كورەيانىڭ ونەر ۋنيۆەرسيتەتى قازاقستاندىق جاستارعا ارنايى گرانت ٴبولدى

كورەيانىڭ ۇلتتىق ونەر ۋنيۆەرسيتەتى قازاقستاندىقتاردىڭ ٴبىلىم الۋى ٴۇشىن ارنايى گرانت ٴبولدى، دەپ حابارلايدى baq.kz اقپارات اگەنتتىگى قر پرەزيدەنتىنىڭ «بولاشاق» حالىقارالىق ستيپەندياسىنىڭ سايتىنا سىلتەمە جاساپ.

كورەيانىڭ ۇلتتىق ونەر ۋنيۆەرسيتەتى (k-arts/knua) 1993 جىلى اشىلعان جانە وڭتۇستىك كورەيانىڭ سەۋل قالاسىندا ورنالاسقان. ۋنيۆەرسيتەتتە مۋزىكا مەكتەبى، دراما، كينو جانە مۋلتيمەديا، بي، بەينەلەۋ ونەرى جانە كورەي ٴداستۇرلى ونەرى سياقتى التى فاكۋلتەت بويىنشا 26 دەپارتامەنت جۇمىس ىستەيدى.

ۋنيۆەرسيتەت ارتىستىك تالانتى بار جاستاردى قولداۋ ماقساتىندا 2019 جىلعا ارنالعان «art major asian» (ama) ستيپەنديالىق باعدارلاماسىن ۇسىنادى. اتالمىش باعدارلاما ارقىلى باكالاۆرياتقا جانە ماگيستراتۋراعا تۇسۋگە مۇمكىندىك جاسالعان.

ستيپەنديانىڭ ىشىنە مىنالار كىرەدى: نەگىزگى باعدارلاما بويىنشا تەگىن ٴبىلىم الۋ، اي سايىنعى 800،000 ۆون سوماسىنداعى ستيپەنديا، 3 اي قارقىندى تۇردە كورەي ٴتىلىنىڭ كۋرسىن وقۋ، ٴىشىنارا مەديسينالىق ساقتاندىرۋ.

تىركەۋ جانە ىرىكتەۋ ۋاقىتى: تىركەۋ 2018 جىلدىڭ 31 شىلدەسىندە اياقتالادى، ال ىرىكتەۋ ناتيجەسى 2018 جىلدىڭ 17 قىركۇيەگىنە دەيىن شىعادى، گرانت يەلەنگەن تالاپكەرلەر 2018 جىلدىڭ 29 قازانىنا دەيىن كورەياعا اتتانۋى كەرەك، ولار 2018 جىلدىڭ قاراشاسىنان 2019 جىلدىڭ اقپانىنا دەيىن ٴتىل كۋرستارىن وقيدى.

وقۋ 2019 جىلدىڭ ناۋرىز ايىندا باستالادى.

وقۋعا تۇسۋگە قاجەتتى قۇجاتتاردىڭ ٴتىزىمىن، وقۋعا ٴتۇسۋ جونىندەگى نۇسقاۋلىقتى جانە ٴوتىنىم ۇلگىسىن ۋنيۆەرسيتەتتىڭ سايتىنان جۇكتەپ الۋعا مۇمكىندىك جاسالعان.

كورەياعا وقۋعا تۇسۋگە قاتىستى بارلىق سۇراقتاردىڭ جاۋابىن global@karts.ac.kr ەلەكتروندى پوشتاسى نەمەسە +82-2-746-9073 تەلەفونى ارقىلى سۇراپ بىلۋگە بولادى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!