باستاپ تاعى دا 84 مەكتەپ وسى پاندەردى اعىلشىن تىلىندە وقىتىپ جاتىر.
پەداگوگ قىزمەتكەرلەردى اتتەستاتتاۋدىڭ جاڭا فورماتىنا سايكەس 2018 جىلى ۇلتتىق بىلىكتىلىك تەستتەن وتكەن 36 ٴمۇعالىم «پەداگوگ–شەبەر»، 711 ٴمۇعالىم «پەداگوگ–زەرتتەۋشى»، 446 ٴمۇعالىم «پەداگوگ–ساراپشى»، 361 ٴمۇعالىم «پەداگوگ–مودەراتور» بىلىكتىلىك ساناتتارىن العان. بۇل وسىنشاما ۇستازدىڭ جالاقىسىنا (وقىعان كۋرسىنا، العان ساناتىنا قاراي) قوسىمشا ۇستەماقىلار قوسىلدى دەگەن ٴسوز. سونداي-اق، كاتەگورياعا بايلانىستى دا قوسىمشا اقى مولشەرى وزگەرىپ وتىرادى.

ٴمۇعالىمنىڭ جالاقىسىن قالاي ەسەپتەيدى؟

كاتەگورياعا بايلانىستى اقى تولەۋدەگى وزگەشەلىكتەر مەن ايلىق جالاقى، ونىڭ ۇستىنە قوسىلاتىن ۇستەماقىلارى قانداي تارتىپپەن ەسەپتەلەدى؟
ٴبىلىم باسقارماسىنىڭ بەرگەن مالىمەتىنشە، جالاقى مۇعالىمدەردىڭ ەڭبەك وتىلىنە، ساناتىنا (كاتەگوريا) جانە جۇكتەلگەن ساعاتىنا قاراي تاعايىندالادى. بۇدان بولەك، ۇستازدارعا سىنىپ جەتەكشىلىگى ٴۇشىن، كابينەت مەڭگەرۋشىلىگى ٴۇشىن، داپتەر تەكسەرگەنى ٴۇشىن دە ۇستەماقى تولەنەدى.

ونىڭ كولەمى:
سىنىپ جەتەكشىلىگى ٴۇشىن:
– 1-4 سىنىپتاردىڭ جەتەكشىلىگىنە –
4424 تەڭگە
– 5-11 سىنىپتاردىڭ جەتەكشىلىگىنە –
5309 تەڭگە

قازاق، ورىس، اعىلشىن ٴتىلى مۇعالىمدەرىنە، ماتەماتيكا، فيزيكا،
حيميا، بيولوگيا پاندەرىنىڭ داپتەرلەرىن تەكسەرگەنى ٴۇشىن قوسىمشا ۇستەمەاقى قوسىلادى.
ٴدال سونداي ۇستەمەاقى 1-4 سىنىپتاردىڭ مۇعالىمدەرىنە دە قاراستىرىلعان.
پاندىك كابينەتى بار مۇعالىمدەرگە –
3539 تەڭگە اقشا تولەنەدى

بىلىكتىلىگى ٴۇشىن:
جوعارى ساناتتاعى ۇستازعا – بلج-نىڭ 100%، ياعني – 17697 تەڭگە;
ٴى ساناتتاعى ۇستازعا – بلج-نىڭ 50 %،
ياعني — 8848 تەڭگە;
ٴىى ساناتتاعى ۇستازعا – بلج-نىڭ 30 %،
ياعني — 5309 تەڭگە ۇستەماقى قوسىلادى.

بۇعان جاڭارتىلعان ٴبىلىم مازمۇنى بويىنشا ساباق بەرەتىن ساعاتتار ٴۇشىن ۇستەمەاقىنى قوسىڭىز. سونداي–اق، ەگەر ۇستاز جوعارىدا ايتىلعانداي قانداي دا ٴبىر كۋرستارعا قاتىسىپ بىلىكتىلىگىن ارتتىرعان بولسا نەمەسە ۇشتىلدىلىككە سايكەس قانداي دا ٴبىر تىلدىك دەڭگەيدىڭ سەرتيفيكاتىن العان بولسا وعان جوعارىدا اتالعان ۇستەماقىلار قوسىلادى. الايدا جالپى سوممادان زەينەتاقى جارنالارى مەن الەۋمەتتىك اۋدارىمداردىڭ شەگەرىلىپ تاستالاتىنىن ۇمىتپاعان ٴجون.

