كورەيا قازاقستاندىق ستۋدەنتتەرگە قوسىمشا گرانتتار بولەدى

استانا، baq.kz. سەۋلدە مادەني ىنتىماقتاستىق بويىنشا قازاقستان-كورەيا كوميسسياسىنىڭ ٴۇشىنشى ٴماجىلىسى ٴوتتى، دەپ جازدى 24.kz

بۇل ۇكىمەتارالىق ورگاندى قۇرۋ تۋرالى قۇجاتقا قوس ەلدىڭ باسشىلارى 1995 جىلى قول قويعان بولاتىن. كوميسسيا قۇرامىنا ەكى ەلدىڭ مادەنيەت پەن سپورت، ٴبىلىم جانە سىرتقى ىستەر مينيسترلىكتەرىنىڭ وكىلدەرى كىرەدى.

ٴماجىلىس بارىسىندا وڭتۇستىك كورەيادا ٴبىلىم الاتىن قازاقستاندىقتار ٴۇشىن گرانتتار سانىن ارتتىرۋ تۋرالى كەلىسىم جاسالدى. سونداي-اق تاراپتار مادەني ىنتىماقتاستىعىن ودان ٴارى ۇلعايتۋعا كەلىسكەن.

اتاپ ايتقاندا، كەلەسى جىلى قازاقستاننىڭ بىرنەشە مۇراجايى كورەياعا ٴوز ەكسپوناتتارىن اپارادى. ال ەلىمىزگە كورەيالىق ارحەولوگتار ەكسپەديسيامەن كەلەدى. سونىمەن قاتار كورەيا ماماندارى مۇراعاتتاردى سيفرلاندىرۋ بويىنشا ٴوز تاجىريبەسىمەن بولىسەدى.

قازىرگى كەزدە وڭتۇستىك كورەيادا ٴبىر مىڭ التى جۇزدەن استام قازاقستاندىق ٴبىلىم الىپ ٴجۇر. كەلەسى جىلدان باستاپ كورەيا رەسپۋبليكاسى حورەوگرافيا، ارت-مەنەدجمەنت، رەستاۆراسيا جانە وزگە دە ماماندىقتار بويىنشا قازاقستاندىقتارعا قوسىمشا گرانتتار بولەدى.

«كورەيا تاراپىمەن جوعارى ٴبىلىم سالاسىندا، اسىرەسە وسى ٴبىزدىڭ مادەني سالاداعى جوعارعى وقۋ ورىندارىمىز بويىنشا ستۋدەنتتەرمەن الماسۋ. قوسىمشا گرانت ٴبولۋ بويىنشا كەلىسىمگە قول جەتكىزدىك. قازىرگى ۋاقىتتا كورەيا رەسپۋبليكاسىندا 1600-عا جۋىق ستۋدەنتىمىز بار. سونىڭ كوبىسى مادەنيەت سالاسىندا، حورەوگرافيا سالاسىندا، ارت-مەنەدجمەنت سالاسىندا، ٴبارىمىز بىلەتىن k-pop مەنەدجمەنتى بويىنشا تاجىريبە الماسىپ، ٴبىلىم الىپ وتىر»، - دەدى قر مادەنيەت جانە سپورت مينيسترلىگى دەپارتامەنتىنىڭ ديرەكتورى المات ٴسۇيىنوۆ.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!