قاجەت ٴۇشتاعان: دەڭگەي، سانات، سەرتيفيكات

1. بىلىكتىلىك ارتتىرۋدىڭ دەڭگەيلىك باعدارلاماسى
پەداگوگ كادرلارىنىڭ بىلىكتىلىگىن ارتتىرۋدىڭ دەڭگەيلىك باعدارلاماسى – 2012 جىلدان بەرى جۇزەگە اسىرىلادى. سول ٴۇشىن ٴبىلىم بەرۋ ۇيىمىنىڭ پەداگوگيكالىق كەڭەسى ٴار جىلدىڭ 20 قىركۇيەگىنە دەيىن كۋرستاردا وقۋعا ۇمىتكەر پەداگوگيكالىق قىزمەتكەرلەردىڭ قۇجاتتارىن قارايدى. ٴسويتىپ، 1 قازانعا دەيىن قالالىق ٴبىلىم بولىمىنە پەداگوگيكا كادرلارىنىڭ كۋرستارعا جىبەرىلگەنى تۋرالى ەركىن نىسانداعى ٴوتىنىم جولدايدى. ٴبىلىم ٴبولىمى 30 قاراشاعا دەيىن ۇسىنىلعان وتىنىمدەردى قاراپ، كەلىسىلگەن تىڭداۋشىلاردىڭ ٴتىزىمىن بەكىتەدى.

ودان سوڭ 20 جەلتوقسانعا دەيىن:
– قىسقا مەرزىمدى كۋرستاردىڭ تىڭداۋ-شىلارىنىڭ ٴتىزىمىن كۋرستى وتكىزەتىن ۇيىمعا،
– ۇزاق مەرزىمدى كۋرستاردىڭ تىڭداۋشىلارىنىڭ ٴتىزىمىن قر ٴبىلىم جانە عىلىم مينيسترلىگىنە،
– شەتەلدەگى كۋرستاردىڭ تىڭداۋشىلارىنىڭ ٴتىزىمىن مينيسترلىككە جولدايدى.

مينيسترلىك 25 جەلتوقسانعا دەيىن شەتەلدەگى كۋرستاردا وقۋعا ۇمىتتەنۋشى پەداگوگ كادرلاردىڭ ٴتىزىمىن سول جاقتاعى ورتالىققا جولدايدى. كۋرستىق دايارلىققا 3 جىلدان كەم ەمەس جۇمىس ٴوتىلى بار وقىتۋشىلار قاتىسا الادى.

كۋرستاردىڭ ۇزاقتىعى:
– قىسقا مەرزىمدى كۋرستار – كەمىندە 36 اكادەميالىق ساعات;
– ۇزاق مەرزىمدى كۋرستار – كەمىندە 108 اكادەميالىق ساعات.

شەتەلدەگى كۋرستاردىڭ ۇزاقتىعى:
– قىسقا مەرزىمدى كۋرستار – 3 (ٴۇش) ايعا دەيىن;
– ۇزاق مەرزىمدى كۋرستار – 1 (ٴبىر) جىلعا دەيىن.

ەسكەرتۋ: كۋرستىڭ ٴبىر اكادەميالىق ساعاتى 45 مينۋتتى قۇرايدى.
وسى باعدارلاما اياسىندا بىلىكتىلىگىن شىڭداعان پەداگوگتاردىڭ سەرتيفيكاتى 5 جىلعا عانا جارامدى.

2. بىلىكتىلىك ساناتتارى
قر ٴبىلىم جانە عىلىم مينيسترلىگىنىڭ 29.06.2018 جىلعى №316 بۇيرىعىنا سايكەس، «پەداگوگ–مودەراتور»، «پەداگوگ–ساراپشى»، «پەداگوگ–زەرتتەۋشى»، «پەداگوگ–شەبەر» بىلىكتىلىك ساناتتارىن بەرۋ ٴۇشىن ٴمۇعالىم ەكى كەزەڭنەن تۇراتىن اتتەستتتاۋدان ٴوتۋى كەرەك.
1) ۇلتتىق بىلىكتىلىك تەستىلەۋى;
2) قىزمەت قورىتىندىلارىن كەشەندى تالدامالىق جيناقتاۋ.
اتتەستاتتاۋ 1 جىلدا 2 رەت ىسكە اسادى.
اعىمداعى جىلدىڭ 1–15 تامىز جانە 20 جەلتوقسان – 5 قاڭتار ارالىعىندا.

سول ٴۇشىن ٴمۇعالىم مەكتەپتىڭ جانىنداعى اتتەستاتتاۋ كوميسسياسىنا ٴوتىنىش وتكىزۋ كەرەك. ٴمۇعالىمنىڭ ٴوتىنىشى اتتەستاتتاۋ كوميسسياسىنىڭ وتىرىسىندا قاراپ، اتتەستاتتاۋشى مۇعالىمدەردىڭ ٴتىزىمى بەكىتىلەدى.
ودان سوڭ ٴمۇعالىم مەكتەپتەگى كوميسسياعا 10 تامىز – 6 قىركۇيەك ارالىعىندا ۇلتتىق بىلىكتىلىك تەستىلەۋىنە قاتىسۋ ٴۇشىن ٴوتىنىم جازۋى كەرەك. وعان:
2 دانا 3*4 سۋرەتىن;
جەكە باس كۋالىگىنىڭ كوشىرمەسىن قوسا ۇسىنادى.
مەكتەپ كوميسسيا بارلىق قۇجاتتاردى قالالىق ٴبىلىم باسقارماسىنا وتكىزەدى. باسقارماداعىلار اتتەستاتتاۋشى جايلى ماعلۇماتتاردى ۇبت فيليالى ارقىلى ۇلتتىق تەستىلەۋ ورتالىعىنىڭ دەرەكتەر قورىنا ەنگىزەدى. ونىڭ اتى دەرەكتەر قورىنا تىركەلگەن سوڭ مۇعالىمگە تەست تاپسىرۋعا رۇقسات بەرەتىن قاعاز بەرىلەدى. تەست 10 ناۋرىز – 2 مامىر ارالىعىندا وتەدى. ٴار ساناتتىڭ ٴوزىنىڭ وتپەلى كەزەڭى بار. ماسەلەن، «پەداگوگ–مودەراتور» ساناتىن الۋ ٴۇشىن 100 سۇراق بەرىلەدى. ونىڭ ٴ50–ى ٴوز ٴپانى بويىنشا، ٴ50–ى پەداگوگيكانى وقىتۋ ٴادىسى بويىنشا. ەگەر اتتەستاتتاۋشى ٴوز پانىنەن 50 ۇپاي، ال ەكىنشىسىنەن 30 بالل جيناسا «سىناقتان ٴوتتى» دەپ ەسەپتەلەدى.
سوسىن ەكىنشى كەزەڭ پورتفوليو جيناۋعا كىرىسەدى. ٴسويتىپ، پورتفوليانى ٴبىلىم باسقارماسىنا وتكىزەدى. «پەداگوگ–موردەراتوردىڭ» پورتفولياسى باسقارماعا ەمەس، مەكتەپتە قالادى.

3. تىلدىك دەڭگەيلىك سەرتيفيكات
تىلدىك دەڭگەيلىك سەرتيفيكاتتى الۋ ٴۇشىن – ٴمۇعالىمنىڭ كانديداتۋراسىن مەكتەپ ۇسىنادى. مۇعالىمدەر 9 ايلىق جانە 3 ايلىق كۋرستاردان وتەدى. 9 ايلىق كۋرس وندىرىستەن قول ۇزبەي جۇرگىزىلەدى. ياعني ٴمۇعالىم جۇمىسىن قاتار الىپ، وقي بەرەدى. ال 3 ايلىق كۋرستا ۇستاز وندىرىستەن، ماسەلەن «ورلەۋ» باۇو اق، «نزم» دبۇ ٴپوو-دا وقيتىندار وندىرىستەن قول ۇزەدى.
«ۇستاز» ورتالىعىندا وقيتىندار 9 اي بويى وندىرىستەن قول ۇزبەي ٴبىلىم الادى. جوعارىدا اتالعان ورتالىقتاردىڭ بارىندە دە ساباق رەسپۋبليكالىق دەڭگەيدە وتەدى. مۇنداعى وقىتۋشىلار مۇعالىمدەردى وقىتىپ قانا قويماي، سول وقىتۋ مەحانيزىمىن پراكتيكادان قالاي قولدانىلىپ جاتقانىن قاداعالايدى.
ۇستاز – ٴبىلىم بەرۋ ساپاسىن ارتتىرۋ ساياساتىن تىكەلەي جۇزەگە اسىرۋشى تۇلعا. سوندىقتان دا وعان قانداي قۇرمەت كورسەتسەك تە جاراسادى. دەگەنمەن، باسەكە القىمنان العان مىنا زاماندا قۇر «قۇرمەتپەن» توق بولمايسىڭ. سوندىقتان دا مەملەكەتتىڭ ۇسىنىپ وتىرعان بارلىق مۇمكىنشىلگىن پايدالانىپ قالۋ كەرەك.

شىمكەنت قالاسىنداعى پەداگوگتار سانى – 15 170

ونىڭ 7849-ى – جوعارى جانە ٴبىرىنشى ساناتتى پەداگوگ

جاڭارتىلعان ٴبىلىم بەرۋ باعدارلاماسىمەن ساباق بەرەتىن مۇعالىمدەرگە ساعاتىنا قاراي – 30% ۇستەمەاقى تولەنەدى.

«كەمبريدجدىك» ٴتاسىل بويىنشا بىلىكتىلىگىن ارتتىرعاندارعا:
ٴى–شى دەڭگەي – 100%
ٴىى–شى دەڭگەي – 70%
ٴىىى–شى دەڭگەي – 30% ۇستەمەاقى قوسىلادى

«پەداگوگ–مودەراتور» ساناتىنا – 30%
«پەداگوگ–ساراپشى»
ساناتىنا – 35%
«پەداگوگ–زەرتتەۋشى»
ساناتىنا – 40%
«پەداگوگ–شەبەر»
ساناتىنا –50% ۇستەمەاقى قوسىلادى

تىلدىك دەڭگەيدە
سەرتيفيكاتى بارلارعا – 35000 تەڭگە
ۇستەمەاقى بار.

ايجان ەرمەكقىزى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي